اتا-بابادان مۇرا بولىپ كەلگەن ءتورت ت ۇلىكتىڭ پاديشاسى جىلقى جانۋارىنىڭ ءا.قاستەەۆ اتىنداعى ونەر مۋزەيىنىڭ كەڭ زالىنا ءۇيىر-ۇيىرىمەن جوسىلا كەلگەن ءساتىن الماتىلىقتار العاش رەت كوردى. «ىشسە – سۋسىن, جەسە – ازىق, مىنسە – كولىك» قامبار اتا ت ۇلىگى قىلقالام شەبەرلەرىنىڭ سۋرەتتەۋىندە ءار قىرىنان اشىلىپ, ءبىر تاقىرىپتى جىرلاۋدىڭ مۇنشاما مول باي ۇلگىسىنە ەرىكسىز ءتانتى بولدى. جاعالاتا ىلىنگەن كارتينالارداعى مولدىرەگەن جىلقىنىڭ جانارىنا قاراعان ادامنىڭ بويىنا قانات ءبىتىپ, جۇرەگىندە رۋح وياندى. باۋىر ەتى بالاسىنا «ق ۇلىنىم» دەپ ەمىرەنگەن قازاق پەن جىلقىنىڭ ورتاق قاسيەتىن, جاقىندىعىن سەزىندىرگەن كورمە «Izder Iv/پەرىشتە ءىزى» دەپ اتالادى.
كورمە قازاقستاننىڭ ەڭبەك سىڭىرگەن قايراتكەرى, پروفەسسور جۇماقىن قايرامباەۆتىڭ 70 جاسقا تولعان مەرەيتويىنا وراي وتكىزىلىپ وتىر. قازاقستان بەينەلەۋ ونەرىندەگى كورنەكتى تۇلعا, ايتۋلى ۇستاز ج.قايرامباەۆتىڭ ەسىمى بۇگىنگى تاڭدا بارشاعا تانىمال. ول قىرىق ءۇش جىلدان استام ۋاقىت ارالىعىندا ت.جۇرگەنوۆ اتىنداعى ونەر اكادەمياسىندا ۇستازدىق قىزمەت اتقارىپ, 150-دەن استام شاكىرت تاربيەلەگەن. ونىڭ شەبەرحاناسىنان شىققان ءاربىر سۋرەتشى ونەردە ءوز جولىن تاپقان, قازاق ونەرىن ەلىمىزدە عانا ەمەس, سونىمەن قاتار الەمدىك الاڭداردا تانىتىپ جۇرگەن شەبەرلەر. «شاكىرتتەرىمنىڭ ۇلكەنى جاقىندا زەينەتكە شىقتى, ال كىشىسى – 30-دا. ءبىزدىڭ «ىزدەر» شىعارماشىلىق توبىنىڭ ءىزى قازاق بەينەلەۋ ونەرىندە سايراپ جاتىر دەپ ويلايمىن. 70-كە كەلگەنىمدە وسىنداي كەڭ كولەمدى كورمە ۇيىمداستىرىلىپ جاتقانىنا ريزامىن», دەپ شاكىرتتەرىنە شىن كوڭىلمەن تەبىرەنىسىن ءبىلدىردى.
كورمەنىڭ «پەرىشتە ءىزى» اتاۋى تەرەڭ مانگە يە. اتا-بابالارىمىز تۇلپار تۇياعىنىڭ ءىزى قالعان ءبىر ۋىس توپىراقتى «پەرىشتە ءىزى» دەپ اتاعان. وسى توپىراقتان ىرىمداپ بەسىكتەگى نارەستەنىڭ جاستىعىنىڭ استىنا سالعان. كەيدە ونىڭ ەمدىك قاسيەتى بار دەپ, جاڭا تۋعان شاقالاقتى شومىلدىراتىن سۋعا دا قوسىپ وتىرعان. قازاق حالقى ءۇشىن جىلقىنىڭ ورنى ەرەكشە بولعانىنىڭ دالەلى, ەلىمىزدىڭ ءار ايماعىنداعى تاۋلاردا جىلقىنىڭ بەينەسى كەسكىندەلگەن تاستاردىڭ ساقتالعانى. وسى سياقتى جىلقى تۇياعىنىڭ ءىزى بەينەلەنگەن تاستاردى بارلىق جەردە «تۇلپارتاس» دەپ اتاعان.
كورمەنىڭ ەرەكشەلىگى – العاش رەت قازاقستان بەينەلەۋ ونەرى تاريحىندا قازاق ءۇشىن قاسيەتتى جىلقى جانۋارىنا ارنايى كورمە ارنالىپ, تەرەڭ قامتىلۋى. عاسىرلار بويى جىلقى ادامنىڭ ەڭ جاقىن سەرىگى, تۇلپارى, ونىڭ ءومىرىنىڭ اجىراماس بولىگى بولعانى دالەل. كوركەم تۋىندىلاردىڭ بارلىعى كورمەگە ارنايى جازىلىپ, «رەاليزمنەن» باستاپ, ءتۇرلى زاماناۋي باعىتتاردى دا قامتيدى.
تاريحى 2003 جىلدان باستالاتىن «Izder»-ءدىڭ العاشقى كورمەسى ءا.قاستەەۆ اتىنداعى ونەر مۋزەيىندە ءوتتى. ارادا جيىرما جىلدان كەيىن بيىل ءتورتىنشى كورمەسى ۇيىمداستىرىلىپ وتىر. كورمەگە ۇستازدىڭ 20 شاكىرتىنىڭ جالپى سانى 55 تۋىندىسى ءبىر كەڭىستىكتە ۇسىنىلدى. ۇلتتىق سۋرەت ونەرىنىڭ جارقىن شىعارماشىلىق تۇلعالارىنا اينالعان دوسبول قاسىموۆ, مەيىرجان نۇرعوجين, تالعات تىلەۋجانوۆ, ازات تابيەۆ, ساۋلە دۇيسەنبينا, اسەمقۇل بەيبىت, نۇراحمەت نۇربول, وراقباي الماس, باقىت سەيسەنحان ۇلى, الماس نۇرعوجاەۆ, قابوكە ورالبەك, اليشەر جۇرگەنوۆ, دۋلات ۇسەنباەۆ, اققالي زaكير, ءمولدىر ساعىندىقوۆا, مادينا نارباەۆا, داريا قايرامباەۆا, ۇلان داۋباي, دانيار سارباسوۆتىڭ شىعارمالارىندا قازاق ءۇشىن قاستەرلى جىلقى جانۋارى ءتۇرلى راكۋرستا ۇلكەن سۇيىسپەنشىلىكپەن بەينەلەنگەن. سونداي-اق كورمەگە قازاقباي اجىبەك ۇلى, باحىتنۇر بۇردەسبەكوۆ, ءالي باقتىگەرەەۆ, سەرىك تاينوۆ, ەرالى وسپان ۇلى, نۋرشيدين باراتوۆ, نۇرلان قيلىباەۆ, Caيد اتابەكوۆ سەكىلدى قوناق سۋرەتشىلەر دە قاتىستى. مۇنداي پىشىندە ۇيىمداستىرىلعان كورمە قالىپتاسقان كوركەمسۋرەت مەكتەبى مەن ءداستۇرىن ودان ءارى ساباقتاستىرۋعا جانە شەبەر مەن ونىڭ ءىزباسارلارىنىڭ شىعارماشىلىق ىزدەنىسىن ۇيلەسىمدى وركەندەتە تۇسەدى.
الماتى