سەرگەي كانديليدي «Bereke bank»-ءتىڭ ورال قالاسىنداعى فيليالىندا قىزمەت ەتەدى. كليەنتتەرگە كۇردەلى قارجى تەرميندەرىن, نەسيە شارتتارىن مەملەكەتتىك تىلدە جاتىق ءتۇسىندىرىپ بەرەتىن «سارى قازاق» مەنەدجەردىڭ داڭقى ءبىراز جەرگە جايىلعان. سەرگەي پاۆەل ۇلى باتىس قازاقستان وبلىسىنىڭ بوكەي ورداسى اۋدانى ورتالىعى سايقىن اۋىلىندا دۇنيەگە كەلگەن ەكەن.
– قازاق ءتىلىن اۋىلدان, بالا كەزىمنەن بىلەمىن. اينالامداعى دوستارىمنىڭ ءبارى قازاق بالالارى بولدى. سولارمەن بىرگە ويناپ ءجۇرىپ ءوزىمنىڭ قالاي قازاقشا سويلەپ كەتكەنىمدى بىلمەي دە قالعان سياقتىمىن. كەيىن مەكتەپتە ۇنەمى قازاق تىلىنەن وليمپيادالارعا قاتىساتىنمىن, – دەپ ەسكە الادى سەرگەي.
سەرگەيدىڭ اكەسى پاۆەل يۆان ۇلى دا, اناسى گالينا نيكولايقىزى دا 1947 جىلى وسى سايقىن اۋىلىندا دۇنيەگە كەلگەن. يۆان سوپلياكوۆ – ەدىل بويى تەمىرجول جەلىسى قۇرىلىسىنا جولدامامەن كەلىپ, 1934 جىلى قازاق جەرىندە قالىپ قويعان تەمىرجولشى. قاسيەتتى وردا توپىراعى وعان قۇتتى قونىس بولدى. ەكىنشى دۇنيەجۇزىلىك سوعىستىڭ اۋىر جىلدارىندا ەكى مارتە مايدانعا شاقىرىلىپ تۇرىپ كەرى قايتارىلىپتى: ويتكەنى سايقىن تەمىرجول ستانساسى, وردا مەن جانىبەك اۋداندارى – ستالينگراد مايدانىنىڭ ەڭ جاقىن تىلى بولعان ەدى. فاشيست ۇشاقتارى كوكتەن بومبا تاستاپ, وق جاۋدىرىپ جاتقاندا, تەمىرجولدىڭ اقاۋىن تەز جوندەپ, مايدانعا قارۋ-جاراق, ازىق-ت ۇلىك, ەڭ باستىسى, ادام رەسۋرسىن جەتكىزۋ ءۇشىن شويىنجولدىڭ ماڭىزى زور بولاتىن.
ال گالينا نيكولايقىزى – ستاليندىك قۋعىن-سۇرگىن, رەپرەسسيانىڭ ازابىن تارتقان گرەك اۋلەتىنەن ەدى. اكەسى نيكولاي, اجەسى ماگدولينا – رەسەيدىڭ كراسنودار ولكەسىندەگى نوۆوروسسيسك قالاسىندا تۇرعان ەكەن. سوعىس جىلدارىندا «سەنىمسىز ۇلت» رەتىندە تالاي حالىق اتاجۇرتىنان جەر اۋدارىلىپ, اقتابان شۇبىرىندىعا ۇشىرادى. كانديليدي اۋلەتى دە قارا تەڭىز جاعاسىنداعى كۋرورتتى قالادان ءبىر كۇندە كوشىرىلىپ, الىستاعى قازاق دالاسىنا, نارىن قۇمىنىڭ ءبىر شەتىنە تاپ بولدى. بۇل اۋلەتتىڭ ستاليندىك رەپرەسسيادان كورگەن قۇقايى, تارتقان ازابى ءوز الدىنا ءبىر اڭگىمەگە جۇك. 1956 جىلى عانا اقتالىپ, ارنايى ەسەپتەن شىعارىلعان, سونىڭ وزىندە تۋعان ولكەسىنە قايتۋعا رۇقسات ەتىلمەگەن كانديليدي اۋلەتىنىڭ جان جاراسىن قازاق حالقىنىڭ كەڭ قۇشاعى, مەيىرىمدى جۇرەگى عانا ەمدەپ العانداي...
