سەناتورلار كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ كەڭەيتىلگەن وتىرىسىندا «تمد-عا قاتىسۋشى مەملەكەتتەردىڭ اقپاراتتىق-تەلەكوممۋنيكاتسيالىق جەلىلەردە اۆتورلىق قۇقىق پەن ساباقتاس قۇقىقتار وبەكتىلەرىنە قۇقىقتاردى ساقتاۋ جانە قورعاۋ بويىنشا ىنتىماقتاستىعى تۋرالى كەلىسىمدى راتيفيكاتسيالاۋ تۋرالى» زاڭدى تالقىلادى, دەپ حابارلايدى Egemen.kz پارلامەنت سەناتىنىڭ ءباسپاسوز قىزمەتىنە سىلتەمە جاساپ.
كەلىسىم اقپاراتتىق-تەلەكوممۋنيكاتسيالىق جەلىلەردە, ونىڭ ىشىندە تمد-عا قاتىسۋشى مەملەكەتتەردىڭ اۋماعىنداعى ينتەرنەت-رەسۋرستاردا اۆتورلىق قۇقىق جانە ساباقتاس قۇقىقتار وبەكتىلەرىن پايدالانۋ ماسەلەلەرىن رەتتەۋگە, اۆتورلىق قۇقىق جانە ساباقتاس قۇقىقتار وبەكتىلەرىن زاڭسىز پايدالانۋدىڭ الدىن الۋ جانە جولىن كەسۋ جونىندەگى ءىس-شارالاردى ازىرلەۋگە جانە ىسكە اسىرۋعا, سونداي-اق ۋاكىلەتتى ورگانداردىڭ قۇقىق يەلەرىمەن ىنتىماقتاستىعىن تەرەڭدەتۋگە باعىتتالعان.
سەناتورلار بۇل زاڭ اقپاراتتىق-تەلەكوممۋنيكاتسيالىق جەلىلەردەگى اۆتورلىق قۇقىق جانە ساباقتاس قۇقىق وبەكتىلەرى قۇقىقتارىنىڭ بۇزىلۋىنا قارسى ءىس-قيمىلدىڭ قۇقىقتىق تەتىكتەرىن جەتىلدىرۋگە, سونداي-اق تاۋەلسىز مەملەكەتتەر دوستاستىعىنا قاتىسۋشى مەملەكەتتەر اراسىنداعى ساۋدا-ەكونوميكالىق جانە مادەني بايلانىستاردى كەڭەيتۋگە ىقپال ەتەتىنىن اتاپ ءوتتى.