ەرەۆاندا قر پرەمەر-ءمينيسترىنىڭ ورىنباسارى – ساۋدا جانە ينتەگراتسيا ءمينيسترى سەرىك جۇمانعارين مەن ارمەنيانىڭ ۆيتسە-پرەمەرى مگەر گريگورياننىڭ توراعالىعىمەن ەكونوميكالىق ىنتىماقتاستىق جونىندەگى قازاقستان-ارمەنيا ۇكىمەتارالىق كوميسسياسىنىڭ 9-شى وتىرىسى اشىلدى, دەپ حابارلايدى Egemen.kz ۇكىمەت باسشىسىنىڭ ءباسپاسوز قىزمەتىنە سىلتەمە جاساپ.
ۇكىمەتارالىق كوميسسيا 1999 جىلى قۇرىلعان. وسى ۋاقىتتان بەرى ەكى ەل اراسىنداعى ساۋدا-ەكونوميكالىق جانە مادەني-گۋمانيتارلىق بايلانىستار تەك نىعايا ءتۇستى.
ماسەلەن, 2022 جىلى قازاقستان مەن ارمەنيا اراسىنداعى تاۋار اينالىمى $41,6 ملن بولدى, بۇل بىلتىرعى وسى كەزەڭمەن سالىستىرعاندا, 99,8%-عا جوعارى ($20,8 ملن). ال ەكسپورت – $10,3 ملن-نان $26,9 ملن-عا دەيىن, يمپورت – $10,5 ملن-نان $14,7 ملن-عا دەيىن 40,2%-عا ءوستى.
بىلتىر قازاقستاننان ارمەنياعا اۋىل شارۋاشىلىعى, ازىق-ت ۇلىك ونىمدەرى, ەلەكتر اككۋمۋلياتورلارى, لەگيرلەنبەگەن بولاتتان جاسالعان جالپاق پروكاتتار جانە باسقا دا ونىمدەر ەكسپورتى ارتتى. ەكى ەل اراسىنداعى يمپورتتىڭ نەگىزگى بولىگىن ماشينالار مەن جابدىقتار, لاكتار مەن بوياۋلار, دارىلىك زاتتار جانە باسقا دا تاۋارلار قۇرايدى.
2023 جىلعى قاڭتار-اقپاندا تاۋار اينالىمى 81,8%-عا ءوسىپ, $4,6 ملن بولدى. قازاقستاننان ارمەنياعا ەكسپورت 2,7 ەسەگە ۇلعايىپ, $2 ملن-عا; ارمەنيادان قازاقستانعا يمپورت $2,6 ملن-عا دەيىن 46,2%-عا ءوستى.
ۇكىمەتارالىق كوميسسيانىڭ تەڭ توراعالارىنىڭ ەكىجاقتى كەزدەسۋى بارىسىندا بىلتىرعى جانە 2023 جىلعى 2 ايداعى وڭ ديناميكاعا سۇيەنە, ەكى ەل اراسىنداعى ىنتىماقتاستىقتىڭ الەۋەتى زور ەكەندىگى اتاپ ءوتىلدى.
«مۇمكىندىكتەر تەرەزەسى» مەتاللۋرگيا, اۋىل شارۋاشىلىعى, فارماتسەۆتيكا, اقپاراتتىق-كوممۋنيكاتسيا, كولىك, ەنەرگەتيكا, تۋريستىك جانە باسقا دا سالالارعا اشىلعان.
ۇكىمەتارالىق كوميسسيانىڭ پلەنارلىق وتىرىسىندا ەكىجاقتى ىنتىماقتاستىقتى كەڭەيتۋ ماقساتىندا ارميان تاراپى قىزىعۋشىلىق تانىتقان قازاقستاندىق كومپانيالاردى ارمەنيا اۋماعىندا وتكىزىلەتىن تەندەرلەرگە, سونداي-اق گيۋمري قالاسىندا لوگيستيكالىق ورتالىق (dry port) قۇرۋ جوباسىنا قاتىسۋعا شاقىرىپ, قازاقستاندىق ۇيىمداردىڭ ارمەنيا اۋماعىنداعى قۇرىلىس جۇمىستارىنا قاتىسۋىنا مۇمكىندىكتەر بار ەكەندىگىن ايتتى.