– انام دا, اكەم دە مەكتەپ مۇعالىمى بولدى. انام – ورىس ءتىلى مەن ادەبيەتىنەن ساباق بەرسە, اكەم – ەڭبەك ءپانىنىڭ مۇعالىمى ەدى. ەكەۋى دە ءومىر بويى سايقىن اۋىلىندا مانشۇك مامەتوۆا اتىنداعى ورتا مەكتەپتە قىزمەت جاسادى. ورتاعا وتە سىيلى ەدى, ۇزدىك ەڭبەگى ءۇشىن العان مەملەكەتتىك ماراپاتتارى دا كوپ بولدى. اتتەڭ, انام وسىدان ءتورت جىل بۇرىن 72 جاسىندا دۇنيەدەن ءوتتى, – دەيدى سەرگەي ساعىنىشپەن. ناعاشى جۇرتىنىڭ تەگىن فاميليا ەتىپ العانى دا اناسىنا دەگەن ەرەكشە ماحابباتىنىڭ كورىنىسى بولسا كەرەك.
كەيىپكەرىمىز سەرگەيدىڭ ءوزى 1-8 سىنىپتى اۋىل مەكتەبىندە وقىپتى. تەك سوڭعى 9-11 سىنىپتا ورال قالاسىنا اۋىسىپ, №1 مەكتەپتى بىتىرگەن. وقۋى ۇزدىك, ونىڭ ۇستىنە مەملەكەتتىك ءتىلدى جاقسى بىلەتىن اۋىل بالاسى جاڭا ورتادا ابىرويلى بولعانىندا ءسوز جوق. اسىرەسە قازاق تىلىنەن وتكەن وقۋشىلار وليمپيادالارىندا مەكتەپ ابىرويىن ءجيى قورعاپ شىعاتىن.
– مەكتەپتەن كەيىن جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنە ءتۇسىپ, «قارجى باكالاۆرى» ماماندىعىن قىزىل ديپلوممەن ءبىتىردىم, – دەيدى سەرگەي.
سەرگەي 2014 جىلدان بەرى بانك سالاسىندا. اۋەلى «Qazkom» بانكىندە قىزمەت ەتتى. 2018 جىلى «سبەربانكتىڭ» فيليالىنا اۋىستى. قازىر اتاۋى «Bereke bank» بولىپ وزگەرگەن مەكەمەدە ەڭبەك ەتىپ جۇرگەنىنە بيىل قازان ايىندا 5 جىل بولادى ەكەن. ومىرلىك سەرىگى ولگامەن دە وسى جەردە تانىسىپ, تابىستى. 2019 جىلى ۇيلەندى, قازىر التىن اسىقتاي ۇل ءوسىرىپ وتىر. ءبىر قىزىعى, ولگا دا قازاقشا جاقسى ءتۇسىنىپ, ازداپ سويلەي الادى.
– بىلەسىز بە, قازاق ءتىلىن بىلەتىنىمنىڭ پايداسىن ومىردە كوپ كوردىم. ويتكەنى جۇمىسىمنىڭ ءوزى حالىققا قىزمەت كورسەتۋ سالاسى عوي. بانكتە كليەنتتەرمەن تىكەلەي قارىم-قاتىناستا جۇمىس ىستەيمىن. كۇن سايىن كەلۋشى كليەنتتەرمەن كەزدەسەمىن. كەلۋشىلەردىڭ كوبى – قازاقتىلدى. سوندىقتان مەملەكەتتىك ءتىلدى بىلگەنىم ماعان كوپ كومەكتەسىپ ءجۇر, – دەيدى سەرگەي.
