ەكىباستۇز قالاسىنىڭ 112 پۋلتىنە ق.ساتباەۆ اتىنداعى ارنانىڭ توعىزىنشى سورعى ستانتسياسىندا 1953 جانە 1950 جىلى تۋعان ەكى بالىقشى مۇز استىنا ءتۇسىپ كەتكەنى تۋرالى حابارلاما تۇسكەن, دەپ حابارلايدى Egemen.kz Pavlodarnews.kz-كە سىلتەمە جاساپ.
«وقيعا ورنىنا ءتورت سۇڭگۋىر-قۇتقارۋشىدان تۇراتىن ەكىباستۇز قالاسى قۇتقارۋ بولىمشەسىنىڭ كەزەكشى اۋىسىمى اتتاندى. قۇتقارۋشىلار ساعات 19:30-دا سۇڭگۋىر قۇرالدارىن پايدالانىپ, جاعالاۋدان 40 مەتر قاشىقتىقتا ەكى بالىقشىنىڭ بىرەۋىنىڭ دەنەسىن شىعاردى. ساعات 19:52-دە جاعالاۋدان 70 مەتر قاشىقتىقتا ەكىنشى بالىقشىنىڭ دەنەسى شىعارىلدى», دەپ حابارلادى پاۆلودار وبلىسىنىڭ جەدەل قۇتقارۋ جاساعى.
قۇتقارۋشىلار بالىقشىلاردان سۋداعى قاۋىپسىزدىك شارالارىن ساقتاۋدى سۇرايدى جانە مۇزدىڭ ۇستىنە شىقپاۋعا كەڭەس بەرەدى.