مەملەكەت باسشىسى ءبىلىم سالاسى ساپالى ءبىلىم بەرۋگە ەمەس, جالعان كورسەتكىشتەرگە جۇمىس ىستەپ جاتقاندىعىن ايتتى, دەپ حابارلايدى Egemen.kz.
قازىرگى زاماندا بىلىمگە سەنسەك قانا دامي الاتىنىمىز انىق. پرەزيدەنتتىڭ دە قاپى قالمايىق دەيتىنى سول. دەگەنمەن ءبىلىم سالاسىندا ولقىلىقتار وتە كوپ. قاسىم-جومارت توقاەۆ بۇل سالادا كوزبوياۋشىلىقتىڭ كوبەيگەنىن اتاپ ءوتتى.
«قازىرگى زاماندا دامۋدىڭ باستى كىلتى – ءبىلىم. ءبىز زامان تالابىنا بارىنشا بەيىم, سونداي-اق جارقىن بولاشاقتى ءوز قولىمەن قالايتىن جاسامپاز ۇرپاق تاربيەلەۋىمىز كەرەك. PISA حالىقارالىق زەرتتەۋىنە قاراساق, ەلىمىز سوڭعى 10 جىلدا ورتا ءبىلىم ساپاسى بويىنشا 80 ەلدىڭ ىشىندە ەلۋىنشى-الپىسىنشى ورىننان كوتەرىلگەن جوق. دەمەك, جاعدايىمىز ءماز ەمەس. باستى تۇيتكىلدىڭ ءبىرى – بالالاردىڭ ءبىلىمىن بىرجاقتى باعالاۋ. ەلىمىزدە ءبىلىمنىڭ ساپاسىنا ەمەس, كورسەتكىشتىڭ جوعارى بولۋىنا باسا ءمان بەرىلەدى. وقۋشىلاردىڭ بىرىڭعاي ۇلتتىق تەستىلەۋدەن العان باعاسى مەن مەكتەپتەگى باعاسى ەكى ءتۇرلى. ايىرماشىلىق 30 پايىز نەمەسە ودان دا كوپ بولۋى مۇمكىن. سونداي-اق وسىنداي الشاقتىق حالىقارالىق جانە ۇلتتىق باعالاۋ كەزىندە بايقالادى. اشىعىن ايتساق, مۇنىڭ ءبارى جاپپاي بەلەڭ العان كوزبوياۋشىلىقتىڭ كەسىرىنەن بولىپ وتىر. ءوزىڭدى-ءوزىڭ الداۋ جارعا جىعادى», دەدى پرەزيدەنت.