زاعيپ جانە ناشار كورەتىن ازاماتتارعا ارنالعان كىتاپحانا قورى 8282 دانا كىتاپپەن تولىقتى, دەپ حابارلايدى Egemen.kz مادانيەت جانە سپورت مينيسترلىگى ءباسپاسوز قىزمەتىنە سىلتەمە جاساپ.
وتكەن جىلى الماتىداعى زاعيپ جانە ناشار كورەتىن ازاماتتارعا ارنالعان رەسپۋبليكالىق كىتاپحانا قورى 8282 دانا كىتاپپەن تولىقتى. ونىڭ ىشىندە 1149 داناسى بالالار ادەبيەتى.
سونداي-اق 2022 جىلى كىتاپحانا جارتىلاي ونەركاسىپتىك برايل پرينتەرلەرى مەن برايل ديسپلەيلەرىن ساتىپ الدى. وسىنىڭ ناتيجەسىندە مر3 فورماتتا 17 كىتاپ دىبىستالىپ, 22 كىتاپ نۇكتەلى-بەدەرلى قارىپتە باسىپ شىعارىلدى.
كىتاپحانانىڭ 3000-عا جۋىق وقىرمانى بار, كىتاپ قورى 260 مىڭنان اسادى. ونىڭ ىشىندە كوركەم ادەبيەت, كلاسسيكالىق جانە قازىرگى زامان ادەبيەتى, وتاندىق جانە شەتەلدىك اۆتورلار, پوەزيا, فانتاستيكا جانە باسقا دا باعىتتاعى باسىلىمدار بار.
ء«بىز ءوز وقىرماندارىمىزعا كىتاپحانادا عانا ەمەس, ۇيدە دە قىزمەت كورسەتەمىز. ءبىزدىڭ وسىندا كەلەتىن مۇمكىندىگى جوق 45 وقىرمانىمىز بار. ولار بىزگە كەرەك كىتاپتارىن تەلەفون ارقىلى تاپسىرىس بەرەدى. ءبىز ءار اپتانىڭ سارسەنبىسىندە ۇيلەرىنە جەتكىزىپ بەرەمىز», دەدى كىتاپ قورىن ساقتاۋ جانە ابونەمەنت ءبولىمىنىڭ قىزمەتكەرى نازىم ارىنبەكوۆا.
بۇگىندە كىتاپحانا ەرەكشە قاجەتتىلىگى بار وقىرمانداردىڭ رۋحاني قارىم-قاتىناسىن نىعايتىپ, بوس ۋاقىتىن ءتيىمدى وتكىزۋگە ارنالعان جانە ءتۇرلى بۇقارالىق ءىس-شارالارعا قاتىساتىن ورتالىق بولىپ سانالادى. مۇندا تەك زاعيپ وقىرماندارعا عانا ەمەس, سەزۋ, ەستۋ قابىلەتى تومەن جاندارعا دا باسقا كىتاپحانالار كورسەتە المايتىن قىزمەت تۇرلەرى قولجەتىمدى.