دۇنيەدە كورمەۋ, ەستىمەۋدەن اسقان قورلىق جوق شىعار. وكىنىشكە قاراي, ساڭىراۋ جانداردىڭ قاتارى وسپەسە كەمىمەي وتىر. بۇگىندە الماتى وبلىسىندا ەستۋ قابىلەتىنەن ايىرىلعان مىڭنان اسا ناۋقاس ەسەپتە تۇرادى.
جۋىردا الماتى كوپسالالى كلينيكالىق اۋرۋحاناسىندا ەستۋ قابىلەتىن قالپىنا كەلتىرەتىن كوحلەارلىق يمپلانتاتسيا بويىنشا جوعارى تەحنولوگيالىق وپەراتسيا جاسالدى. ماماندار مۇنداي حيرۋرگيالىق وپەراتسيالار ەكى قۇلاعى دا ساڭىراۋ نەمەسە 4-دارەجەلى ەستۋ قابىلەتىن جوعالتقان ادامدارعا جاسالاتىنىن ايتادى. وسى كۇنى وپەراتسيا جاسالعان 56 جاستاعى ناۋقاستىڭ جۇيكە جۇيەسىنىڭ كۇيزەلۋىنە بايلانىستى ءبىرىنشى ءبىر قۇلاعى, كەيىننەن ەكى قۇلاعى دا مۇلدەم ەستىمەي قالعان. ەندىگى كەزەكتە 4 اپتا ۋاقىت وتكەن سوڭ قۇلاققا قويىلعان كوحلەارلىق يمپلانتتى قوسۋ ۇدەرىسى باستالادى. بۇل وپەراتسيانى جاساۋ ءۇشىن العاشقى تالاپتاردىڭ ءبىرى – ناۋقاس بۇرىن ەستىپ, دىبىس پەن ارىپتەردىڭ قالاي ايتىلاتىنىن ءبىلۋ كەرەك ەكەن. ال مۇلدەم ەستىمەيتىن, ياعني ءتۋابىتتى ساڭىراۋ ادامدارعا مۇنداي وپەراتسيا جاسالمايدى.
«كوحلەارلىق يمپلانتاتسيا» ءادىسى بويىنشا ەستۋ جۇيكەسىنىڭ تالشىقتارىن تىكەلەي ەلەكترلىك ىنتالاندىرۋ ارقىلى ىشكى قۇلاققا ەلەكترودتىق جۇيەلەردى ەنگىزەدى. بۇل ءادىس ەلىمىزدىڭ بىرنەشە كلينيكاسىندا عانا جۇزەگە اسىپ كەلەدى. بۇگىندە الماتى كوپسالالىق كلينيكالىق اۋرۋحاناسىنىڭ دارىگەرلەرى مەديتسينا عىلىمدارىنىڭ دوكتورى, پروفەسسور, «وتورينولارينگولوگيا ۇلتتىق مەديتسينا زەرتتەۋ ورتالىعى» فمبۋ ديرەكتورىنىڭ حالىقارالىق قىزمەت جونىندەگى ورىنباسارى دياب حاسساننىڭ قاتىسۋىمەن وپەراتسيا جاسالىپ, تاجىريبە الماستى.
– شەبەرلىك ساباعى اياسىندا 8 وپەراتسيا جاسالدى. ولاردىڭ اراسىندا كوحلەارلىق يمپلانتاتسيا, ەندوليمفا قاپشىعىن درەناجداۋ, تيمپانوپلاستيكا جانە وسسيكۋلوپاستيكامەن سانيتارلىق وپەراتسيالار بولدى. بۇلار ەرەسەك ادامدار بولعاندىقتان, كوپشىلىگىندە قوسالقى اۋرۋلار بار, سوندىقتان دارىگەرلەر الدىمەن تولىق دياگنوستيكادان وتكەن ناۋقاستارعا جوسپارلى تۇردە وپەراتسيا جاساۋدى ءجون كوردى. ەندىگى كەزەكتە وبلىس تۇرعىندارى ءۇشىن كوپسالالى اۋرۋحانا قابىرعاسىندا ەستۋ قابىلەتىن قالپىنا كەلتىرۋگە تولىق مۇمكىندىك بار, – دەيدى پروفەسسور دياب حاسسان.
الماتى كوپسالالى كلينيكالىق اۋرۋحاناسىنىڭ وتولارينگولوگيا بولىمشەسىنىڭ مەڭگەرۋشىسى اسەل اسقارقىزىنىڭ ايتۋىنشا, الماتى وبلىسى بويىنشا ديسپانسەرلىك ەسەپتە قۇلاق اۋرۋلارى بار, ونىڭ ىشىندە ەستۋ قابىلەتىنەن ايىرىلعان 1 مىڭنان اسا ناۋقاس تىركەۋدە تۇر.
– وتورينولارينگولوگيالىق كومەك كورسەتۋدى ارتتىرۋ قاجەتتىگىن ەسكەرە وتىرىپ, ءبىز وبلىستا العاش رەت كوحلەارلىق يمپلانتاتسيا بويىنشا وپەراتسيا جاسادىق. بۇرىن ءبىزدىڭ ناۋقاستاردا مۇناي مۇمكىندىك بولماعان ەدى, ايماق تۇرعىندارى ۇلكەن قالالارداعى كلينيكالارعا بارۋعا ءماجبۇر بولعان. وبلىستىق دەنساۋلىق ساقتاۋ باسقارماسى جانە امسق ارقىلى ءبىز ناۋقاستارعا كۇردەلى ساناتتارىنىڭ بىرىنە جاتاتىن وتا جاساۋعا مۇمكىندىك الدىق, – دەدى ءا.اسقارقىزى.
ول كوحلەارلىق يمپلانتاتسيا ناۋقاستىڭ ەستۋ قابىلەتىن 100 پايىز قالپىنا كەلتىرۋگە مۇمكىندىك بەرەتىنىن, بىراق بۇل دىبىس الەمىنە قايتۋدىڭ تەك العاشقى قادامى ەكەنىن, سودان كەيىن عانا ەستۋ-سويلەۋدى قالپىنا كەلتىرۋ كەرەكتىگىن تىلگە تيەك ەتتى.
كەلەشەكتە بۇل تاسىلگە توسەلگەن دارىگەرلەر وبلىس تۇرعىندارىنا عانا ەمەس, باسقا ايماقتاردان كەلەتىن ناۋقاستارعا دا كومەك قولىن سوزباق نيەتتە.
الماتى وبلىسى