بيىل قازاقتىڭ قايتالانباس كومپوزيتورى, كۇيشى قۇرمانعازى ساعىرباي ۇلىنىڭ تۋعانىنا 200 جىل تولادى. وسىعان وراي رەسەي فەدەراتسياسىنداعى استراحان وبلىسىنىڭ دومبىراشىلارى كومپوزيتوردىڭ «اداي» كۇيىن ورىنداپ, اتىراۋ وبلىسىنا چەللەندج جولدادى.
رەسەيدە تۇرعانىمەن, ۇلتتىق ونەردەن تامىر ۇزبەگەن دومبىراشىلار بۇل كۇيدى قۇرمانعازى كەسەنەسىنىڭ الدىندا تارتتى. دومبىراشىلاردىڭ اراسىندا ەرەسەكتەر دە, بالالار دا بار.
– قازاقتىڭ ۇلى كومپوزيتورى, كۇيشى, دومبىراشى قۇرمانعازى ساعىرباي ۇلىنىڭ مەرەيتويىنا وراي چەللەندج باستاۋدى ءجون كوردىك. ءبىز – استراحان وبلىسىنىڭ دومبىراشىلارى چەللەندجىمىزدى اتىراۋ وبلىسىنا جولدايمىز, – دەيدى قۇرمانعازى اتىنداعى وڭىرلىك مادەني ورتالىعىنىڭ ديرەكتورى امانگەلدى ابىلعازيەۆ.
قۇرمانعازى ساعىرباي ۇلى رەسەي فەدەراتسياسىنداعى التىنجار اۋىلىندا جەرلەنگەن. بۇل اۋىل استراحان وبلىسىنىڭ ۆولودار اۋدانىندا ورنالاسقان. اتالعان اۋىلدا تۇراتىن قانداستاردىڭ قاتارى كوپ.
– التىنجار اۋىلىندا 2005 جىلى قۇرمانعازى اتىنداعى وڭىرلىك مادەني ورتالىعى اشىلدى. قازىر اتالعان ورتالىق استراحان وبلىسىنداعى ماڭىزدى مادەني جانە تانىمال تۋريستىك نىساندارىنىڭ بىرىنە اينالدى. ءبىزدىڭ ورتالىققا الىس-جاقىن شەتەلدەردەن جىل سايىن 1000-عا جۋىق ادام كەلەدى. تۋريستەرگە قۇرمانعازى ساعىرباي ۇلىنىڭ, ونىمەن زامانداس بولعان قازاقتاردىڭ ءومىرى تۋرالى ماعلۇمات بەرەمىز, – دەيدى امانگەلدى ابىلعازيەۆ.
ونىڭ ايتۋىنشا, ورتالىقتاعى مۋزەيدە ۇلى كۇيشىنىڭ شىعارماشىلىعى مەن ومىرىنەن سىر شەرتەتىن ءتۇرلى ەكسپونات قويىلعان. ورتالىق جانىنان قۇرىلعان «سامال» قازاق مۋزىكالىق ءانسامبلى مەن «بەلىي گورود» ورىس مۋزىكالىق انسامبلىندە 40-قا جۋىق ادام جۇمىس ىستەيدى. دەنى – قانداستارىمىز, اراسىندا 25 دومبىراشى بار.
اتىراۋ وبلىسى