مال شارۋاشىلىعىن كاسىپكە اينالدىرعان كەگەن اۋدانىندا 54 334 ءىرى قارا, 30 549 باس جىلقى بار. اتالعان اۋدانداعى شارۋا قوجالىقتار سانى – 1 501 بولسا, ونىڭ التاۋى اسىلتۇقىمدى شارۋاشىلىق ساناتىندا. اتاپ ايتساق, «كاز مياسو» جشس-ءى 4 200 باس ابەردين انگۋس, «كولساي قۇرىلىس» جشس-ءى «اۋليەكول» اتالاتىن اسىلتۇقىمدى ءىرى قارا وسىرۋدە.
سونىمەن قاتار «سەنىم» شارۋا قوجالىعى – 3 000 باس, «دارحان» شارۋا قوجالىعى – 2 500 باس, «قۇمتەكەي» جانە «تانتىباي» شارۋا قوجالىقتارى 2 100 باستان ارقار-مەرينوس قويىن اسىلداندىرۋمەن اينالىسىپ وتىر.
بۇگىندە اۋدان بويىنشا 210 659 باس قوي-ەشكى بولسا, سونىڭ ىشىندە 104 707 باس ساۋلىق تولدەپ بىتۋگە تاياندى. قازىرگى ناتيجە بويىنشا ءار ءجۇز ساۋلىقتان 95-100 قوزىدان الۋ جوسپارى تولىق ورىندالارىنا سەنىم مول.
بيىلعى كوكتەم مالشىلار ءۇشىن قولايسىزداۋ بولىپ, ءبىرشاما قيىندىق تۋدىردى. اۋا رايىنىڭ قۇبىلمالىعىنا قاراماستان جاڭا تۋعان ءتولدى امان-ەسەن اياقتاندىرىپ, شىعىنعا جول بەرمەۋگە بار قاجىر-قايراتتارىن سالىپ, تايلى-تاياعىمەن جۇمىلىپ جاتىر. سونىڭ ءبىرى – سارىتاۋدىڭ باۋرايىندا 695 باس اسىل تۇقىمدى ارقار-مەرينوس قويىن تولدەتكەن جۇماش سۋاتاەۆ يەلىك ەتەتىن «ۇلارلى» شارۋا قوجالىعى.
– ءساۋىردىڭ باسىنان باستالعان ءتول الۋ ناۋقانىنا تىڭعىلىقتى دايىندىقپەن كەلدىك. بۇل سىندارلى ساتتەن مال باسىن امان الىپ شىعۋعا ون شاقتى ءتولشى تىنىم تاپپاي قولعابىس جاساپ جاتىر. «بىرلىك بار جەردە – تىرلىك بار» دەگەن, ءبىر كىسىدەي جۇمىلا ەڭبەك ەتۋدىڭ ارقاسىندا جاڭا تۋعان ءتولدىڭ ەنەسىنە ەرىپ, ءورىستى جاس تولگە تولتىرۋعا كۇش سالۋدامىز. مالدىڭ جارتىسىنان كوبى تولدەپ بولدى, دەگەن شارۋا قوجالىعىنىڭ باسشىسى جۇماش سۋاتاەۆ بۇعان قوسا ەت باعىتىنداعى 100 باس انالىق ءىرى قارانىڭ دا بۇزاۋ ەرتكەنىن تىلگە تيەك ەتتى.
«مال باققانعا بىتەدى» دەمەۋشى مە ەدى اتالارىمىز. سول ايتقانداي ەسەلى ەڭبەك, توككەن تەردىڭ ارقاسىندا اتالعان اۋداندا مال تولدەتۋ ناۋقانى جاقسى ناتيجەلەرمەن اياقتالار كۇن جاقىن.
الماتى وبلىسى