كەدەرگىگە كەزىككەن كاسىپكەرلىك

«وسى ورايدا شاعىن جانە ورتا بيزنەسكە قولداۋ كورسەتۋدىڭ بىرىڭعاي كەشەندى باعدارلاماسىن ازىرلەۋ قاجەت. ەڭ باستىسى, مەملەكەتتىك قولداۋعا يە بولاتىن جوبالاردى ىرىكتەۋ اشىق وتۋگە ءتيىس. جوبانىڭ ناقتى الەۋمەتتىك-ەكونوميكالىق تيىمدىلىگىن ەسكەرۋ قاجەت. ۇكىمەتكە دەپۋتاتتارمەن بىرلەسىپ, ورتا بيزنەستى دامىتۋدىڭ تىڭ تاسىلدەرىن ازىرلەۋدى تاپسىرامىن. ويتكەنى ورتا بيزنەس ەل ەكونوميكاسىن دامىتۋ ىسىندە باس­تى ءرول اتقارادى. بۇل ماسەلە مەنىڭ جەكە باقىلاۋىمدا بولادى», دەدى پرەزيدەنت.

بىراق جەرگىلىكتى جەردە كاسىپكەرلىك­تىڭ دامۋىنا كەدەرگى كەلتىرە­تىن توس­قاۋىل ءالى توقتار ەمەس. قۇددى كاسىپ­­كەرلەردى جورگەگىنەن تۇنشىق­تى­رۋعا باعىتتالعان قادام جاسالىپ وتىر­عانداي كورىنەدى. مۇنى كاسىپ­كەر­لەردىڭ وزدەرى دە جاسىرمايدى. كەدەرگىگە كەزىك­كەن ولار كۇن سايىن «اتامەكەن» ۇكپ-نىڭ وڭىرلىك فيليالىنا, سى­بايلاس جەمقورلىققا قارسى ءىس-قيمىل اگەنت­تىگىنىڭ اتىراۋ وبلىستىق دەپار­تامەنتىنە شاعىمدانادى.

اتالعان دەپارتامەنت باسشىسى ەرۇلان سەرىكقاليەۆتىڭ ايتۋىنشا, جەكە كاسىپكەرلەر مەن شاعىن كاسىپورىن باسشىلارىن, فەرمەرلەردى قىنجىلتاتىن جايت كوپ. ونىڭ ىشىندە ينجەنەرلىك جەلىلەردى جۇرگىزۋ, جەر تەلىمىن الۋ, كرە­ديتتىك سەرىكتەستىكتەردەن كەپىلدىك مۇ­لىك­تى قايتارۋ سەكىلدى ماسەلەلەر بار. شارۋا قوجالىقتارىنىڭ وكىلدەرى سۋبسيديالاۋ باعدارلاماسىنىڭ اشىقتىعى مەن قولجەتىمدى ەمەستىگىنە ناليدى. ويت­كەنى سۋبسيديالاردى بولۋدە كەزەك مەرزىمى ساقتالمايدى. كاسىپكەرلەر جەر ۋچاسكەلەرىنىڭ نىسانالى ماقساتىن وزگەرتۋ كەزىندە اكىمشىلىك كەدەرگىلەرگە تاپ بولىپ ءجۇر.

– بيىل مەملەكەت باسشىسىنىڭ تاپ­سىر­ماسىنا سايكەس كاسىپكەرلەردىڭ قۇ­قى­عىن قورعاۋ ءۇشىن «بيزنەسكە جول» جوباسى ىسكە قوسىلدى. ءبىز جوبا اياسىندا 250 كاسىپكەرمەن كەزدەسۋ وتكىزدىك. كاسىپكەرلەردەن 25 شاعىم ءتۇستى. سول شاعىمدارعا بايلانىستى سىبايلاس جەم­قورلىق دەرەكتەرىن جويۋ ءۇشىن ءتيىستى ءىس-شارالار قابىلدانىپ, 180-گە جۋىق كاسىپكەردىڭ قۇقىعى قالپىنا كەلتىرىلدى. دەپارتامەنتتىڭ ۇسىنىسىمەن 2 لاۋازىمدى تۇلعا تارتىپتىك جاۋاپكەرشىلىككە تارتىلدى, – دەيدى ەرۇلان سەرىكقاليەۆ.

