ۇلتتىق ارحيۆتە فيلولوگيا عىلىمدارىنىڭ دوكتورى, پروفەسسور سەرىك نەگيموۆتىڭ «كوسەم ءسوزدىڭ كەنشىسى» اتتى جەكە تەك قورىنىڭ اشىلۋى مەن ماسكەۋدەگى «حۋدوجەستۆەننايا ليتەراتۋرا» باسپاسىنان جارىق كورگەن «مالىك عابدۋللين» كىتابىنىڭ تانىستىرىلىمى ءوتتى.
ءىس-شارادا ۇلتتىق ارحيۆ ديرەكتورى ساعيلا نۇرلانوۆا بەلگىلى عالىمنىڭ ءومىرى مەن شىعارماشىلىعىنا توقتالىپ, كەش ماڭىزىن اتاپ ءوتتى. ودان كەيىن قور يەسىنە سالتاناتتى تۇردە سەرتيفيكات تابىس ەتتى.
سەرىك اعامىز ۇلتتىق ارحيۆكە 100 ساقتاۋ بىرلىگىمەن 1065 قۇجات تاپسىردى. بۇل قۇجاتتاردا وتكەن عاسىردىڭ 30-جىلدارىنان باستاپ, بۇگىنگە دەيىنگى كەڭەس وداعىنىڭ باتىرى, كورنەكتى عالىم, جازۋشى مالىك عابدۋللين, الكەي مارعۇلان سەكىلدى ۇلت زيالىلارىنا قاتىستى الۋان ءتۇرلى, سان سيپاتتى شەجىرەلىك ماتەريالدار ۇسىنىلدى. سونداي-اق اۆتوردىڭ جارتى عاسىردان بەرى زامانعا, قوعامعا, تاريحقا قاتىستى جيعان-تەرگەن دۇنيەلەرى دە قامتىلعان.
مازمۇندى ءىس-شارا بارىسىندا مەملەكەتتىك ەلتاڭبا اۆتورى جانداربەك مالىبەك ۇلى, گەنەرال-لەيتەنانت, پروفەسسور اباي تاسبولاتوۆ, بەلگىلى قالامگەر بايانعالي ءالىمجانوۆ, فيلولوگيا عىلىمدارىنىڭ دوكتورى راحىمجان تۇرىسبەك, رۋحانيات جاناشىرلارى دۋلات ورازالين مەن قازىبەك ايتجانوۆ ءسوز الىپ, عالىمنىڭ ازاماتتىق كەلبەتى مەن شىعارماشىلىعى تۋرالى جىلى لەبىزدەرىن ءبىلدىردى. سونداي-اق اباي اتىنداعى مەملەكەتتىك سىيلىقتىڭ لاۋرەاتى, وپەرا ءانشىسى كەنجەعالي مىرجىقباي اۋەلەتىپ ءان سالىپ, جينالعاندارعا رۋحاني ءلاززات سىيلادى.