باتىس قازاقستانمەن 5 وبلىسى شەكارالاس جاتقان رەسەي فەدەراتسياسىندا ديزەل وتىنىنىڭ باعاسى 45%-عا قىمبات. مۇنداي جاعدايدا ارزان جانارمايدىڭ سىرتقا كەتۋى – قالىپتى قۇبىلىس. مىسالى, ەلىمىزدە ناۋرىز ايىندا وتكەن جىلمەن سالىستىرعاندا جانار-جاعارماي تۇتىنۋ 15 پايىزعا ءوسىپ كەتكەن.
«قازاقستان الەمدە جانار-جاعارماي باعاسى ەڭ ارزان ەلدەردىڭ قاتارىنا كىرەدى. ونىڭ ۇستىنە سوڭعى بەس جىلدا ينفلياتسيا دەڭگەيىنە قاراماستان, بەنزين باعاسى – 2,3%, ديزەل وتىنى – 5,3% عانا وسكەن. سوندىقتان ەنەرگەتيكا ءمينيسترىنىڭ مۇناي ونىمدەرىنىڭ جاڭا باعاسى تۋرالى شىعارعان بۇيرىعىنا تۇسىنىستىكپەن قاراۋ كەرەك», دەيدى باتىس قازاقستان وبلىسىنىڭ ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى ميراس مۇلكاي.
ءدال قازىر باتىس قازاقستان وبلىسىندا جاعداي تۇراقتى, ەشقانداي شەكتەۋ جوق. سوڭعى مالىمەت بويىنشا, وبلىس اۋماعىنداعى مۇناي بازالارىندا, جانار-جاعارماي بەكەتتەرىندە 4 100 توننا ديزەل وتىنى بار, بۇل وبلىستىڭ 8 تاۋلىك تۇتىنۋىنا جەتكىلىكتى. سونداي-اق اي-92 ماركالى بەنزيننىڭ – 3 021 تونناسى (5 كۇندىك قور) جانە اي-95 ماركالى بەنزيننىڭ – 712 تونناسى (2 كۇندىك قور) بار.
باتىس قازاقستان وبلىسىن ديزەل وتىنىمەن قامتاماسىز ەتۋ كوپتەن شەشىلمەي جۇرگەن كۇردەلى ماسەلەنىڭ ءبىرى. ءبىر قىزىعى, وبلىستا ديزەل وتىنىن وندىرەتىن «كوندەنسات» كومپانياسى بار. ول جىلىنا 850 مىڭ توننا مۇناي ءونىمىن, اتاپ ايتقاندا, بەنزين, گازويل جانە ديزەل وتىنىن شىعارا الادى. سونىڭ ىشىندە كاسىپورىن 200 مىڭ توننا جازعى جانە قىسقى ديزەل وتىنىن شىعارۋعا قاۋقارلى. الايدا قاراشىعاناق كەنىشىنىڭ ءدال ۇستىندە وتىرعان كومپانيا شيكىزاتقا زار بولىپ, نەبارى 12,2% قۋاتىمەن جۇمىس ىستەۋدە. بيىلعى 3 اي ىشىندە «كوندەنسات» 26 مىڭ تونناعا جۋىق مۇناي ءونىمىن, سونىڭ ىشىندە 11 مىڭ تونناعا جۋىق ديزەل وتىنىن وندىرگەن.
«بۇگىندە كومپانيانى تۇراقتى شيكىزاتپەن قامتاماسىز ەتۋ ماسەلەسىن ورتالىق اتقارۋشى ورگاندار قاراستىرىپ جاتىر» دەيدى بقو كاسىپكەرلىك جانە يندۋستريالدى-يننوۆاتسيالىق دامۋ باسقارماسى باستىعىنىڭ ورىنباسارى جاننا بەكقاليەۆا.