ونىڭ دەرەگىنە سۇيەنسەك, «اتىراۋ وبلىسى سۋ ارناسى» كمك-نىڭ 99 كا­سىپ­كەر­لىك سۋبەكتىسىنە 739 ملن تەڭگە قارىز ەكەنى انىقتالعان. بۇل – كورسەتىلگەن قىزمەتتەر مەن تاۋارلاردى جەتكىزگەنى ءۇشىن تولەنبەي كەلگەن قارجىنىڭ جيىنتىعى.

«وسىعان بايلانىستى دەپارتامەنت پەن اكىمدىك ءتيىستى ءىس-شارالاردى قابىل­دادى. سونىڭ ناتيجەسىندە 49 كاسىپ­كەرلىك سۋبەكتىسىنە 587 ملن تەڭگە تو­لەندى. وسىلايشا, 49 كاسىپكەرلىك سۋبەك­تى­سىنىڭ قۇقىعى قورعالدى. ال وزگە 43 كا­سىپكەر «اگرارلىق نەسيە كورپوراتسياسى» اق-نىڭ اتىراۋ وبلىستىق فيليالىنا, «قۇرمانعازى», «يساتاي» نەسيەلىك سەرىكتەستىكتەرىنە بەرەشەگىن تولىعىمەن وتەگەن. الايدا كاسىپكەرلىك سۋبەكتىلەرىنە تيەسىلى, كەپىلدەگى م ۇلىككە قۇقىق بەلگى­لەي­تىن قۇجاتتارى قايتارىلماعان. اتال­­عان فيليال مەن نەسيەلىك سەرىك­تەس­تىكتەرگە 12 جوسىقسىز كاسىپكەرلىك سۋب­ەك­تىسىنىڭ ورتاق جاۋاپكەرشىلىككە باي­لا­نىستى بەرەشەگى قۇجاتتاردى قايتا­رۋ­دان باس تارتۋدىڭ سەبەبىنە اينالعان. دەپارتامەنت قىزمەتكەرلەرى وڭىرلىك فيليال باسشىلىعىنىڭ وڭ شەشىم قا­بىل­داۋىنا ىقپال ەتتى. كاسىپكەرلەرگە قۇ­قىق بەلگىلەيتىن قۇجاتتاردى قايتارۋ جۇرگىزىلىپ جاتىر», دەدى ە.سەرىكقاليەۆ.

كاسىپكەرلەردى تىعىرىققا تىرەيتىن كەدەرگى تەمىرجول سالاسىندا دا بار. دە­پارتامەنت باسشىسىنىڭ ءبىرىنشى ورىن­باسارى نۇرلان ءجاحيننىڭ ايتۋىنشا, كاسىپكەرلەر «تستس» اق-نىڭ تەمىرجول تۇيىعىنا ۆاگونداردى كىرگىزۋ مەن تۇراعى ءۇشىن الىم تولەۋگە ءماجبۇر. ال قۇجاتتاردى رەسىمدەۋ ۋاقىت پەن قو­سىم­شا شىعىندى تالاپ ەتەدى.

