قازاقستان ەلشىلىگىنىڭ قولداۋىمەن حورۆاتيادا ناۋرىز مەرەكەسىن تويلاۋ اياسىندا تۇڭعىش رەت «TURAN» ەتنو-فولكلورلىق ءانسامبلىنىڭ كونتسەرتى ءوتتى, دەپ حابارلايدى Egemen.kz.
حورۆاتيا رەسپۋبليكاسى پارلامەنتىنىڭ ۆيتسە-سپيكەرى داۆوركو ۆيدوۆيچ ءوزىنىڭ قۇتتىقتاۋ سوزىندە ءوتىپ جاتقان مادەني ءىس-شارانىڭ ماڭىزدىلىعىن اتاپ ءوتتى. ونىڭ ايتۋىنشا, كونتسەرت قازاق حالقىنىڭ باي شىعارماشىلىعىمەن تانىسىپ قانا قويماي, ەلدەر اراسىنداعى دوستىق پەن ءوزارا تۇسىنىستىكتى نىعايتۋعا ۇلەس قوسۋعا مۇمكىندىك بەردى.
توپتىڭ قۋاتتى ەنەرگياسى, كلاسسيكالىق كۇيلەردىڭ ۆيرتۋوزدى ءۇنى, قايتالانباس جانرداعى حالىق شىعارمالارى مەن كومەيمەن ءان سالۋ تەحنيكاسى كورەرمەندەردى بەي-جاي قالدىرماي, حورۆاتيا جۇرتشىلىعىنىڭ زور تاڭدانىسىن تۋدىرىپ, دۇركىرەگەن قوشەمەتتەرىن دە تۋدىردى. مۋزىكا سۇيەر قاۋىم قوبىز, سىبىزعى, جەتىگەن, شەرتەر, دومبىرا جانە باسقا دا قازاقتىڭ كونە اسپاپتارىنىڭ سيقىرلى ۇنىنە ءتانتى بولدى.
كەشتىڭ ەرەكشە اتموسفەراسىنا ەتنو-كورمە دە اسەر ەتتى, ونىڭ اياسىندا حورۆاتيا استاناسىنىڭ تۇرعىندارى ءۇشىن العاش رەت كيىز ءۇيدىڭ ءتۇرلى-ءتۇستى ىشكى بەزەندىرىلۋى ۇسىنىلدى. ساندىك-قولدانبالى ونەر نىساندارى, قازاقتىڭ ۇلتتىق كيىمدەرى, فوتوسۋرەتتەر مەن قازاق تاعامدارىنىڭ ءداستۇرلى دەليكاتەستەرى بالقان تۇبەگىندە كوپ عاسىرلىق تاريحى مەن باي مۇراسى بار ۇلى دالانىڭ كوشپەلى حالىقتارىنىڭ مادەنيەتىن پاش ەتتى.
مادەني ءىس-شاراعا قازاقستان ازاماتتارى, حورۆاتيا ۇكىمەتىنىڭ مۇشەلەرى, ەلدىڭ ەكس-پرەزيدەنتتەرى, پارلامەنت دەپۋتاتتارى, ىسكەرلىك, ديپلوماتيالىق, اكادەميالىق جانە شىعارماشىلىق توپتاردىڭ وكىلدەرى قاتىستى. زالدىڭ تولىپ كەتۋىنە بايلانىستى كونتسەرتكە كەلە الماعان قوناقتار ءۇشىن «YouTube» ارناسىندا تىكەلەي ترانسلياتسيا ۇيىمداستىرىلدى.
وتكەن ءىس-شارا قازاق كوشپەندىلەرىنىڭ مادەني مۇراسىنىڭ شەتەلدە تانىمال بولۋىنا ىقپال ەتىپ قانا قويماي, قازىرگى قازاقستانعا دەگەن قىزىعۋشىلىقتى ايتارلىقتاي ارتتىردى. مادەني كەشتىڭ قوناقتارى ەلىمىزدى جاقىنىراق تانىپ, جاقىن ارادا بارىپ قايتۋعا نيەت ءبىلدىردى.