پرەزيدەنت قاسىم-جومارت توقاەۆ ۇلتتىق بانك توراعاسى عالىمجان ءپىرماتوۆتى قابىلدادى. مەملەكەت باسشىسىنا وسى جىلدىڭ ءبىرىنشى توقسانىنداعى اقشا-كرەديت ساياساتىن ىسكە اسىرۋ قورىتىندىسى تۋرالى ەسەپ بەرىلدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
ۇلتتىق بانك توراعاسى قازاقستاننىڭ ەكونوميكاسى مەن قارجى سەكتورىنداعى احۋال, ىسكەرلىك بەلسەندىلىكتىڭ جاقسارۋى, دەپوزيت نارىعىنىڭ ديناميكاسى, سونداي-اق بجزق-نىڭ, ۇلتتىق قوردىڭ اكتيۆتەرى مەن التىن-ۆاليۋتا رەزەرۆتەرىنىڭ جاعدايى تۋرالى باياندادى.
اي سايىنعى جانە بازالىق ينفلياتسيانىڭ تومەندەگەنىن جانە رەتتەۋشىنىڭ بۇعان دەيىن جاساعان بولجامدارىنا سايكەس كەلىپ وتىرعانىن جەتكىزدى. سونىمەن قاتار ينفلياتسيا دەڭگەيى ءالى دە جوعارى كۇيىندە قالىپ وتىر. بۇل قازىرگى اقشا-كرەديت شارتتارىن ساقتاۋدى قاجەت ەتەدى.
سونداي-اق عالىمجان ءپىرماتوۆ جەدەل تولەمدەر جۇيەسىنىڭ دامۋى جانە تسيفرلىق تەڭگەنى ەنگىزۋگە دايىندىق بارىسى تۋرالى مالىمەت بەردى.
قاسىم-جومارت توقاەۆ اقشا-كرەديت ساياساتىن ءتيىمدى جۇزەگە اسىرۋعا باعىتتالعان بىرقاتار تاپسىرما بەردى.