پويىزدا ىشىمدىك ىشكەن جولاۋشى قاماۋعا الىندى

وقيعا الماتى-پاۆلودار باعىتىنداعى جولاۋشىلار پويىزىندا بولعان. قۇقىق بۇزعان جولاۋشى شىعىس قازاقستان وبلىسى اقتوعاي ستانتسياسىنا كەلگەننەن كەيىن پويىز باستىعىنىڭ اكتىسى بويىنشا ءتۇسىرىلىپ, جەلىلىك پوليتسيا بولىمشەسىنىڭ قىزمەتكەرلەرىنە بەرىلدى.

بۇل تۋرالى كولىكتەگى پوليتسيا دەپارتامەنتى باستىعىنىڭ ءبىرىنشى ورىنباسارى ماديار ايتۋعانوۆ ايتتى. تەكسەرۋ بارىسىندا كولىك پوليتسەيلەرى پاۆلودار وبلىسىنىڭ 28 جاستاعى تۇرعىنىن انىقتادى. الكوگولدى ىشىمدىككە ماسايعان جولاۋشى بالاعات ءسوز ايتىپ, جولسەرىكتەردىڭ ەسكەرتۋلەرىنە قۇلاق اسپاعان. وسىلايشا قوعامدىق ءتارتىپتى بۇزعان.

ء«تارتىپ ساقشىلارى قۇقىق بۇزۋشىعا قاتىستى قر اقبتك-ءنىڭ 440-بابى 3-بولىگى, 434-بابى 1-بولىگى بويىنشا ەكى حاتتاما تولتىرىپ, ءىس پاۆلودار وبلىسى باياناۋىل اۋداندىق سوتىنا جىبەرىلدى. ايتا كەتۋ كەرەك, ەر ادام بۇعان دەيىن دە قوعامدىق ورىنداردا الكوگول ىشكەنى ءۇشىن جاۋاپقا تارتىلعان. ەندى ورەسكەل ارەكەتىن قايتا جاساپ وتىر. سوت اكىمشىلىك ءىستىڭ ماتەريالدارىن قاراپ, ونى 20 تاۋلىككە اكىمشىلىك قاماۋعا الۋ تۇرىندە اكىمشىلىك جازا تاعايىنداۋ تۋرالى قاۋلى شىعاردى», دەدى م.ايتۋعانوۆ.