ءوز كەزەگىندە قازاقستاندىق تاراپ سەرىكتەستەردى قازاقستاننان ارمەنياعا شيكىزاتتى دا, دايىن ءونىمدى دە, ونىڭ ىشىندە, مەتاللۋرگيا, مۇناي-حيميا ونەركاسىبى, اۋىل شارۋاشىلىعى ءوندىرىسى تاۋارلارىن ەكسپورتتاۋ مۇمكىندىگى تۋرالى حاباردار ەتتى.
وتىرىس قورىتىندىسى بويىنشا تاراپتار ەكى ەلدەگى كومپانيالار مەن ىسكەر توپتاردىڭ قىزمەتىن قولداۋ, بىرلەسكەن كاسىپورىندار قۇرۋ, قازاقستان مەن ارمەنيا اۋماقتارىندا شارۋاشىلىق جۇرگىزۋشى سۋبەكتىلەردىڭ وكىلدىكتەرى مەن فيليالدارىن اشۋ, شاعىن جانە ورتا كاسىپكەرلىكتى قولداۋ, ەكسپورتتى ىلگەرىلەتۋ جانە ينۆەستيتسيالار تارتۋ تۋرالى ۋاعدالاستى.
ۇكىمەتارالىق كوميسسيا تۇراقتى نەگىزدە جىلىنا ەكى رەت ەكسپورتقا باعىتتالعان ونىمدەر تۋرالى اقپارات الماسۋعا, سىرتقى ساۋدا كولەمىن ۇلعايتۋ ماقساتىندا مۋلتيمودالدى تاسىمالداردى جۇزەگە اسىرۋ ءۇشىن ەكى ەلدىڭ كولىك-لوگيستيكالىق مۇمكىندىكتەرىن كەڭەيتۋ تۋرالى جۇيەلى تۇردە حاباردار ەتۋ تۋرالى شەشىم قابىلدادى.
سونداي-اق IT, مادەنيەت جانە تۋريزم سالالارىنداعى ىنتىماقتاستىقتى كەڭەيتۋ ماسەلەلەرى, اتاپ ايتقاندا, قازاقستان مەن ارمەنيا اراسىندا تىكەلەي اۋە رەيستەرىنىڭ سانىن ارتتىرۋ جانە استانا مەن ەرەۆان اراسىندا تىكەلەي اۋە قاتىناسىن ورناتۋ مۇمكىندىكتەرى تالقىلاندى.
قارجى تەحنولوگيالارى مەن ەلەكتروندى كوممەرتسيا سالاسىنداعى ىنتىماقتاستىقتى دامىتۋ ماقساتىندا «قازپوشتا» اق مەن «حايپوست» جاق اراسىنداعى ىنتىماقتاستىقتى دامىتۋ ماسەلەلەرى قارالدى. وسى جانە وزگە دە كەلىسىمدەر قول قويىلعان بىرلەسكەن حاتتامادا بەكىتىلدى.
سونداي-اق وتىرىس بارىسىندا تاراپتار قر ەڭبەك جانە حالىقتى الەۋمەتتىك قورعاۋ مينيسترلىگى مەن ار ەڭبەك جانە حالىقتى الەۋمەتتىك قورعاۋ مينيسترلىگى اراسىندا الەۋمەتتىك-ەڭبەك سالاسىنداعى ىنتىماقتاستىققا نيەت تۋرالى مەموراندۋمعا جانە قر مادەنيەت جانە سپورت مينيسترلىگى مەن ار ءبىلىم, عىلىم, مادەنيەت جانە سپورت مينيسترلىگى اراسىنداعى 2023-2025 جىلدارعا ارنالعان مادەنيەت سالاسىنداعى ىنتىماقتاستىق باعدارلاماسىنا قول قويدى.