قر ءپىب «بۋراباي» ۇلتتىق پاركىندە ءداستۇرلى «پاركتەر شەرۋى-2023» تابيعاتتى قورعاۋ اكتسياسى باستالدى, دەپ حابارلايدى Egemen.kz.
ءساۋىر ايىنىڭ باسىنان بەرى ساياباق قىزمەتكەرلەرى ورماندا قۇستارعا ارناپ 98 ۇيشىك ورناتتى. ودان بولەك, وزەن-كولدەردىڭ جاعالاۋىندا جاساندى 52 ۇيا جاسالدى.
ورمان ينسپەكتورلارى حالىقتىڭ قورشاعان ورتا تۋرالى تانىمىن كەڭەيتىپ, ەكولوگيالىق ءبىلىم بەرۋدى قولعا العانىنا دا توقتالا كەتكەن ءجون. اتاپ ايتقاندا, مەكتەپ وقۋشىلارى مەن كوللەدج ستۋدەنتتەرىنىڭ اراسىندا تابيعاتتى قورعاۋ تاقىرىبىنداعى قىزىقتى ۆيكتورينالار ءوتىپ جاتىر. ال قورىقشىلار جاستارعا ورمان قىزمەتىنىڭ قىزىعى مەن قيىندىعى جايلى اڭگىمەلەپ بەردى.
كۇن جىلىنا كەلە جەرگىلىكتى حالىقتى ەكولوگيالىق سەنبىلىككە شاقىرۋ جوسپارلانىپ وتىر. سونداي-اق بالعىن قىلقالام شەبەرلەرىنىڭ اراسىندا تابيعات تاقىرىبىندا سۋرەت بايقاۋ وتپەك. قورشاعان ورتانى قورعاۋعا باعىتتالعان وسى تەكتەس ءىس-شارالار ءۇش اي بويى وتەدى.
مەملەكەتتىك تابيعي قورىقتار, ۇلتتىق پاركتەر, تابيعي رەزەرۆاتتار جىل سايىن وتكىزەتىن دۇنيەجۇزىلىك «پاركتەر شەرۋى» اكتسياسىنىڭ تاريحى وتكەن عاسىردىڭ ورتا شەنىنەن باستالادى. اۋقىمدى ءىس-شارا حالىقتىڭ, قوعامنىڭ, بيلىك وكىلدەرىنىڭ, بۇقارالىق اقپارات قۇرالدارىنىڭ جانە كاسىپكەرلەردىڭ نازارىن ەرەكشە قورعالاتىن تابيعي اۋماقتاردىڭ وزەكتى ماسەلەلەرىنە اۋدارۋعا باعىتتالعان.