وسىدان ءبىر جىل بۇرىن سىرتقى ىستەر مينيسترلىگى رەسەي نارىعىنان كەتكەن 362 ءىرى شەتەلدىك كومپانيامەن رەلوكاتسيا بويىنشا كەلىسسوز جۇرگىزىپ جاتقانىن حابارلاعان ەدى. بىلتىر جىل سوڭىندا 62 كومپانيا وڭ جاۋاپ بەردى دەپ, ءسال كەيىنىرەك 20-سىنىڭ قازاقستانعا ورنىققانىن مالىمدەگەن. بيىل وعان تاعى 4 كومپانيا قوسىلدى. جاقىندا «Egemen Qazaqstan» ساۋالىنا جاۋاپ بەرگەن ۆەدومستۆو قازىرگى ۋاقىتتا الەمنىڭ 38 ەلىنەن 401 ءىرى كومپانيانىڭ ءتىزىمى قۇرىلعانىن, سونىڭ ىشىندە 66 كومپانيا بويىنشا ناقتى كەلىسسوزدەر جۇرگىزىلىپ جاتقانىن ايتتى.
«كومپانيالارعا ەلىمىزدەگى ينۆەستيتسيالىق احۋال تۋرالى نىسانالى ماقساتتاعى شاقىرۋ حاتتار مەن پرەزەنتاتسيالىق ماتەريالدار جولداندى. قازاقستاننىڭ شەتەلدەردەگى مەكەمەلەرىنىڭ باسشىلارى قىزىعۋشىلىق تانىتقان كومپانيالاردىڭ توپ-مەنەدجمەنتىمەن جەكە كەزدەسۋلەر وتكىزىپ جاتىر. سونىمەن قاتار قازىرگى ۋاقىتتا شەتەلدىك كومپانيالاردىڭ باسىم بولىگى ايماقتاعى احۋالدىڭ ودان ارعى بەتالىسىن كۇتىپ وتىرعاندارىن اتاپ وتكەن ءجون», دەپ مالىمدەدى ينۆەستيتسيا كوميتەتىنىڭ توراعاسى ارداق زەبەشەۆ.
بيىل ەلىمىزگە 4 كومپانيا كوشىپ كەلگەن. ەلەكتر قۋاتى جابدىقتارىن شىعارۋمەن جانە سول سالاداعى يننوۆاتسيالىق شەشىمدەردى ازىرلەۋمەن اينالىساتىن فرانتسيالىق كومپانيانىڭ تەحنولوگيالارى ەلىمىزگە ترانسفەرلەنىپ, اتىراۋ وبلىسىندا ترەنينگ ورتالىعى قۇرىلماق. سونداي-اق گەرمانيالىق كومپانيا تاراپىنان سولتۇستىك قازاقستان وبلىسىندا اۋىل شارۋاشىلىعى سالاسىندا قولدانىلاتىن تىركەمە تەحنيكاسىن وندىرەتىن زاۋىت سالۋ جوسپارلانىپ وتىر. رەسەيلىك كومپانيا تاراپىنان قوستاناي وبلىسىندا سەرىپپە جاسايتىن زاۋىت اشىلماق. تاعى ءبىر رەسەيلىك كومپانيا استانا قالاسىندا لوگيستيكالىق پارك سالۋعا نيەتتى كورىنەدى.
مينيسترلىكتىڭ حابارلاۋىنشا, رەلوكاتسيا جاساپ جاتقان شەتەلدىك كومپانيالار ەلىمىزدىڭ زاڭنامالارى مەن تالاپتارىن تولىق ورىنداپ جاتىر. ولار ءۇشىن قانداي دا ءبىر ارنايى جاعداي جاسالمايدى, ولاردىڭ كەڭسەلەرى مەن وندىرىستەرى ءبىزدىڭ ەلگە جالپى ەرەجەلەرگە سايكەس كوشىرىلىپ جاتىر دەپ ءتۇسىندىردى ۆەدومستۆو وكىلى.
سونىمەن قاتار مينيسترلىك وكىلى شەتەلدىك ينۆەستيتسيا تارتۋ بويىنشا ەلىمىزدىڭ ورتالىق ازيادا كوشباسشى ەكەنىن جانە ينۆەستورلاردىڭ ءبىزدىڭ ەلدى تاڭداۋى تارتىمدى ينۆەستيتسيالىق كليماتتىڭ تيىمدىلىگى ارقاسىندا مۇمكىن بولىپ وتىرعانىن جەتكىزدى.
«گەوساياسي جاعدايلارعا بايلانىستى ەۋرازيا كەڭىستىگىنەن كەتۋگە ءماجبۇر بولىپ وتىرعان شەتەلدىك كومپانيالارعا قازاقستانعا قونىس اۋدارۋ ءتيىمدى بولا وتىرىپ, ەلىمىزدىڭ حالىقارالىق ارەناداعى سىرتقى بەدەلىنىڭ وسۋىنە ايتارلىقتاي سەپتىگىن تيگىزىپ جاتىر», دەيدى ول.
2022 جىلدىڭ قورىتىندىسى بويىنشا ەلىمىزگە تارتىلعان تىكەلەي شەتەلدىك ينۆەستيتسيانىڭ جالپى كولەمى 28 ملرد دوللار بولعان. بۇل 2021 جىلعى كورسەتكىشتەن 17,7 پايىزعا ارتىق. 2022 جىلى شەتەلدىك ينۆەستورلاردىڭ قاتىسۋىمەن 46 ينۆەستيتسيالىق جوبا ىسكە قوسىلدى. جالپى, 1,74 ترلن تەڭگە ينۆەستيتسيا تارتىلىپ, 6,2 مىڭ جۇمىس ورنى اشىلعان.