جاڭاوزەندەگى جارىلىستان كەيىن ۇيىندىلەردىڭ استىنان 2000 جىلى تۋعان زارداپ شەككەن ايەل جانە 1994 جىلى تۋعان قايتىس بولعان ازاماتتىڭ ءمايىتى تابىلدى, دەپ حابارلايدى Egemen.kz.
«قازىرگى ۋاقىتتا ۇيىندىلەردىڭ استىنان 2000 جىلى تۋعان زارداپ شەككەن ايەل جانە 1994 جىلى تۋعان قايتىس بولعان ازاماتتىڭ ءمايىتى تابىلدى. مەديتسينالىق كومەككە 12 ادام جۇگىندى, ونىڭ ىشىندە 8 بالا. 5 ادام اۋرۋحاناعا جاتقىزىلدى», دەلىنگەن تجم حابارلاماسىندا.
ۇيىندىلەردى تالداۋ بويىنشا جەدەل جۇمىستار جالعاسىپ جاتىر. 30-دان استام تەحنيكا مەن 300-گە جۋىق ادام جۇمىلدىرىلدى. اتاپ ايتقاندا, قۇتقارۋشىلار, ونىڭ ىشىندە كينولوگيالىق ەسەپ, ۇلتتىق ۇلاننىڭ اسكەري قىزمەتشىلەرى, جەرگىلىكتى اتقارۋشى ورگاندار, جەدەل مەديتسينالىق كومەك, پوليتسيا كومەككە كەلدى.
ەسكە سالايىق, 17 ءساۋىر كۇنى تاڭعى بەستەر شاماسىندا جاڭاوزەندەگى ەكى پودەزدى 12 پاتەرلى تۇرعىن ۇيدە گاز باللونى جارىلعان بولاتىن. ءبىر كىرەبەرىس قۇلاعاندا 11 ادام زارداپ شەكتى.
كەيىنىرەك جاڭاوزەندەگى جارىلىسقا بايلانىستى جەدەل شتاب قۇرىلىپ, جەدەل جەلى تەلەفونى اشىلدى 8/7292/31-90-99.