ۇكىمەت ەسكى جۇمىس ءتاسىلىن تۇبىرىمەن جويۋ ءۇشىن ەرىك-جىگەر تانىتۋعا ءتيىس. بۇل تۋرالى مەملەكەت باسشىسى ەلىمىزدىڭ الەۋمەتتىك-ەكونوميكالىق دامۋى جونىندەگى كەڭەس بارىسىندا ايتتى, دەپ حابارلايدى Egemen.kz.
«مەن بۇگىن رەفورمالارىمىزدى جۇزەگە اسىرۋداعى بىرقاتار ولقىلىقتارعا, تۇيتكىلدەرگە توقتالدىم. نەگىزگى ماسەلە – جۇمىستىڭ ساپالى ورىندالماۋىندا. سول سەبەپتى ناقتى ناتيجەگە قول جەتكىزە الماي وتىرمىز. ونىڭ ءتۇرلى سەبەبى بار. كەيبىر مەملەكەتتىك قىزمەتشىلەر, باسشىلار ءوز جۇمىسىنا سەلقوس قارايدى, بەلسەندى ەمەس. وزىنە جاۋاپكەرشىلىك الۋدان تارتىنادى.
بۇل, اسىرەسە, بيۋدجەت قارجىسىن يگەرۋ ىسىندە قاتتى بايقالادى. ولار جۇمىستى ساپالى ورىنداۋعا ەمەس, تاپسىرمانى دەر كەزىندە باقىلاۋدان الۋعا باسا ءمان بەرەدى. سونىڭ زاردابىن ءبارىمىز تارتىپ وتىرمىز. جاريا ەتىلگەن كوپتەگەن رەفورما ءالى دە باياۋ ءجۇرىپ جاتىر. ونى مويىنداۋىمىز كەرەك. سوندىقتان ۇكىمەت ەسكى جۇمىس ءتاسىلىن تۇبىرىمەن جويۋ ءۇشىن ەرىك-جىگەر تانىتۋعا ءتيىس», دەدى پرەزيدەنت.
سونداي-اق مەملەكەت باسشىسى ەلدە زاڭ مەن ءتارتىپ قاتاڭ ساقتالۋى قاجەت ەكەنىن اتاپ ءوتتى.
«زاڭ ۇستەمدىگى بولماسا, تۇراقتىلىق تا بولمايدى. ال تۇراقتىلىق جوق جەردە ەشقانداي دامۋ دا بولۋى مۇمكىن ەمەس. سوندىقتان ازاماتتارىمىز زاڭعا باعىنۋى كەرەك, ال قۇزىرلى ورگاندار زاڭ بۇزۋشىلىقتىڭ الدىن الۋعا ءتيىس. قوعامنىڭ قاۋىپسىزدىگىن جانە تۇراقتىلىعىن ساقتاۋ – مەملەكەتتىڭ باستى مىندەتى. وركەنيەتتى ەلدەردىڭ بارىندە سولاي. اكىمدەر – مەملەكەتتىڭ جەرگىلىكتى جەردەگى وكىلى. سوندىقتان بۇل جۇمىسقا باسا ءمان بەرۋ قاجەت», دەدى ەل پرەزيدەنتى.