– بۇل كورسەتىلەتىن قىزمەتتى بەرۋشى­لەر­مەن ءجيى تىكەلەي بايلانىسقا اكەلىپ سوقتىراتىن سىبايلاس جەمقورلىقتىڭ العىشارتىن جاسايدى. مىنە, سول سەبەپتەن, اكىمشىلىك كەدەرگىلەر مەن بيۋروكراتيا ءالى دە بيزنەستىڭ دامۋىنا جول بەرمەي وتىر. كاسىپكەرلەر ءوز ماسەلەلەرىن شەشۋ ءۇشىن لاۋازىمدى ادامداردىڭ سوڭىنان جۇگىرمەۋى كەرەك. دەپارتامەنت قابىلداعان ءىس-شارالاردىڭ ناتيجەسىندە ءىرى تەمىرجول تۇيىعى يەلەرىمەن كەلىسىم جاساسۋ مەرزىمى ءبىر جىلعا, بىرجولعى كليەنتتەرمەن ءبىر كۇنتىزبەلىك ايعا ۇزار­تىل­دى. «قازاقستان تەمىرجولى» كومپانياسىنا اكىمشىلىك كەدەرگىلەردى جويۋعا باعىتتالعان 68 ۇسى­نىس ازىرلەندى, – دەپ ءتۇسىندىردى نۇرلان جاحين.

دەپارتامەنت وكىلىنىڭ ايتۋىنا قارا­عان­دا, جىلىوي اۋدانى اكىمدىگىنىڭ لاۋازىم يەلەرى «تەڭىز» ۆاحتالىق كەنتىندەگى جەر ۋچاسكەلەرىن اۋكتسيون ارقىلى ساۋدا-ساتتىققا قويماعان. ءسويتىپ, كاسىپكەرلەر ءۇشىن جاساندى اكىمشىلىك كەدەرگىلەر جاساعان.

جەر تەلىمىنە قاتىستى قۇجاتىن زاڭ­داستىرا الماي جۇرگەن كاسىپكەرلەر از ەمەس. سونىڭ ءبىرى – سالتانات جۇباەۆا. ونىڭ جەر تەلىمىنىڭ قۇجاتىن رەسىمدەۋگە تالپىنعانىنا ەكى جىلدان اسقان.

«ماعان بيزنەسكە ارنالعان جەر ۋچاسكەسى شەشەمنەن قالعان ەدى. ماقساتىم – سامسا ساتاتىن دۇڭگىرشەك اشۋ. الايدا مەنىڭ ۋچاسكەمدە باسقا بىرەۋ ويىن الاڭىن سالىپ قويىپتى. وسىعان بايلانىستى جەر قاتىناستارى بولىمىنە حابارلاسقانىمدا, ماعان باسقا جەر ۋچاسكەسىن ۇسىندى. بۇل ءۇشىن ماعان ساۋلەت بولىمىنەن جەر ۋچاس­كە­سىن الىپ قويۋ تۋرالى قۇجات اكەلۋىم قاجەت بولدى. بىراق بۇل قۇجاتتى ەكى جىلدان بەرى الا الماي ءجۇرمىن. اكىمدىككە اۋەلى ارىز, سودان كەيىن شاعىم جازدىم. بىراق ماسەلەم ءالى شەشىمىن تاپقان جوق», دەيدى س.جۇباەۆا.

ال سالىق قىزمەتكەرلەرىنىڭ WIPON CASHBACK باعدارلاماسىن پايدالا­نىپ, كاسىپكەرلەردى زاڭسىز تەكسەر­گەنى انىقتالىپ وتىر. قازاقستان كاسىپ­كەر­لەرىنىڭ قۇقىقتارىن قورعاۋ جونىن­دە­گى اتىراۋ وبلىسى بويىنشا ۋاكىل سەك­تو­رى­نىڭ مەڭگەرۋشىسى, وڭىرلىك كاسىپ­كەر­لەر پالاتاسى ديرەكتورىنىڭ ورىنباسارى سارسەنباي جولدىباەۆتىڭ ايتۋىنشا, بيزنەس سۋبەكتىلەرىنەن جاپپاي ءوتىنىش تۇسكەن. وسىعان بايلانىستى وبلىستىق مەملەكەتتىك كىرىستەر دەپارتامەنتىنە حات جولدانعان.

