قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى رومان ۆاسيلەنكو توراعاسى تورە نەرلەند باستاعان «Bike for Peace» ۇكىمەتتىك ەمەس ۇيىمىنىڭ دەلەگاتسياسىن قابىلدادى, دەپ حابارلايدى Egemen.kz.
تاراپتار يادرولىق قارۋسىزدانۋ جانە جاپپاي قىرىپ-جويۋ قارۋىن تاراتپاۋ ماسەلەلەرى بويىنشا پىكىر الماستى.
ر.ۆاسيلەنكو 2045 جىلعا تامان, ياعني بۇۇ قۇرىلۋىنىڭ ءجۇز جىلدىق مەرەيتويىنا وراي قازاقستاننىڭ يادرولىق قارۋدان ازات الەم قۇرۋعا باعىتتالعان كۇش-جىگەردەگى دايەكتى ساياساتى تۋرالى حاباردار ەتتى. سونىمەن قاتار, ديپلومات ەلىمىزدە جۇزەگە اسىرىلىپ جاتقان ينستيتۋتسيونالدىق رەفورمالار تۋرالى جانە ادىلەتتى قازاقستاندى قۇرۋ تۇرعىسىنان پارلامەنتتىك سايلاۋدىڭ قورىتىندىلارى تۋرالى حابارلادى.
ءوز كەزەگىندە ت.نەرلەند الەمنىڭ ءتۇرلى ەلدەرىندە ۆەلوتۋرلار اياسىندا ساياساتكەرلەرمەن, قوعاممەن, جاستارمەن وتكىزىلەتىن كەزدەسۋلەرى بارىسىندا يادرولىق قارۋسىز الەمدى ناسيحاتتاۋعا باعىتتالعان «Bike for Peace» قوزعالىسىنىڭ قىزمەتى تۋرالى ايتىپ بەردى. 1977 جىلى قوزعالىس قۇرىلعاننان بەرى بارلىعى 120-دان استام ەلدە 250 ۆەلوتۋر ۇيىمداستىرىلدى.
نورۆەگيالىق ۇەۇ باسشىسى قازاقستان يادرولىق ارسەنالدان ءوز ەركىمەن باس تارتۋدىڭ ۇلگىسى ەكەنىن اتاپ ءوتتى.
«بيىل جانە كەلەسى جىلى ءبىز ازيا ەلدەرى ارقىلى نيۋ-يورك قالاسىنا دەيىن ۇلكەن ۆەلوتۋر ۇيىمداستىرۋدى جوسپارلاپ وتىرمىز جانە ول «قازاقستانعا قاراڭىز – ولار يادرولىق قارۋدان باس تارتتى!» دەگەن ۇرانمەن وتەدى», دەدى ول.