«قازاق گازەتتەرى» جشس-نە قاراستى باسىلىمدار رەداكتسياسىندا «سەيداحمەت بەردىقۇلوۆ مۇراسى جانە قازىرگى جۋرناليستيكا» تاقىرىبىندا دوڭگەلەك ۇستەل ءوتتى. جازۋشى, جۋرناليست سەيداحمەت بەردىقۇلوۆتىڭ 90 جىلدىق مەرەيتويىنا ارنالعان باسقوسۋعا قالامگەردىڭ كوزىن كورىپ, ءتالىمىن العان, بىرگە قىزمەت ەتكەن ساۋىتبەك ابدراحمانوۆ, ءۋاليحان قاليجان ۇلى, جارىلقاپ بەيسەنباي ۇلى, جانبولات اۋپباەۆ, قۋانىش جيەنباي, قىدىربەك رىسبەك ۇلى, باۋىرجان ومار ۇلى سىندى بەلگىلى قالامگەرلەر, سونداي-اق ەۋرازيا ۇلتتىق ۋنيۆەرسيتەتىنىڭ جۋرناليستيكا جانە ساياساتتانۋ فاكۋلتەتىنىڭ ستۋدەنتتەرى قاتىستى, دەپ جازادى Egemen.kz.
جيىندا «قازاق گازەتتەرى» جشس باس ديرەكتورى ديحان قامزابەك ۇلى قازىرگى «ۇلان», «جاس الاش», «ەگەمەن قازاقستان» سىندى رەسپۋبليكالىق باسىلىمداردى باسقارعان قالامگەر ءۋاليحان قاليجان ۇلىن 75 جاس مەرەيتويىمەن قۇتتىقتاپ, قازاقى سالتپەن يىعىنا شاپان جاپتى.
ودان كەيىن س.بەردىقۇلوۆتىڭ ازاماتتىق بولمىسى, قىزمەت جولى, وزىنەن كەيىنگىلەرگە كورسەتكەن جاناشىرلىعى, قالىپتاستىرعان مەكتەبى, سپورت جۋرناليستيكاسىنا قوسقان ۇلەسى تۋرالى ءسوز قوزعالىپ, جىلى ەستەلىكتەر ايتىلدى.
بەلگىلى مەملەكەت جانە قوعام قايراتكەرى ساۋىتبەك ابدراحمانوۆ: «سەيداحمەت بەردىقۇلوۆ بۇكىل قازاق جۋرناليستەرىنە ستاندارت جاساپ بەردى. ول جاھاندانۋ جۋرناليستيكانىڭ باسىندا تۇر. اسىرەسە قازاق جاستارىنىڭ بويىنا نامىسشىلدىقتى ءسىڭىرۋ جولىندا ەرەكشە ەڭبەك ەتتى. فۋتبول فەنومەنىن قازاققا العاش ءتۇسىندىرىپ بەرگەن دە - سەيداحمەت بەردىقۇلوۆ. بۇكىل سپورت الەمى ونىڭ نامىسشىلدىعىن ەرەكشە باعالايدى», دەدى.
سونىمەن قاتار, ءىس-شارا قاتىسۋشىلارى «قازىرگى جۋرناليستيكا - تەك جازۋ نەمەسە تەك ءوزىڭنىڭ ماقالاڭدى دايىنداپ بەرۋ بولىپ كەتكەندەي. بىراق, ەڭ ماڭىزدى نارسە - ۇيىمداستىرۋ ءىسى», دەپ سەيداحمەت بەردىقۇلوۆتىڭ ۇيىمداستىرۋشىلىق قابىلەتتەرى تۋرالى اڭگىمەلەدى.
ءۋاليحان قاليجان ۇلى دا قالامگەردىڭ قازاق جۋرناليستيكاسىنا سىڭىرگەن ەڭبەگى ولشەۋسىز ەكەنىن قوستادى.
- «لەنينشىل جاس» – ۇلتتى دارىپتەگەن, ۇلتتىڭ ءسوزىن سويلەگەن گازەت. ال سەيداحمەت بەردىقۇلوۆ - قازاق جۋرناليستيكاسى تاريحىندا التىن ارىپپەن جازىلعان تۇلعا. ول سپورت تاقىرىبىنىڭ باستاۋىندا تۇر. سەيداحمەت بەردىقۇلوۆتىڭ رۋحى, شاكىرتتەرى, ەلى, جەرى قالدى, ول ارتىنا وشپەس ءىز قالدىردى, - دەدى ءۋاليحان قاليجان ۇلى.