بۇل ماسەلە ىڭ-شىڭسىز قالعان جوق. اسىرەسە بيزنەس سۋبەكتىلەرى اراسىن­دا الاڭداۋشىلىق تۋدىردى. ويتكەنى سالىق قىز­مەتكەرلەرىنىڭ تەكسەرۋ قورىتىن­دى­سى­مەن 1 مىڭنان استام كاسىپكەر ساتىپ الۋشىلارعا فيسكالدىق چەك بەرمەگەنى ءۇشىن جاۋاپقا تارتىلعان.

ء«بىز مەملەكەتتىك كىرىستەر دەپارتا­مەن­تىنەن «ازاماتتىق باقىلاۋ – چەك تالاپ ەت» اكتسياسى وتكىزىلدى. اكتسيا شەڭبەرىندە تۇرعىنداردان WIPON CASHBACK قوسىمشاسى ارقىلى فيسكالدىق چەكتەردى بەرمەگەنى ءۇشىن كاسىپكەرلەرگە قاتىستى 1067 شاعىم ءتۇستى» دەگەن جاۋاپ الدىق. تۇرعىندار وسىنداي تىركەلگەن ءاربىر دەرەك ءۇشىن ءبىر مىڭ تەڭگە كولەمىندە سىياقى العان. سالىق قىزمەتكەرلەرى جۇرگىزگەن تەكسەرۋدىڭ قورىتىندىسىمەن 508 بيزنەس سۋبەكتىسى جاۋاپكەرشىلىككە تارتىلىپ, 429 كاسىپكەر ەسكەرتۋ العان. ال 79 كاسىپكەرگە ايىپپۇل سالىنعان. بۇل ماسەلەنى كاسىپكەرلەر قازاقستاننىڭ بيزنەس-ومبۋدسمەنى رۋستام ءجۇرسىنوۆتىڭ وڭىرگە ساپارى كەزىندە كوتەرگەن بولاتىن. مەملەكەتتىك كىرىستەر دەپارتامەنتى قىز­مەت­كەرلەرىنىڭ ءىس-ارەكەتى قانشالىقتى زاڭدى ەكەنىن ءبىلۋ ءۇشىن پروكۋراتۋراعا جۇگىندىك. سەبەبى بۇل دەرەكتەردىڭ قالاي تىركەلگەنى بەلگىسىز», دەيدى سارسەنباي جولدىباەۆ.

وبلىستىق پروكۋراتۋرانىڭ باسقارما پروكۋرورى بەردىبەك جولاننىڭ ايتۋىنشا, مەملەكەتتىك كىرىستەر دەپارتامەنتىنىڭ قىزمەتكەرلەرى 852 كاسىپكەرگە فيسكالدىق چەك بەرمەگەنى ءۇشىن اكىمشىلىك حاتتاما تولتىرعانى انىقتالعان. كاسىپكەردىڭ ءبارى جاۋاپكەرشىلىككە تارتىلعان.

– جۇرگىزىلگەن تەكسەرۋ مەملەكەتتىك قىزمەتشىلەردىڭ بۇل ارەكەتىنىڭ زاڭسىز ەكەنىن كورسەتتى. ويتكەنى مۇنداي تەكسەرۋلەر باس پروكۋراتۋرانىڭ سايتىندا تىركەلمەگەن. وسىلايشا, بيزنەستى تەكسەرۋگە ءموراتوريدى اينالىپ ءوتىپ, كاسىپ­كەرلەردەن تۇسىنىكتەمە العان. بۇل دا زاڭسىز بولىپ سانالادى. WIPON CASHBACK قوسىمشاسى ارقىلى تۇسكەن وتىنىشتەرگە تالداۋ جۇرگىزىلدى. تالداۋ كەزىندە دەپارتامەنت قىزمەتكەرلەرىنىڭ ءبىرى كاسىپكەرلەردىڭ فيسكالدىق چەكتەردى بەرمەگەنى تۋرالى حابارلامالارى ءۇشىن 51 مىڭ تەڭگە كولەمىندە سىياقى العان. وسىعان بايلانىستى اكىمشىلىك حاتتاما بويىنشا نارازىلىق اكتىلەرى ەنگىزىلىپ جاتىر. سوت شەشىمىمەن مەملەكەتتىك كىرىستەر دەپارتامەنتى قىزمەتكەرلەرىنىڭ ارەكەتى زاڭسىز دەپ تانىلدى. جالپى, تەكسەرۋ كورسەتكەندەي, WIPON CASHBACK باعدارلاماسى بيزنەستى تەكسەرۋدىڭ زاڭسىز ءتاسىلى رەتىندە پايدالانىلعان, – دەيدى بەردىبەك جولان.

