اتتەستاتتاۋ: سىناق پا, ءسۇرىندىرۋ مە؟

سەبەپسىز سالدار بولمايدى دەگەن بار. ءوزىمىزدىڭ نەدەن سورلاپ جاتقانىمىزدى ءبىلىپ وتىرمىز. بۇعان سەبەپ – اعىلشىن تىلىنەن سوزبە-ءسوز, ساپاسىز اۋدارىلعان وقى­تۋ ادىستەمەسى ەكەنى انىق. بى­رەۋ­لەر ساناتتاۋدىڭ جاڭا ەرە­جەسى ەنگىزىلگەلى اتتاي 5 جىل وتكەن جوق پا دەۋى دە مۇم­كىن. سولاي ەكەنى دە راس. بىراق باستاپقى كەزدە وقىتۋ ادىس­تەمەسىنىڭ شەكتى بالى كوڭىلگە قونىمدى بولدى. 2021 جىلى پەداگوگ-شەبەر ساناتىن الۋ ءۇشىن ادىستەمەدەن 30 تەست تاپ­سىرماسىنىڭ 14-ءىن شەشسە جەتكىلىكتى ەدى.

كەيىن جاعداي بىرتىندەپ وزگەرە باستادى. سول كەزدەگى ءبىلىم جانە عىلىم مينيسترلىگى 2021 جىلدىڭ كوكتەمىندە تالاپتى جوعارىلاتىپ, پەداگوگ-مودەراتور – 18, پەداگوگ-ساراپشى – 21, پەداگوگ-زەرتتەۋشى – 24, پەداگوگ-شەبەر 27 بالل جيناۋى كەرەك ەكەنىن قۇلاققاعىس قىلا باستادى. سول كەزدە مەن الەۋمەتتىك جەلىدە مۇنداي وز­گەرىستىڭ سالدارى جاقسى بول­ماي­تىنىن تالداپ جازدىم. الاي­دا جانايقايىما قۇزىرلى مينيسترلىك تاراپىنان جاۋاپ بولعان جوق.

كەلەسى جىلى وقىتۋ ادىستە­مەسىنىڭ شەكتى بالى تاعى وزگەر­دى. بۇرىن پەداگوگ-مودەراتور بولۋ ءۇشىن 30 تاپسىرما­نىڭ 9-ىن شەشۋ جەتكىلىكتى بولسا, ەندى 12 بالل جيناۋ قاجەت بولدى. پەداگوگ-ساراپشىنىڭ ۇپايى 11-دەن 15-كە وزگەردى. پەداگوگ-زەرتتەۋشىنىڭ بالى 12-دەن 18-گە كوتەرىلدى. پەداگوگ-شەبەرلەر ەندى 30 بالدىڭ 21-ءىن الۋى شارت بولدى.

وقۋ-اعارتۋ مينيسترلىگى 2022 جىلدىڭ كۇزىندە مۇعا­لىم­دەردىڭ ءوز ءپانىنىڭ تەست تاپسىر­ماسىنىڭ ديستراكتورىن ازايتىپ, ءبىر جاۋاپتى ەتتى. ال ادىس­­­تەمەنىڭ 30 بالدىق تاپسىر­­­ماسىن 20-عا تۇسىرگەن­مەن, شەكتى بالى كۇرت كوتەرىلدى. ەندىگى جەردە پەداگوگتەر وقىتۋ ادىس­تەمەسىنەن مىناداي مەجەنى باعىندىرۋ قاجەت بولدى: پەداگوگ-مودەراتور – 20/12, پەداگوگ-ساراپشى – 20/14, پەداگوگ-زەرتتەۋشى – 20/16, پەداگوگ-شەبەر – 20/18.

وزدەرىڭىز دە بايقاعان شى­عارسىزدار, ەكى جىلدىڭ ىشىندە تالاپ ەكى ەسە جوعارىلادى. 2021 جىلى پەداگوگ-زەرتتەۋشى مەتوديكادان 30 بالدىڭ 12-ءسىن, ياعني, 40 پايىزىن جيناۋى كەرەك بولاتىن. قازىر 20 تاپ­سىرمانىڭ 16-سىنىڭ ءدال جاۋا­­بىن كورسەتىپ, 80 پايىزىن ءبىلۋى كەرەك.

بۇل ارەكەتتى پەداگوگتەرگە جاسالعان قيانات دەگەن دۇرىس بولار. ويتكەنى مۇعالىمدەر ءب­ىرىنشى كاسىبي جەتىستىك­تەرى جي­ناقتالعان پورتفوليو تاپ­سىرادى. سونىڭ وزىنە دە قويى­لىپ وتىرعان شارتتار جەڭىل ەمەس. وقۋ-اعارتۋ مي­نيستر­­لىگى اتتەس­تاتتاۋدى مەي­لىن­شە ساراپتاپ, جۇيەلى, اقىل­عا قونىمدى ەتىپ جۇرگىزسە دەي­مىز. قىسقاسى, اعىلشىن تىلى­نەن شالا­عاي اۋدارىلعان ەكلەك­تيكالىق ادىستەمەنى الىپ تاس­تاپ, پەداگوگتەرگە كاسىبي جەتىس­تىكتەرى مەن ءوز ءپانى بويىنشا تەوريا­لىق ءبىلىمىنىڭ ناتيجەسى نەگىزىندە سانات بەرۋ كەرەك دەپ ەسەپتەيمىن.

ادامنىڭ بارلىق جاعىنان جولىن جاۋىپ, مۇمكىندىكسىز قالدىرۋدى الەۋمەتتانۋدا «دەپ­ريۆاتسيا» دەيدى. قازىرگى مۇعالىمدەردىڭ بىلىكتىلىك ساناتىن كوتەرۋگە قويىلىپ وتىر­عان تالاپ وسىنداي بولماسا ەكەن دەپ قام جەيمىز.

سەرىك زياتوۆ,

تاريح ءپانىنىڭ مۇعالىمى

باتىس قازاقستان وبلىسى,

سىرىم اۋدانى