ەلوردالىق ەمحانادا تاعى ءبىر جەدەل مەديتسينالىق كومەك بولىمشەسى اشىلدى

ايتا كەتەيىك, وسى جىلدىڭ 10 قاڭتارىنان باستاپ پيلوتتىق رەجيمدە قالالىق №4, №5 جانە №10 ەمحانالاردا جەدەل مەديتسينالىق كومەك بولىمشەلەرى ىسكە قوسىلعان ەدى. ونداعى نەگىزگى ماقسات – ستاتسيونارداعى دارىگەرلەر جۇكتەمەسىن ازايتۋ جانە شۇعىل العاشقى كومەك قولجەتىمدىلىگىن ارتتىرۋ.

بۇگىن استانا قالاسىنىڭ قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ №6 قالالىق ەمحانادا اشىلعان بولىمشەگە باردى.

باسقارما باسشىسىنىڭ ايتۋىنشا, پيلوتتىق رەجيمدە اشىلعان بولىمشەلەردىڭ 3 اي ىشىندەگى جۇمىس ناتيجەسى كوڭىل قۋانتارلىق. ستاتسيونارلاردىڭ قابىلداۋ بولىمدەرىنە كەلىپ تۇسكەن وتىنىشتەر سانى ەداۋىر ازايىپ, جۇكتەمە جەڭىلدەگەن.

«قازىر №2 قالالىق بالالار اۋرۋحاناسىنا كۇن سايىن 300-350-دەي ناۋقاس كەلەدى. بارىڭىزگە ءمالىم, بۇل كورسەتكىش كوكتەم-جاز ايلارىندا ۇلعايادى. بۇل جاراقات الۋدىڭ, اسىرەسە بالالار اراسىنداعى كوشە جاراقاتتارىنىڭ ماۋسىمى دەسەك تە بولادى. جەدەل مەديتسينالىق كومەك بولىمشەسىنىڭ باسىمدىلىعى – تۇرعىندارعا العاشقى كومەكتى قولجەتىمدى جانە قولايلى ەتۋ», دەدى ول.

سونداي-اق تيمۋر مۇراتوۆ № 2 قالالىق كوپبەيىندى اۋرۋحانانىڭ اكۋشەرلىك جانە نەگىزگى بلوگى اراسىندا جوبالانىپ جاتقان قابىلداۋ-دياگنوستيكالىق كەشەن بازاسىندا بالالار تراۆماتولوگيالىق پۋنكتىن اشۋ جوسپارلانىپ وتىرعانىن اتاپ ءوتتى.

مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس, اكىمدىك تاراپىنان دەنساۋلىق ساقتاۋ سالاسىنا باسىم كوڭىل بولىنۋدە. بۇعان ەلوردانىڭ نەگىزگى مەديتسينالىق-دەموگرافيالىق كورسەتكىشتەر بويىنشا رەيتينگتە كوش باستاپ تۇرعانى دالەل. تۇرعىندار ءۇشىن ساپالى مەديتسينالىق قىزمەت دەڭگەيىن ارتتىرۋ باعىتىندا جۇمىس ارى قاراي دا جالعاسادى.