قازاقستان ازاماتتارى جاردەماقى الۋ ءۇشىن قۇجاتتاردى كوبىنە قاعاز كۇيىندە تاپسىرىپ كەلدى. بۇدان بۇلاي وتباسى دەرەكتەرى تسيفرلاندىرىلادى. قولدانىستاعى قاعاز قۇجاتتار بىرتىندەپ جۇيەدەن الىنىپ تاستالادى. بۇل تۋرالى ەڭبەك جانە حالىقتى الەۋەمەتتىك قوعاۋ ءمينيسترى تامارا دۇيسەنوۆا «Egemen Qazaqstan» گازەتىنە بەرگەن سۇحباتىندا ايتتى, دەپ حابارلايدى Egemen.kz.
ەلىمىزدە العاش رەت الەۋمەتتىك كودەكس قابىلدانعان بولاتىن. كودەكستەگى وزگەرىستەردىڭ ءبىرى وتباسىنىڭ تسيفرلىق كارتاسى. مينيستر باس باسىلىمعا بەرگەن سۇحباتىندا تسيفرلىق كارتانىڭ جۇمىس ىستەۋ جۇيەسى تۋرالى ايتىپ بەردى.
«وتباسىنىڭ تسيفرلىق كارتاسى دەگەنىمىز – ەلىمىزدەگى وتباسىلاردىڭ دەربەس دەرەكقورى. بۇل دەرەكقور مەملەكەتتىك ورگانداردىڭ قازىرگى اقپاراتتىق جۇيەلەرى نەگىزىندە قالىپتاستىرىلىپ جاتىر. ونى ەنگىزۋدەگى ماقسات – حالىقتىڭ مەملەكەتتىك قولداۋ جۇيەسىنە تەڭ قول جەتكىزۋىن قامتاماسىز ەتۋ.
سوندىقتان كودەكستە بىرىنشىدەن, وتباسىلىق تسيفرلىق كارتانى مەملەكەتتىك الەۋمەتتىك ساياساتتىڭ ورتا جانە ۇزاق مەرزىمدى مىندەتتەرى مەن باعىتتارىن ايقىنداۋ قۇرالى رەتىندە بەلگىلەدىك. ياعني مەملەكەت كىمگە, قاشان, قانداي كومەك قاجەتتىگىن انىقتاپ قانا قويماي, الەۋمەتتىك تاۋەكەلدەردىڭ الدىن الادى», دەدى مينيستر.
سونداي-اق ازاماتتار اقپاراتتى SMS-حابارلاما ارقىلى الا الادى.
«ەكىنشىدەن – كارتا وتباسىلار نەمەسە وتباسى مۇشەلەرىنىڭ الەۋمەتتىك مارتەبەسىنە جانە ءال-اۋقات دارەجەسىنە قاراپ, مەملەكەتتىك قولداۋدىڭ قانداي ءتۇرىن الۋعا قۇقىلى ەكەندىگىن جەتكىزىپ وتىراتىن ەلەكتروندى جارشى قىزمەتىن اتقارادى. مۇنداي اقپارات ءار وتباسىنا مەملەكەتتىك ورگان تاراپىنان SMS-حابارلاما تۇرىندە جىبەرىلىپ وتىر.
ۇشىنشىدەن, مەملەكەتتىك قولداۋ پرواكتيۆتى فورماتتا جۇرگىزىلەدى. ول دەگەنىمىز – ازاماتتارعا الەۋمەتتىك تولەم مەن كومەك اقپاراتتىق جۇيەلەردەگى دەرەكتەر نەگىزىندە تاعايىندالادى دەگەن ءسوز. قولدانىستاعى قاعاز قۇجاتتار كەزەڭ-كەزەڭىمەن جۇيەدەن شىعارىلادى», دەدى مينيستر.
تامارا دۇيسەنوۆا تسيفرلىق جۇيەدە قاتەلىكتەر كەتكەن جاعدايدا ازاماتتار جەرگىلىكتى حالىققا قىزمەت كورسەتۋ ورتالىقتارىنا جۇگىنىپ, تسيفرلىق كارتاعا وزگەرىس ەنگىزە الاتىنىن اتاپ ءوتتى.