مەملەكەت باسشىسى قاسىم-جومارت توقاەۆ وتكەن جىلعى جولداۋىندا بيىلعى قاڭتاردان باستاپ پروكۋراتۋرا ورگاندارىنا ازاپتاۋ مەن تەرگەۋدىڭ رۇقسات ەتىلمەگەن ادىستەرىن بولدىرماۋدى باقىلاپ, تەرگەپ-تەكسەرۋ جۇرگىزۋدى جانە ولاردى جويۋدى تاپسىردى.
وسى ماقساتتا پروكۋراتۋرا ورگاندارى ازاپتاۋدىڭ الدىن الۋعا قاجەتتى نورماتيۆتىك جانە ۇيىمداستىرۋشىلىق جاعداي جاساۋ جۇمىستارىن باستادى. سونىڭ ءبىر مىسالى – كەشە باس پروكۋرور بەرىك اسىلوۆ پەن ادام قۇقىقتارى جونىندەگى ۋاكىل ارتۋر لاستاەۆ ءوزارا ىنتىماقتاستىق تۋرالى مەموراندۋمعا قول قويدى. بۇدان بىلاي پروكۋرورلار مەن ادام قۇقىقتارى جونىندەگى ۋاكىل ازاپتاۋلارعا قارسى بىرلەسىپ كۇرەس جۇرگىزبەك.
قۇجاتتىڭ ماقساتى – ءتيىمدى شارالار قابىلداپ, ورتاق رەسۋرستاردى پايدالانۋ ارقىلى ازاپتاۋلار مەن باسقا دا رۇقسات ەتىلمەگەن تەرگەۋ ادىستەرىنە بىرلەسە قارسى تۇرۋ. اتاپ ايتقاندا, ازاماتتاردىڭ كونستيتۋتسيالىق قۇقىقتارىن بۇزاتىن العىشارتتاردى انىقتاۋ جانە جويۋ ءۇشىن قىلمىستىق قۋدالاۋ ورگاندارى مەن پەنيتەنتسيارلىق مەكەمەلەردىڭ عيماراتتارىنا بىرلەسىپ بارۋ, ادام قۇقىقتارىن قورعاۋ جانە قالپىنا كەلتىرۋ تەتىكتەرى تۋرالى ءتۇسىندىرۋ جۇمىستارىن جۇرگىزۋ, ازاماتتاردى جەكە قابىلداۋ, اقپارات الماسۋ جانە باسقا دا بىرقاتار شارا جوسپارلانىپ وتىر.
ايتا كەتسەك, پرەزيدەنت تاپسىرماسىنان كەيىن ىستانبۇل حاتتاماسىنىڭ قاعيداتتارىنا سايكەس كەلەتىن ازاپتاۋلاردى تەرگەپ-تەكسەرۋدىڭ ادىستەمەسى ازىرلەندى. قۇقىق قورعاۋ ورگاندارىنىڭ باسشىلارىمەن بىرلەسىپ, قىلمىستىق ۇدەرىستە جانە جازانى ورىنداۋ كەزىندە ازاماتتاردىڭ كونستيتۋتسيالىق قۇقىقتارى مەن بوستاندىقتارىنىڭ اياققا تاپتالماۋى ءۇشىن ازاپتاۋلار تۋرالى ىستەردى سوتقا دەيىنگى تەرگەپ-تەكسەرۋ نۇسقاۋلىعى, سونداي-اق مىندەتتى بەينەباقىلاۋ ەرەجەلەرى بەكىتىلدى. قۇقىق قورعاۋ جانە تۇزەۋ مەكەمەلەرىنىڭ «كورىنبەيتىن ايماقتارى» باقىلاۋ كامەرالارىمەن جابدىقتالىپ, سوتتالعانداردىڭ ءوتىنىش-شاعىمدارىن ونلاين قابىلدايتىن تەرمينالدار ورناتىلادى.
سونىمەن قاتار ازاپتاۋلارعا قارسى ءىس-قيمىل بويىنشا ءبىرىنشى كەزەكتەگى شارالار جوسپارى بەكىتىلدى. وندا ارىزداردى تاۋلىك بويى قابىلداۋ, جەتكىزۋ زاڭدىلىعىنا كەنەتتەن تەكسەرىستەر جۇرگىزۋ جانە باسقا الدىن الۋ شارالارى كوزدەلگەن. بۇگىندە پروكۋراتۋرا ورگاندارى ازاپتاۋلاردىڭ الدىن الۋ ماسەلەلەرى بويىنشا قۇقىق قورعاۋ ينستيتۋتتارىمەن تىعىز ءوزارا ءىس-قيمىل جاساپ جاتىر.
مەموراندۋم شەڭبەرىندە تاراپتار بىرلەسكەن ءىس-شارالار وتكىزۋگە, سونىڭ ىشىندە وڭىرلىك دەڭگەيدە دە قاجەتتى جۇمىستاردى قولعا الۋعا نيەتتى. باس پروكۋرور بەرىك اسىلوۆ پەن ادام قۇقىقتارى جونىندەگى ۋاكىل ارتۋر لاستاەۆ ورتاق مىندەتتەر مەن ماقساتتارعا قول جەتكىزۋدە ارىپتەستىك قاتىناستاردىڭ ماڭىزىن, بۇل قۇجات ازاماتتاردىڭ كونستيتۋتسيالىق قۇقىقتارىن قورعاۋ, ونىڭ ىشىندە ازاپتاۋلاردىڭ الدىن الۋ ماسەلەلەرىندە ەكىجاقتى ىنتىماقتاستىققا جاڭا سەرپىن بەرەتىنىن اتاپ ءوتتى.