ال «انا ءتىلى» گازەتىنىڭ العاشقى باس رەداكتورى, بەلگىلى قالامگەر جارىلقاپ بەيسەنباي ۇلى س.بەردىقۇلوۆتىڭ جۋرناليستيكاداعى ەرەكشە قولتاڭباسى جايلى اڭگىمە قوزعادى.
«سەيداحمەت بەردىقۇلوۆ - سپورت ءتىلىن ەڭ جوعارى كوركەم ادەبيەت تىلىنە اينالدىرعان جۋرناليست. سپورت جۋرناليستيكاسىنىڭ ءستيلى - سەيداحمەت بەردىقۇلوۆتىڭ ءستيلى», دەدى ول.
سەيداحمەت بەردىقۇلوۆ - سانالى عۇمىرىندا ەلىنە ەڭبەك ەتكەن, جۋرناليستيكا سالاسىنا جانىن بەرگەن, سپورت جۋرناليستيكاسىن قالىپتاستىرعان, باسشىلىق قىزمەتتەردى اتقارا وتىرىپ, ءىزباسارلارىن دايىنداپ, شاكىرت تاربيەلەگەن ەرەكشە تۇلعا. اسىرەسە ونىڭ شاكىرتتەرگە دەگەن قامقورلىعى, جاناشىرلىعى كوپكە ۇلگى بولىپ وتىر. سەيداحمەت بەردىقۇلوۆتان ءتالىم العان جۋرناليستەر ونىڭ بولمىسىنىڭ دارالىعىن ۇنەمى ەسكە الىپ وتىرادى.
دوڭگەلەك ۇستەل بارىسىندا پۋبليتسيست جانبولات اۋپباەۆ س.بەردىقۇلوۆتىڭ باسشىلىق قىرى مەن ۇستازدىق بولمىسىنا توقتالىپ, العان تاجىربيەسى مەن كورگەن تاربيەسى تۋرالى ايتىپ بەردى.
«سەيداحمەت اعا - ماعان ۇلكەن مۇمكىندىك بەرگەن تۇلعا. ول جۇمىس ىستەتكىزە بىلەتىن. ءارى قولعا تۇسە بەرمەيتىن ادامداردى الىپ كەلىپ, كەزدەسۋ وتكىزەتىن. كەيىننەن ونى ۇيىمداستىرۋدى بىزگە جۇكتەدى, بىزگە ۇيرەتتى», دەدى ول.
جازۋشى قۋانىش جيەنباەۆ تا سەيداحمەت بەردىقۇلوۆتىڭ قاراماعىندا جۇمىس ىستەگەن شاقتاردى ەرەكشە ىقىلاسپەن ەسكە الدى.
جۋرناليست قىدىربەك رىسبەك ۇلى: «سەيداعاڭ - مەنىڭ عانا ەمەس, مىڭداعان ادامنىڭ ۇستازى, ميلليونداعان وقىرماننىڭ جادىندا قالعان قالامگەر. سەيداعاڭ - ءبىزدىڭ جۇرەگىمىزدە ساقتالعان, ساعىناتىن, ۇستاز تۇتاتىن اياۋلى اعامىز», دەدى.
عالىم باۋىرجان ومار ۇلى سەيداحمەت بەردىقۇلوۆتىڭ قاتالدىعىمەن قوسا قامقورلىعىن, باسقارۋ تاسىلدەرىن ايتا كەلە, ونىڭ جۋرناليستيكا سالاسىنداعى دارا ستيليستيكاسى مەن شەبەر تاقىرىپ قويا ءبىلۋ قابىلەتىن اتاپ ءوتتى.
«سەيداحمەت اعا 61 جاسىندا ابىز بولدى. بۇل بىزگە ۇلكەن ولشەم. ول - ۇستازداردىڭ ۇستازى. مەكتەپ قالىپتاستىردى. قورعان بولدى. ونىڭ قورعان بولۋ ءتاسىلى بولەك ەدى. باسقارۋ ءتاسىلى, مەنەدجمەنت ءتاسىلى دە مىقتى بولدى», دەدى باۋىرجان ومار ۇلى.
باسقوسۋ سوڭىندا «قازاق گازەتتەرى» جشس باس ديرەكتورى ديحان قامزابەك ۇلى سەيداحمەت بەردىقۇلوۆتىڭ 90 جىلدىعىنا ارنالعان دوڭگەلەك ۇستەلگە قاتىسقان ازاماتتارعا العىس ءبىلدىردى.