ءماجىلىس دەپۋتاتى ەرلان سايىروۆ سىبايلاس جەمقورلىققا قاتىستى پىكىر بىلدىردى, دەپ حابارلايدى Egemen.kz.
دەپۋتات جەمقورلىقپەن كۇرەسۋ جۇمىستارىن كۇشەيتۋ ماقساتىندا بۇرىن بيلىكتە بولعان شەندىلەردىڭ دۇنيە مۇلكىن تەكسەرۋدى ۇسىندى.
«سىبايلاس جەمقورلىق پروبلەماسى بويىنشا ايتارىم - «بالىق باسىنان ءشىريدى». ءبىز كەزىندە جوعارى بيلىكتە وتىرعان ازاماتتاردىڭ اۋزىن تىيماي, بەرى جاعىنان تىيۋ مۇمكىن ەمەس. بۇل جەردە جەمقورلىق پروبلەماسى تەك مەملەكەت پەن ونىڭ بيۋدجەتىنە عانا بايلانىستى ەمەس. بۇل جەردە بانك جۇيەسى دە بار», دەدى ءماجىلىس دەپۋتاتى ەرلان سايىروۆ تەلەباعدارلاما ەفيرىندە.
ول سونداي-اق سىبايلاس جەمقورلىق ماسەلەسىندە جاقىندا قابىلدانعان زاڭنىڭ قاتاڭ ورىندالۋى ماڭىزدى ەكەنىن اتاپ ءوتتى.
«بىزدە قاي اكىمنىڭ قانداي بيزنەسى بار ەكەنىن بۇكىل قازاقستان بىلەدى. ماعان 30 جىل بيزنەسپەن اينالىسىپ كەلە جاتقان ازامات بۇرىنعى مينيسترلەردىڭ قانداي ءۇيى, دۇنيە-مۇلكى بارىن ايتتى, قۇنى 1-1,5 ملن تۇرادى دەدى. «30 جىل بيزنەسپەن اينالىسىپ جۇرگەن مەن ونداي ءۇيدى الا المايمىن» دەيدى. مەنىڭ ويىمشا, سول بۇرىنعى مينيسترلەردىڭ تابىسى مەن مۇلكىن تەكسەرۋ كەرەك. قازىر زاڭ شىقتى, ەگەر مەملەكەتتىك قىزمەتكەر دۇنيە-مۇلكىن قالاي تاپقانىن دالەلدەي الماسا, وندا ونى مەملەكەتكە قايتارۋى ءتيىس. وسى باعىتتا جۇمىستى كۇشەيتۋ كەرەك», دەيدى دەپۋتات.