مىناداي قىزىق وقيعا ءجيى بولادى ەكەن. بانكتە كليەنتتەردى قابىلداۋ زالىندا بىرنەشە مەنەدجەر وتىرادى. كەيبىر كليەنت قازاق مەنەدجەردىڭ الدى بوساعانىن كۇتىپ, سەرگەيدىڭ الدى بوس تۇرسا دا جاقىنداماي تۇرادى. ولاردىڭ ءوز ويىن ورىسشا جەتكىزە الماي قوبالجىپ تۇرعانىن سەزگەن سەرگەي: «قوش كەلدىڭىز, جاقىنداڭىز, قانداي ماسەلەمەن كەلدىڭىز, ايتا بەرىڭىز!» دەپ تازا قازاقشا سويلەپ كەتكەندە, كەلۋشى اڭ-تاڭ بولادى ەكەن. «سول ساتتەگى كليەنتتىڭ قۋانىشى, ريزاشىلىعى جۇزىنەن جارقىراپ كورىنىپ تۇرادى. الدىما كەلىپ وتىرىپ, قازاق تىلىندە اڭگىمەسىن ايتا باستايدى», دەيدى سەرگەي. ءتىپتى كەيبىرى «سەن قازاقشا بىلمەيتىن بولار دەپ ويلاپ قالدىم» دەپ ىڭعايسىزدانىپ, كەشىرىم سۇراپ تا جاتادى ەكەن.
ايتپاقشى, سەرگەي قالادا تۇرسا دا اۋىلدان تامىرىن اجىراتپاعان كادىمگى قازاقتار سياقتى. اۋىلدا, تۋعان توپىراقتا اعاسى يگور سوپلياكوۆ «ماكسيم» اتتى شارۋا قوجالىعىن ۇستاپ وتىر. مال شارۋاشىلىعىمەن اينالىسادى. بۇگىندە سەكسەننىڭ سەڭگىرىنە جاقىنداپ قالعان اكەسى پاۆەل يۆان ۇلى قىس بويى قالاداعى ۇلى سەرگەيدىڭ قولىندا بولسا, كوكتەم شىعىسىمەن بوكەي ورداعا, بالاسىنىڭ شارۋاشىلىعىنا اسىعادى ەكەن. ءسويتىپ, سايقىننان 20 شاقىرىم جەردى جايلاعان مالشى قونىسىندا ۇلىنا كومەكتەسىپ جۇرەدى.
– ءبىزدىڭ وتباسىندا قازاقشا وتە جاقسى بىلەتىن ادام – اپكەم مارينا. ول انامىزدىڭ جولىن قۋدى. ورال قالاسىنداعى №12 مەكتەپتە ورىس ءتىلى مەن ادەبيەتىنەن ساباق بەرەدى. مەملەكەتتىك تىلدە سويلەپ, ساباق بەرە الادى, جازا دا بىلەدى. اۋىلداعى اعام دا ەكىباستان قازاقشا بىلەدى. ءبىزدىڭ ۇيدە تىلگە ەڭ جۇيرىگى – مارقۇم انامىز ەدى. قازاق تىلىنە دەگەن ماحاببات بارىمىزگە سول كىسىدەن جۇقسا كەرەك, – دەيدى سەرگەي.
مىنە, ەلىمىزگە مامىراجاي مامىر ايى, دوستىق پەن ىنتىماق مەرەكەسى كەلدى. قازاقستان حالقىنىڭ بىرلىگى كۇنى – كەڭ-بايتاق وتانىمىزدا تۇراتىن ءتۇرى بولەك بولسا دا تىلەگى ءبىر ميلليونداعان ادامنىڭ ورتاق مەيرامى. ورالدىق سەرگەي كانديليديدىڭ دە شاڭىراعىندا دا توي بولاتىن كۇن بۇل.
باتىس قازاقستان وبلىسى