سالىق قىزمەتكەرلەرىنىڭ زاڭسىز ارەكەتكە بارعانىن قۇقىقتىق ستاتيستيكا جانە ارنايى ەسەپكە الۋ كوميتەتى باسقار­ما­سىنىڭ اعا پروكۋرورى ءمادي تۇگىباەۆ تا راستادى. ونىڭ ايتۋىنشا, جوعا­رىدا اتالعان دەرەكتەر كاسىپكەر­لەر­دىڭ قۇقىقتارىن ورەسكەل بۇزۋ بولىپ سانالادى. ەگەر تەكسەرۋلەر ستاتيستيكا ورگاندارىندا ەسەپكە الىنباي جۇرگىزىلسە, ونىڭ قورىتىندىسى بويىنشا شىعارىلعان بارلىق شەشىمنىڭ كۇشى جويىلۋعا ءتيىس. سوندىقتان باسقارما پروكۋرورلارى وسى ماسەلە بويىنشا سوت ۇدەرىستەرىنە ءۇشىنشى تاراپ رەتىندە قاتىسادى.

«بىزگە كوميتەتتەن WIPON CASHBACK قو­سىمشاسى بويىنشا جۇ­مىس ىستەۋ تۋرالى حات كەلدى. ال ازامات­تار­­دىڭ شاعىمى پورتالعا تۇسەدى. ءبىز بىردەن ايىپپۇل سالمايمىز. الدىمەن كاسىپكەرلەردى شاقىرىپ, چەك بەرىلگەنىن نەمەسە بەرىلمەگەنىن سۇرايمىز. كاسىپكەر­لەر­دىڭ كوبى چەك بەرمەگەنىن راستادى. سوندىقتان ءبىز حاتتاما رەسىمدەدىك. قازىر قو­سىمشانىڭ جۇمىسى توقتاتىلدى. ەندى وتىنىشتەر قابىلدانبايدى», دەدى اتى­راۋ قالالىق مەملەكەتتىك كىرىستەر باسقارماسى باسشىسىنىڭ ورىنباسارى ازامات ماداليەۆ.

بيىل اقپاندا وبلىستىق مەملەكەتتىك كىرىس­تەر دەپارتامەنتى «Studbolt Manu­factoring» جشس-دان سوڭعى ءۇش جىل ءۇشىن جالپى سوماسى 15 ملن تەڭگەنىڭ قو­سىمشا سالىعىن تولەۋدى تالاپ ەتكەن. بۇل قانشالىقتى زاڭدى؟ وبلىس پروكۋرورى باۋىرجان جۇماقانوۆقا سەرىكتەستىكتىڭ باس ديرەكتورى ساكەن مۇراتوۆ وسىنداي ساۋالمەن جۇگىندى.

