قر مەملەكەتتىك كەڭەسشىسى ەرلان قاريننىڭ توراعالىعىمەن قازاقستان رەسپۋبليكاسى پرەزيدەنتى جانىنداعى سىبايلاس جەمقورلىققا قارسى ءىس-قيمىل ماسەلەلەرى جونىندەگى كوميسسياسىنىڭ وتىرىسى ءوتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
وتىرىس بارىسىندا 2021-2023 جىلدارعا ارنالعان كولەڭكەلى ەكونوميكاعا قارسى ءىس-قيمىل جونىندەگى كەشەندى جوسپاردىڭ ورىندالۋ بارىسى قارالدى.
جيىندا قارجىلىق مونيتورينگ اگەنتتىگى, قارجى مينيسترلىگى, يندۋستريا جانە ينفراقۇرىلىمدىق دامۋ مينيسترلىگى باسشىلارىنىڭ كەشەندى جوسپاردى جۇزەگە اسىرۋعا قاتىستى ەسەبى تىڭدالدى.
ەرلان قارين حالىقتىڭ مۇقتاجدىعىن وتۋگە باعىتتالعان ناقتى نارىقتىق ەكونوميكاعا كوشۋ بارىسىندا كولەڭكەلى ەكونوميكانىڭ كولەمىن ازايتۋ ەرەكشە ماڭىزدى ەكەنىن اتاپ ءوتتى.
ەسكە سالا كەتسەك, مەملەكەت باسشىسى قاسىم-جومارت توقاەۆ مۇنداي مىندەتتى كەشە وتكەن ەلىمىزدىڭ الەۋمەتتىك-ەكونوميكالىق دامۋ ماسەلەلەرى جونىندەگى كەڭەيتىلگەن كەڭەستە قويعان ەدى.
مەملەكەتتىك كەڭەسشى جوسپارلانعان ءىس-شارالاردى ءوز دەڭگەيىندە اتقارۋدىڭ, كوزدەگەن ناتيجەگە قول جەتكىزۋدىڭ, جۇرگىزىلىپ جاتقان جۇمىستار كولەڭكەلى ەكونوميكانىڭ دەڭگەيىن تومەندەتۋگە شىنايى اسەر ەتۋىنىڭ, سونداي-اق كولەڭكەلى ارەكەتتەرگە ۇرىنعان باسقا دا سالالاردى انىقتاۋدىڭ ماڭىزدى ەكەنىن اتاپ ءوتتى. ايتالىق, يندۋستريا جانە ينفراقۇرىلىمدىق دامۋ مينيسترلىگى بويىنشا كەشەندى جوسپارعا كولىك جانە قۇرىلىس سالالارىن قامتىعان ءىس-شارالار عانا كىرگەن. مىسالى, جەر قويناۋىن پايدالانۋ سالاسىندا دا كولەڭكەلى ەكونوميكامەن بايلانىستى تاۋەكەلدەر بار. مينيسترلىككە جەتەكشىلىك ەتەتىن بارلىق سالا بويىنشا كولەڭكەلى ەكونوميكانىڭ سىن-قاتەرلەرىن جويۋ جونىندە تاپسىرما بەرىلدى. سونىمەن قاتار, مەملەكەتتىك ورگاندار تاراپىنان قابىلداناتىن شارالار كاسىپكەرلىككە قىسىم كورسەتىپ, ينۆەستيتسيالىق كليماتتىڭ ناشارلاۋىنا اكەپ سوقپاۋى كەرەك.
جيىندا ايتىلعان وي-پىكىرلەردى سارالاي كەلە كوميسسيا تاراپىنان ناقتى ۇسىنىستار ازىرلەندى. ال وتىرىس قورىتىندىسى بويىنشا مەملەكەتتىك كەڭەسشى بىرقاتار تاپسىرما بەردى, ونىڭ ورىندالۋى باقىلاۋعا الىندى.