سەيسەنبى كۇنى فرانتسيا استاناسىندا «جاڭا قازاقستان: دەموكراتيالىق سايلاۋ قورىتىندىسى بويىنشا جاڭا كوزقاراس, سىن-قاتەرلەر مەن پەرسپەكتيۆالار» اتتى ساراپشىلار كونفەرەنتسياسى ءوتتى, دەپ حابارلايدى Egemen.kz.
ورتالىق ازيا بويىنشا جەتەكشى فرانتسۋز ساراپشىلارى مەن قر ەلشىلىگى ديپلوماتتارىنىڭ قاتىسۋىمەن وتكەن ءىس-شارا پاريجدەگى بۇۇ-نىڭ CINUP ۋنيۆەرسيتەتارالىق كوميتەتىنىڭ قولداۋىمەن Cercle National Des Armées عيماراتىندا ءوتتى.
كونفەرەنتسيا ەلىمىزدە جۇرگىزىلىپ جاتقان ساياسي رەفورمالارعا بايلانىستى فرانتسۋز ساراپشىلارى مەن ساياساتتانۋشىلارى اراسىندا ۇلكەن قىزىعۋشىلىق تۋدىردى. شاراعا ورتالىق ازيا بويىنشا تانىمال فرانتسۋز ساراپشىلارى, سونداي-اق بولاشاعى زور ساياساتتانۋشىلار قاتىستى.
كونفەرەنتسيانى اشقان قازاقستان رەسپۋبليكاسىنىڭ فرانتسياداعى ەلشىسى گۇلسارا ارىستانقۇلوۆا جينالعانداردى ەلىمىزدە بولىپ جاتقان ساياسي وقيعالاردان حاباردار ەتتى. قازاقستاندىق ديپلومات قر پارلامەنتىنىڭ تومەنگى پالاتاسىنا جاقىندا وتكەن سايلاۋ تۋرالى ايتتى.
«بۇگىندە قازاقستان قوعامىندا جاڭا ازاماتتىق جانە ساياسي مادەنيەت قالىپتاسىپ وتىر. ءبىر جىلدان از ۋاقىت ىشىندە قازاقستاندا ۇلتتىق رەفەرەندۋمدى قوسا العاندا, بەس سايلاۋ ناۋقانى ءوتتى. جۇرگىزىلىپ جاتقان رەفورمالاردىڭ نەگىزىندە «مىقتى پرەزيدەنت - ىقپالدى پارلامەنت - ەسەپ بەرەتىن ۇكىمەت» فورمۋلاسى جاتىر», دەدى قر ەلشىسى.
سونىمەن قاتار, قازاقستاندىق ديپلومات قازاقستان رەسپۋبليكاسىنىڭ پرەزيدەنتى ق.توقاەۆتىڭ قازاقستان رەسپۋبليكاسى پارلامەنتىنىڭ جاڭا قۇرامى الدىندا سويلەگەن سوزىندە ساياسي جۇيەنى جەتىلدىرۋگە باعىتتالعان رەفورمالار جالعاساتىنى تۋرالى ايتقانىن اتاپ ءوتتى.
فرانتسيانىڭ ورتالىق ازيا ەلدەرى بويىنشا جەتەكشى ساراپشىسى كاترين پۋجول قازاقستانداعى رەفورمالار ورتالىق ازياداعى وزىق جانە پروگرەسسيۆتى رەفورمالاردىڭ ءبىرى دەگەن باعا بەردى. ونىڭ پىكىرىنشە, ەلىمىزدىڭ باسشىلىعىنا جوسپاردى ىسكە اسىرۋ قارقىنىن ساقتاۋ ماڭىزدى, بۇل وڭىردەگى ۇلگىلى مودەلگە اينالادى.
ال, فرانتسيادان كەلگەن ساياساتتانۋشى قازاقستاندىق سايلاۋشىلاردىڭ «جاسىلداردىڭ» پايداسىنا جەتكىلىكتى تاڭداۋ جاساماعانىنا وكىنىش ءبىلدىردى. ك.ءپۋجولدىڭ ايتۋىنشا, ەكولوگيالىق قوزعالىستاردىڭ كۇن ءتارتىبى ەۋروپادا وزەكتى ەكەنىن جانە كليماتتى ساقتاۋ ماسەلەلەرى تەك ەۋروپا كونتينەنتىندە عانا بەلسەندى قوزعالعانىن قالامايتىنىن ايتتى.
كونفەرەنتسيا مودەراتورى, ساراپشى ەريك گيشون قازاقستان مەن فرانتسيانىڭ قازىرگى جاعدايدا قارىم-قاتىناستاردى دامىتۋدىڭ بولاشاعى زور ەكەنىن قوستى. ونىڭ باعالاۋى بويىنشا, قازاقستان وڭىردە ستراتەگيالىق جاعدايعا يە جانە پاريج ءبىزدىڭ ەلىمىزدى باسىم سەرىكتەس رەتىندە قاراستىرادى.