وتان قورعاۋشى كۇنى تاياعاندا ەلدەگى ەڭبەك ۇجىمدارى ازاماتتاردى قۇتتىقتاپ, مەرەيىن اسىرىپ جاتادى. مەرەكە قارساڭىندا «استانا تازالىق» كاسىپورنىنىڭ ۇجىمى اۋعان سوعىسىنىڭ ارداگەرلەرىنە قۇرمەت كورسەتتى.
قالا تازالىعىنا جاۋاپتى مەكەمەدە قازىر 12 اۋعان سوعىسىنىڭ ارداگەرى جانە چەرنوبىل اپاتىنىڭ زاردابىن جويۋعا قاتىسقان ازامات ەڭبەك ەتەدى ەكەن. ۇجىمداستار جۇمىستان بوساي قالسا, ارداگەرلەردى اڭگىمەگە تارتىپ, كورگەن-بىلگەنىن, تۇيگەنىن سۇراپ-بىلۋگە اۋەس. ەل اعالارى دا اركەز ارىپتەستەرىنە اقىل-كەڭەسىن ايتىپ, قولداۋ كورسەتۋدەن قاشپايدى.
اۋعان سوعىسىنا كۇتپەگەن جەردەن بارىپ, ەكى جىل مايداندا بولعان بەيسەمبەك نارىنوۆ, قازىر تازالىققا جاۋاپتى مەكەمەدە جۇمىس ىستەيدى. ءوزى – استانا قالاسىنىڭ تۋماسى. قورعالجىندا وسكەن. سول جاقتان اسكەرگە كەتىپ, 1979-1981 جىلدارى ورالعان.
– ونىنشى سىنىپتى ءتامامداپ, سوڭعى ەمتيحاندى تاپسىرعان كۇنى اسكەرگە الىپ كەتتى. قىرعىزستاننىڭ وش قالاسىنا تارتتىق. ول كەز جاسپىز عوي. سوعىسقا باراتىنىمىزدى دا بىلگەن جوقپىز. ءۇش اي وتەر-وتپەستەن ءبىر كۇن اسكەري بولىمدە دابىل سوعىلىپ, جولعا شىعىپ كەتتىك. تاجىكستانعا اي ءجۇرىپ جەتتىك. سودان 1979 جىلدىڭ جەلتوقسانىندا اۋعانستانعا كىردىك. سوعىسقا جىبەرگەنىن اۋەلدە ءبىز بىلمەدىك. اۋعانستاننىڭ بىرنەشە قالاسىنا كىردىك. تالاي رەت اجالدان امان قالدىق. سوعىستىڭ زوبالاڭى دەگەن – وسى, – دەپ ەسكە الدى ارداگەر.
بەيسەمبەك نارىنوۆ «استانا تازالىق» سەرىكتەستىگىنە 2002 جىلى كەلگەندە ماشينيست بولعان. سودان بەرى ءبىر مەكەمەدە تابان اۋدارماي ەڭبەك ەتىپ, ەڭبەك ارداگەرى دەگەن اتقا دا لايىق بولىپ وتىرعان جايى بار. سەبەبى ارداگەردىڭ ءوزى ۇنەمى «ەڭبەككە ادال بولساڭ, جۇمىستىڭ بارلىعى جاقسى» دەپ جاستارعا ۇنەمى ەسكەرتىپ وتىرادى ەكەن.