وتباسىنداعى زورلىق-زورلىق وقيعالارىنىڭ 60 پايىزى سوتقا جەتپەي توقتاپ قالادى. ويتكەنى كوبى ارىز جازۋدان باس تارتادى. وعان سەبەپ جابىرلەنۋشىنىڭ پسيحولوگيالىق جانە ماتەريالدىق تۇرعىدان تاۋەلدى بولۋى. وسىعان بايلانىستى زاڭدا وزىنە تاۋەلدى ادامعا زورلىق-زومبىلىق جاساعاندارعا جازا كۇشەيتىلمەك, دەپ حابارلايدى Egemen.kz.
ادام قۇقىقتارى سالاسىنداعى زاڭنىڭ جاڭاشىلدىقتارى تۋرالى ورتالىق كوممۋنيكاتسيالار قىزمەتىندە وتكەن بريفينگتە قر ءىىم تەرگەۋ دەپارتامەنتى باسقارماسىنىڭ باستىعى ەرمەك شۇلدەن ايتىپ بەردى.
زاڭدا تۇرمىستىق قۇقىق بۇزۋشىلىقتار ءۇشىن جاۋاپكەرشىلىك كۇشەيتىلدى.
ونىڭ ايتۋىنشا, تۇرمىستىق جاعدايدا «كىنالىگە ماتەريالدىق نەمەسە وزگە دە تاۋەلدىلىكتە بولعان ادامعا قاتىستى جاسالعان» اۋىر جاراقات جانە ورتاشا اۋىرلىقتاعى دەنە جاراقاتىن كەلتىرگەنى ءۇشىن اۋىرلاتاتىن قىلمىستىق جاۋاپكەرشىلىك تۋىندايتىن بولادى. قىلمىستىق كودەكستىڭ 106-شى جانە 107-ءشى باپتارىندا كورسەتىلگەن «كىنالىگە ماتەريالدىق نەمەسە وزگە دە تاۋەلدىلىكتە بولعان ادامعا قاتىستى ءىس-ارەكەت جاساۋ» دەگەن اۋىرلاتاتىن ءمان-جايلار ەنگىزىلدى.
سونداي-اق زاڭنىڭ تاعى دا ءبىر جاڭالىعى - بەينەجازبانى قولدانعان جاعدايدا تەرگەۋشىنىڭ قىسقاشا حاتتاما جاساۋ قۇقىعىنىڭ ەنگىزىلۋى.
«بۇل پروتسەسۋالدىق مەرزىمنىڭ قىسقارۋىن جانە ازاپتاۋدى بولدىرماۋدى قامتاماسىز ەتەدى. نورما ازاماتتاردىڭ كونستيتۋتسيالىق قۇقىقتارىن قورعاۋ دەڭگەيىن ارتتىرۋعا, تەرگەۋ ارەكەتتەرىن جۇرگىزۋ ۋاقىتىن قىسقارتۋعا جانە بيۋروكراتيادان ارىلۋعا باعىتتالعان», دەدى ە.شۇلدەن.