قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ باستاعان قازاقستاندىق دەلەگاتسيا سامارقاند قالاسىندا وتكەن تاۋەلسىز مەملەكەتتەر دوستاستىعى سىرتقى ىستەر مينيسترلەرى كەڭەسىنىڭ وتىرىسىنا قاتىستى, دەپ حابارلايدى Egemen.kz.
وتىرىس بارىسىندا تمد شەڭبەرىندەگى ءوزارا ءىس-قيمىلدىڭ جاي-كۇيى مەن پەرسپەكتيۆالارى, سونداي-اق دوستاستىق الاڭىندا كوپجاقتى ىنتىماقتاستىقتى جانداندىرۋ بويىنشا پراكتيكالىق ۇسىنىستار قارالدى.
وڭىرلىك جانە حالىقارالىق كۇن تارتىبىندەگى وزەكتى ماسەلەلەر بويىنشا جان-جاقتى پىكىر الماسۋ ءوتتى. «قازاقستان ءتۇرلى سالالارداعى دوستاستىق كەڭىستىگىندەگى ينتەگراتسيالىق پروتسەستەردى جانداندىرۋعا جانە تەرەڭدەتۋگە ۇمتىلادى», دەدى م. نۇرتىلەۋ.
قازاقستان ءسىم باسشىسى وتىرىسقا قاتىسۋشىلاردى ەلىمىزدىڭ تمد شەڭبەرىندەگى ىنتىماقتاستىقتى ودان ءارى دامىتۋ تاسىلدەرى تۋرالى حاباردار ەتتى. وتكەن جىلدىڭ قازان ايىندا استانادا وتكەن تمد سامميتىندە ۇسىنىلعان قازاقستان رەسپۋبليكاسىنىڭ باستامالارىن ىسكە اسىرۋ ماسەلەلەرىنە ەرەكشە نازار اۋدارىلدى.
وتىرىسقا قاتىسۋشىلار ساياسي جانە مادەني-گۋمانيتارلىق سالالارداعى ءوزارا ءىس-قيمىلدى نىعايتۋعا باعىتتالعان بىرقاتار شەشىم قابىلدادى.