تالاي بريفينگتى كورىپ جۇرگەن جۋرناليستەر بۇل جولعى باسقوسۋعا ايرىقشا اسىققانداي كورىندى. ونىڭ وزىندىك سەبەبى دە بار ەدى. اقمولا وبلىستىق ىشكى ىستەر دەپارتامەنتىنىڭ باستىعى, پوليتسيا گەنەرال مايورى جايلاۋبەك حالىق ۇلى كۇنى كەشە قۇرىقتالعان ناركوشابارمان مەن ول وبلىس اۋماعىمەن الىپ وتپەك بولعان ءىرى كولەمدەگى ەسىرتكى جايىندا كەڭىنەن اڭگىمەلەپ بەرۋ نيەتىندە ەكەن. تاركىلەنگەن تازا گەرويننىڭ سالماعى 9 كيلو 362 گرامدى قۇرايدى. بۇل وڭىردە بۇرىن-سوڭدى بولماعان توتەنشە وقيعا رەتىندە تىركەلگەن.
گەنەرال بىزگە 2 شىلدە كۇنگى 22.00 ساعات شاماسىندا, جەدەل ىزدەستىرۋ شارالارى بارىسىندا, «قاراعاندى – استانا» كۇرە جولىنىڭ بويىنداعى ارشالى كەنتىنە جاقىن ماڭايدا «فولسكۆاگەن-گولف» جەڭىل كولىگىنىڭ توقتاتىلعانىن حابارلادى. «لادا» اتتى قىزمەتتىك-ىزدەستىرۋ ءيتىنىڭ كومەگىمەن كولىكتى ءتىنتۋ بارىسىندا ءبىر-بىرىنە مۇقيات جاپسىرىلعان 9 ۆەلوسيپەد دوڭعالاعى تاركىلەنگەن. ولاردى اشىپ قاراعاندا اقسۇر ءتۇستى, وزىندىك ءيىسى بار ۇنتاق تابىلدى. سوت-مەديتسينالىق ساراپتامانىڭ قورىتىندىسى بۇل زاتتىڭ اسا قاتتى اسەر ەتەتىن «گەروين» ەكەندىگىن انىقتاعان. وسى رەتتە گەرويننىڭ ءار گرامىنىڭ «قارا بازارداعى» قۇنى 1000 تەڭگەدەن ەكەندىگى ايتىلدى.
تەكسەرىس بارىسىندا جەكە كولىك جۇرگىزۋشىسى, 1987 جىلى تۋعان ناركوشابارمان قىرعىز رەسپۋبليكاسى ىستىقكول وبلىسىنىڭ قىزىل سۋ اۋىلىنىڭ تۇرعىنى بولىپ شىقتى. ول رەسەي فەدەراتسياسىنىڭ قورعان قالاسىنا باعىت الىپ بارا جاتىر ەكەن. اتالعان وقيعاعا بايلانىستى قر قك 259-بابىنىڭ 3-بولىمىمەن (ەسىرتكى زاتتارىن زاڭسىز تاسىمالداۋ) قىلمىستىق ءىس قوزعالىپ, قىرعىزستان ازاماتى ۋاقىتشا وقشاۋلاۋ ورنىنا قامالدى.
وسى ورايدا, جىل باسىنان بەرى وبلىس اۋماعىندا 45 جەدەل-ىزدەستىرۋ شارالارى وتكىزىلىپ, 104 ەسىرتكى قىلمىسى انىقتالعانىن ايتا كەتكىمىز كەلەدى. سونداي-اق, ەسىرتكىنى زاڭسى ساقتاعانى ءۇشىن 211 اكىمشىلىك ءىس قوزعالىپ, ەسىرتكى قولدانىپ كولىك جۇرگىزگەن 60 ادام ۇستالعان.
باقبەرگەن امالبەك,
«ەگەمەن قازاقستان».
اقمولا وبلىسى.