اتىراۋ ونىمدەرى سىرتتان اكەلىنەتىن تاۋارلاردى ىسىرا باستادى

استانا. 11 شىلدە. اتىراۋ وبلىسىندا جەرگىلىكتى ديحاندار وسىرگەن كوكونىستەر نارىقتى جاۋلاپ الدى. بۇل تۋرالى «قازاقپارات» حابارلادى. اتىراۋ قالالىق كاسىپكەرلىك ءبولىمىنىڭ جەتەكشىسى قادىرعالي تۇرعانوۆ: «بيىل ماۋسىمدى العاشقى بولىپ اشقان «داستان» شارۋا قوجالىعى. وسى اپتادا ونىڭ قاتارىنا  «مۇساعالي», «بارىس بولاشاق» جانە «قامالوۆ» شارۋاشىلىقتارى قوسىلدى. بۇل شارۋا قوجالىقتارى ۇسىنىپ وتىرعان كوكونىستەردىڭ باعاسى: قيار – 100 تەڭگە, قىزاناق – 320, ورامجاپىراق – 50, بولگار بۇرىشى – 250 تەڭگە, ءسابىز بايلامى – 100,  جاسىل پياز بايلامى – 50 تەڭگە», – دەدى. حابارلامادا كورسەتىلگەندەي, بازارلار مەن دۇكەندەردە جەرگىلىكتى قاربىزدار دا پايدا بولعان. سونىڭ ناتيجەسىندە ءبىر كيلو قاربىزدىڭ قۇنى ءبىر كۇننىڭ ىشىندە  120-دان  70 تەڭگەگە تومەندەگەن. ال ەڭ باستىسى, جەرگىلىكتى ديحاندار ءوز ونىمدەرىن ساۋداعا شىعارا باستاعالى وزبەكستان مەن قىتايدان اكەلىنگەن كوكونىستەر مەن كارتوپتىڭ باعاسى ءبىرشاما ارزانداعان. جولدىباي بازار. دەرەككوز: «قازاقپارات». فوتو: «قازاقپارات».