بۇگىن ورتالىق كوممۋنيكاتسيالار قىزمەتى ءالاڭىندا باسپاسوز كونفەرەنتسياسى ءوتىپ, «ماشينا جاساۋ — جاڭا تەحنولوگيالار مەن يننوۆاتسيالاردى دامىتۋدىڭ درايۆەرى»تاقىرىبىندا وتكەن قازاقستان ماشينا جاساۋشىلارىنىڭ XI فورۋمىنىڭ قورىتىندىسى شىعارىلدى, دەپ حابارلايدى Egemen.kz.
«ماشينا جاساۋ سالاسى — كەز كەلگەن يندۋستريالدى دامىعان مەملەكەت ەكونوميكاسىنىڭ ماڭىزدى بولشەگى. جابدىقتار, ماشينالار, ءتۇرلى اسپاپتار, سونداي-اق حالىققا ارنالعان تاۋارلاردىڭ بارلىق ءتۇرىن وندىرە وتىرىپ, ماشينا جاساۋ كەشەنى ەكونوميكانىڭ بارلىق نەگىزگى سالالارىنداعى قىزمەتتىڭ تۇراقتىلىعىن قامتاماسىز ەتەدى», دەپ اتاپ وتتى قر يندۋستريا جانە ينفراقۇرىلىمدىق دامۋ ۆيتسە-ءمينيسترى ىلياس وسپانوۆ.
بۇگىنگى تاڭدا قازاقستان ونەركاسىبىندە ماشينا جاساۋ 6%, ءىجو بويىنشا 1,5 پايىزىن قامتيدى. اتالعان سالادا 4 مىڭعا جۋىق كاسىپورىن جۇمىس ىستەيدى. سونىمەن قاتار بيىل قۇنى شامامەن 230 ملرد تەڭگە بولاتىن 36 جوبانى ىسكە اسىرۋ جوسپارلانىپ وتىر.
سالانى ودان ءارى دامىتۋ ءۇشىن مەملەكەت باسشىسىنىڭ تاپسىرماسى بويىنشا ماشينا جاساۋدى دامىتۋ جونىندەگى كەشەندى جوسپار ازىرلەنۋدە. وسى ورايدا ماڭىزدى قۇجاتتى ازىرلەۋگە قاتىستى تولىق اقپاراتپەن «Qazindustry قازاقستاندىق يندۋستريا جانە ەكسپورت ورتالىعى» اق باسقارما توراعاسىنىڭ ورىنباسارى ءاليحان اباكانوۆ بولىستى.
«ماشينا جاساۋ سالاسىنىڭ ينۆەستيتسيالىق تارتىمدىلىعىن ودان ءارى ارتتىرۋ, ونىڭ باسەكەگە قابىلەتتىلىگىن نىعايتۋ ماقساتىندا مەملەكەت باسشىسىنىڭ تاپسىرماسى بويىنشا ءتيىستى كەشەندى جوسپار ازىرلەنۋدە. ونى تابىستى ىسكە اسىرۋ سالانىڭ دامۋىنا قۋاتتى سەرپىن بەرەدى جانە ەلىمىزدىڭ تۇراقتى يندۋستريالىق وسۋىنە ماڭىزدى ۇلەس قوسادى دەپ كۇتىلۋدە. بيىل قر يدم تاۋ-كەن مەتاللۋرگيا, ەلەكتروتەحنيكا, مۇناي-گاز, تەمىرجول, اۋىلشارۋاشىلىعى ماشينا جاساۋ سالالارى بويىنشا 7 جۇمىس توبى قۇرىلدى. كەشەندى جوسپاردىڭ ءاربىر بولىگى ەگجەي-تەگجەيلى تالقىلانىپ كەلەدى», دەدى ا.اباكانوۆ.
ءوز كەزەگىندە قازاقستان ماشينا جاساۋشىلار وداعىنىڭ اتقارۋشى ديرەكتورى ومىرسەرىك ەرجانوۆ ماشينا جاساۋ كاسىپورىندارىن قولداۋ جونىندەگى مەملەكەتتىك شارالار تۋرالى ايتىپ بەردى.
«بۇل فورۋم سالانى وركەندەتۋگە ىقپال ەتەتىن تىڭ تاسىلدەر تابۋعا ارنالعان ءتيىمدى ديالوگ الاڭىنا اينالدى. البەتتە, قازاقستاندىق ماشينا جاساۋ وڭدەۋ ونەركاسىبىندە جەتەكشى ءرول اتقارادى. ماشينا جاساۋ سالاسىن دامىتۋ شەڭبەرىندەگى جۇمىس جالعاساتىن بولادى», دەدى وتاندىق ماشينا جاساۋشىلار وداعىنىڭ وكىلى.
جيىندى قورىتىندىلاي كەلە سپيكەرلەر فورۋم اياقتالعان سوڭ قازاقستان رەسپۋبليكاسىنىڭ ۇكىمەتىنە ۇسىنىمدار جولداناتىنىن ايتتى.