پرەزيدەنت ءىس باسقارماسى مەديتسينالىق ورتالىعىنىڭ دەلەگاتسياسى شىعىس قازاقستان وبلىسىنا ىسساپارمەن كەلدى, دەپ حابارلايدى Egemen.kz.
دەلەگاتسيانىڭ ساپارى وسكەمەندەگى كوپبەيىندى ونكولوگيا جانە حيرۋرگيا ورتالىعىنىڭ جۇمىسىمەن, كت كابينەتىمەن جانە احۋالدىق ورتالىقتى ارالاۋدان باستالدى.
سونداي-اق مەديتسينالىق ورتالىق وكىلدەرى شىعىس قازاقستان وبلىستىق مامانداندىرىلعان مەديتسينالىق ورتالىق دارىگەرلەرىمەن جانە وپەراتسيا جاسالعان پاتسيەنتتەرمەن جۇزدەسىپ, يننوۆاتسيالىق مەديتسينا بولىمشەسىن ارالادى. مەديتسينالىق ورتالىق ماماندارى شىعىس قازاقستان وبلىستىق اۋرۋحاناسىنا بارىپ, وندا كارديوحيرۋرگيا, قانتامىرلىق حيرۋرگيا, گينەكولوگيا مەن قابىلداۋ بولىمشەلەرىنىڭ جۇمىسىمەن تانىستى.
18 ساۋىردەن باستاپ شىعىس قازاقستان وبلىسىندا قر ءپىب مەديتسينالىق ورتالىعى مەن وعان قاراستى ۇيىمداردىڭ 34 جەتەكشى مامانى حالىققا پراكتيكالىق جانە كونسۋلتاتسيالىق ادىستەمەلىك كومەك كورسەتىپ, كۇردەلى تەحنولوگيالىق وپەراتسيالار جاساپ, ايماقتىڭ دارىگەرلەرىنە جانە بيزنەس وكىلدەرىنە شەبەرلىك ساباقتارىن, ترەنينگتەر وتكىزىپ جاتىر.
ايتا كەتسەك, «قر پرەزيدەنتى ءىس باسقارماسى مەديتسينالىق ورتالىعىنىڭ كۇندەرى» جوباسى وتاندىق مەديتسينالىق ءتۋريزمدى دامىتۋ, ەلىمىزدىڭ وڭىرلەرىندە دەنساۋلىق ساقتاۋ سالاسىنىڭ جاڭا مەديتسينالىق تەحنولوگيالارىن ەنگىزۋ, تۇرعىندارعا مەديتسينالىق كومەك كورسەتۋ ماقساتىندا وتكىزىلەدى.