ء«بىز بولتتى قوسىلىستاردى شىعا­را­مىز. بۇعان قوسا قۇبىر ماتەريالدارىن جەتكىزەمىز. قازىر «قاراشىعاناق پەترولەۋم وپەرەيتينگ» (كپو) كوم­پا­نيا­سىنىڭ تاپسىرىسىن جەتكىزۋگە بايلانىستى پروبلەما تۋىندادى. 1997 جىلى قازاقستان ۇكىمەتى مەن كپو اراسىندا ءونىمدى ءبولىسۋ تۋرالى كەلىسىمگە قول قويىلعاندىقتان, مەملەكەتتىك كىرىس­تەر دەپارتامەنتى بىزگە 15 ملن تەڭگە سا­لىقتى قوسىمشا ەسەپتەگىسى كەلەدى. سوعان سايكەس كپو كومپانياسىنا تاۋارلاردى يمپورتتاۋ كەزىندە باسقا دا كەدەندىك مولشەرلەمەلەر ەسكەرىلۋگە ءتيىس. بۇدان ءبىز دە, ءبىزدىڭ تاۋارلاردى كەدەندىك رەسىمدەۋمەن اينالىساتىن بروكەرلىك كومپانيا دا حابارسىز بولدىق. ولار «استانا – 1» باعدارلاماسىنان مولشەرلەمەلەر الادى. مولشەرلەمە 10 پايىزدى قۇرايدى. ونى الدەقاشان تولەدىك. ءبىز سالىقتى ۋاقىتىندا تولەپ كەلەمىز. ەندى دەپارتامەنت 1997 جىلعى كەلىسىمگە سايكەس 20% سالىق تولەۋىمىزدى تالاپ ەتىپ وتىر. الايدا بۇل كەلىسىم اشىق دەرەك كوزدە جوق. ءبىز بۇل تۋرالى قايدان بىلەمىز؟ ءبىز وسى تاپسىرىس­تار بويىنشا ءۇش جىلدا 8 ملن تەڭگە تابىس تاپتىق دەپ ەسەپتەدىك. ەندى 15 ملن تەڭگەگە قوسىمشا سالىق ەسەپتەلىپ وتىر. مەنىڭ ويىمشا, بۇل – كەدەن ورگاندارىنىڭ قاتەلىگى. ويتكەنى ولار بۇل اقپاراتتى بروكەرلەرگە, تاۋار جەتكىزۋشىلەرگە ۋاقتىلى حابارلامايدى», دەيدى ساكەن مۇراتوۆ.

ءدال وسى كەلىسىم بروكەرلىك قىزمەت كورسەتەتىن «Ctcs Logistics» جشس ءۇشىن پروبلەماعا اينالىپ وتىر. سەرىكتەستىك ديرەكتورى ۆيتالي يۋننىڭ مالىمەتىنشە, بروكەرلىك قىزمەتكە جۇگىنگەن كليەنتكە باتىس قازاقستان وبلىستىق مەملەكەتتىك كىرىستەر دەپارتامەنتى حابارلاما بەرگەن.

ء«بىزدىڭ كليەنتىمىزگە باتىس قازاقستان وبلىستىق مەملەكەتتىك كىرىستەر دەپارتا­مەنتى 145 ملن تەڭگەنىڭ سالىعىن ەسەپتەدى. تەكسەرۋ قورىتىندىسىمەن كليەنتىمىزدىڭ تاۋارلارى 1997 جىلعى ءونىمدى ءبولىسۋ تۋرالى كەلىسىمگە سايكەس كەدەندىك تولەمدەردى ەسەپتەۋگە جاتاتىنى بەلگىلى بولدى. بىزگە بۇل تۋرالى 2022 جىلعى 8 قاراشادا حابارلاما ءتۇستى. ال ءبىر كۇننەن كەيىن, 9 قاراشادا ءبىرىنشى ساتىداعى سوتتىڭ شەشىمى شىقتى. ءبىز باس پروكۋراتۋراعا جانە «اتامەكەن» ۇلتتىق كاسىپكەرلەر پالاتاسىنا شاعىم بەردىك», دەدى سەرىكتەستىك ديرەكتورى ۆيتالي يۋن.

