استانا. 11 شىلدە. وتكەن تۇندە الماتىنىڭ «قايرات» كومانداسى قاراعاندىنىڭ «شاحتەرى» مەن استانانىڭ «استاناسىسىنىڭ» ءساتتى جولىن جالعاستىرىپ, ەۋروپا ليگاسى ىرىكتەۋ راۋندىنىڭ كەلەسى كەزەڭىنە ءوتتى. بۇل تۋرالى egemen.kz حابارلادى.
الماتىلىقتار ەكى ويىننىڭ قورىتىندىسى بويىنشا البانيانىڭ «كۋكەسي» كومانداسىن ۇتىپ كەتتى. اتاپ ايتقاندا, ولار بۇدان ءبىر اپتا بۇرىن ءوز الاڭىندا 1:0 ەسەبىمەن جەڭىسكە جەتكەن بولسا, تۇندە قوناقتا 0:0 ەسەبىمەن تەڭ وينادى.
قارىمتا ويىن البانيانىڭ استاناسى – تيرانا قالاسىنىڭ «كەمال ستافا» ستاديونىندا ءوتتى. الاڭ يەلەرى ءبىرىنشى مينۋتتان الماتىداعى ويىننىڭ ەڭ سوڭعى مينۋتىندا جىبەرىپ العان گولدارىنىڭ ەسەسىن قايتارۋعا ۇمتىلدى. بۇل ۋاقىتتاردا «قايرات» تا الاڭسىز قورعانىستا قويعان جوق. ونىڭ سول تۇستاعى ەكى قارسى شابۋىلى گول اكەلە جازدادى. ايتالىق, باۋىرجان يسلامحاننىڭ سوققىسى قاقپا باعانىنان قايتسا, «اقتوبەمەن» ويىندا حەت-تريك جاساعان كوماندا دەبيۋتانتى جەرار گوۋدىڭ ۇرعان دوبىن گولكيپەر قاعىپ الدى. تۇتاستاي العاندا, ءبىرىنشى تايمداعى ويىن الما-كەزەك شابۋىلمەن ورنەكتەلدى. سونىڭ بارىسىندا قاقپاشى دميتري حوميچ بىرنەشە رەت الماتىلىقتار قاقپاسىن امان ساقتاپ قالدى.
ەكىنشى تايم تاعى دا «كۋكەسيدىڭ» شابۋىلىمەن باستالدى. ءوز كەزەگىندە «قايرات» ولاردى مۇقيات قايتارۋمەن بولدى. سوسىن يسلامحان تاعى دا وتكىر شابۋىلدىڭ وتىنەن كورىندى. ونىڭ بۇل جولعى سوققىسى باعاننىڭ جانىنان ءوتتى. بۇدان كەيىن كۇشەيىپ كەتكەن جاۋىن ەكى جاقتى ابايلاپ ويناۋعا ءماجبۇر ەتتى. كوماندالار سوندا دا بولسا, تارازى باسىن وزدەرىنە اۋدارۋعا تىرىسىپ باقتى. الايدا, ماتچتىڭ سوڭىنا دەيىن تابلوداعى 0:0 دەگەن ەسەپ وزگەرمەدى.
مۇنىڭ الدىندا «شاحتەر» مەن «استانا» كوماندالارى كەلەسى كەزەڭگە وتكەن بولاتىن. ارمەنيا جاساقتارىمەن كۇش سىناسقان ولاردىڭ ەكەۋى دە ەكى ويىننىڭ قورىتىندىسى بويىنشا 6:1 دەگەنت ەسەپپەن جەڭىسكە جەتتى. كەشە ەلوردالىق كوماندا «پيۋنيكتى» 2:0 ەتىپ تىزە بۇكتىرسە, كەنشىلەر «شيراكتى» 4:0 ەتىپ تالقانداپ شىقتى.
ءسويتىپ, ەۋروپا ليگاسىندا ويناپ جاتقان قازاقستاننىڭ ءۇش كومانداسى دا ىرىكتەۋ راۋندىنىڭ كەلەسى كەزەڭىنە ءوتتى.
دامير قوجامقۇل.
دەرەككوز: egemen.kz.
فوتو: vesti.kz.