استانا قالاسى پوليتسيا دەپارتامەنتى سارىارقا اۋدانى پب كريمينالدىق پوليتسيا ءبولىمىنىڭ قىزمەتكەرلەرى الاياقتىق جاسادى دەگەن كۇدىككە ىلىنگەن 25 جاستاعى قالا تۇرعىنىن ۇستادى, دەپ حابارلادى Egemen.kz Polisia.kz-كە سىلتەمە جاساپ.
تەرگەۋ امالدارى بارىسىندا جىگىتتىڭ Instagram الەۋمەتتىك جەلىسى ارقىلى انشىلەردىڭ كونتسەرتتەرىنە بيلەت ساتۋ ماقساتىندا جارناما ورنالاستىرعانى انىقتالدى. وسىلايشا, ايگىلى ءانشىنىڭ مەرەكەلىك كەشىنە بارماقشى بولىپ بيلەت ساتىپ العان قالا تۇرعىنى, الاياققا 50 مىڭ تەڭگە اۋدارىپ جىبەرگەن. الايدا, ول كونتسەرتكە كەلگەندە, بيلەتتىڭ جالعان بولىپ شىققانىن اڭعارعان. الدانعانىن تۇسىنگەن قىز پوليتسياعا جۇگىنگەن.
ءتارتىپ ساقشىلارى ۇستالعان ازاماتتىڭ وسىعان ۇقساس ايلامەن بىرنەشە ەلوردا تۇرعىنىن الداعانىن انىقتادى. اتالعان فاكتىگە بايلانىستى سوتقا دەيىنگى تەرگەۋ امالدارى جۇرگىزىلىپ جاتىر. قازىر كۇدىكتىنىڭ وسىعان ۇقساس باسقا دا قىلمىستارعا قاتىستىلىعى تەكسەرىلىپ جاتىر.
استانا قالاسىنىڭ پوليتسيا دەپارتامەنتى ازاماتتارعا ساق بولۋدى, الدىن الا تولەم جاساۋدان باس تارتۋدى جانە كورسەتىلەتىن قىزمەتتەردىڭ دۇرىستىعىن تەكسەرۋدى ەسكەرتەدى.