پروكۋراتۋرا دا كاسىپكەرلەر قۇ­قىعىن قورعاۋعا باسا ءمان بەرىپ وتىر. ماسەلەن, قۇرمانعازى اۋدانىنىڭ پروكۋراتۋراسى ورتالىق اۋرۋحانا تاراپىنان 80 كاسىپكەرگە قارجى اۋدارماعانىن انىقتادى. اۋداندىق اۋرۋحانا قىزمەتىنە جۇرگىزىلگەن تالداۋدىڭ قورىتىندىسىندا كاسىپكەرلەردىڭ ءوز مىندەتتەرىن تولىق ورىنداعانىنا قاراماستان, تاپسىرىس بەرۋشىنىڭ شارتتا بەلگىلەنگەن تارتىپپەن جانە مەرزىمدە تولەم جۇرگىزبەگەنى انىق­تالدى. پروكۋرورلىق ىقپال ەتۋ ءىس-شا­را­لارى ارقىلى 80 كاسىپكەردىڭ الدىندا جالپى سوماسى 168 ملن 486 مىڭ 177 تەڭگە بەرەشەك تولىعىمەن ءوندىرىلدى.

«پروكۋرورلىق قاداعالاۋدىڭ باسىم باعىتتارىنىڭ ءبىرى – كاسىپكەرلىك سۋبەكتىلەرىنىڭ قۇقىقتارى مەن زاڭدى مۇددەلەرىن قورعاۋ. قازىر اۋداندىق پروكۋراتۋرادا ءموبيلدى توپ قۇرىلدى. ءموبيلدى توپ كەز كەلگەن كاسىپكەردىڭ قۇقىقتارى مەن زاڭدى مۇددەسى بۇ­زىلۋىنا بايلانىستى وتىنىشتەرىن قا­راي­دى. اۋداندا تۇرمىستىق قاتتى قالدىقتاردى جيناۋ قىزمەتىنە كا­سىپكەرلەر ءۇشىن ورتاق تاريف زاڭسىز بەكىتىلگەنى انىقتالدى. اتاپ ايتقاندا, ەكولوگيا كودەكسىنىڭ 367-بابىندا كا­سىپكەرلەر ءۇشىن تۇرمىستىق قاتتى قالدىقتاردى جيناۋ جانە تاسىمال­داۋ­عا تاريف بەكىتۋ كوزدەلمەگەن. تاراپتار اراسىندا جاسالعان كەلىسىمشارتقا ساي­كەس تولەنەدى. الايدا اۋداندىق ءماس­ليحات شەشىمىمەن كاسىپكەرلەر ءۇشىن تاريف زاڭسىز بەكىتىلىپ, اۋدانداعى 281 زاڭدى تۇلعا مەن 2 405 جەكە كاسىپكەردىڭ قۇقىقتارى بۇزىلعان. پروكۋرورلىق قاداعالاۋ اكتىسىمەن ءماسليحات شەشىمى زاڭعا سايكەستەندىرىلىپ, كاسىپكەرلەردىڭ بۇزىلعان قۇقىعى قورعالدى», دەيدى اۋدان­ پروكۋرورى ماگيلان راحيموۆ.

مەملەكەت كاسىپكەرلەرگە وتاندىق ەكو­نوميكانى ارتاراپتاندىرۋعا سەرپىن بەرىپ, شاعىن جانە ورتا كاسىپكەرلىكتىڭ كوكجيەگىن كەڭەيتەدى دەپ ءۇمىت ارتىپ وتىر. الايدا ءتۇرلى كەدەرگىگە كەزىككەن كاسىپكەرلەر ادىمىن اشا الار ەمەس. ءبارى دە – اكىمشىلىك كەدەرگى. ونىڭ دەنى مەملەكەتتىك قىزمەتتىڭ تاراپىنان جاسالاتىنى, كاسىپكەرلەردىڭ شاعىمى ۋا­قى­تىن­دا شەشىمىن تاپپايتىنى وكىنىشتى-اق.

اتىراۋ وبلىسى