استانا. 4 شىلدە. قازاقستاننىڭ ۇلتتىق مۇراجايى كولەمى جاعىنان الەم بويىنشا العاشقى وندىققا كىرەدى. ورتالىق كوممۋنيكاتسيالار قىزمەتىندە وتكەن بريفينگتە قازاقستان رەسپۋبليكاسى ۇلتتىق مۇراجايىنىڭ ديرەكتورى دارحان مىڭباي وسىلاي دەدى. بۇل تۋرالى «قازاقپارات» حابارلادى.
د.مىڭباي: «مۇراجايدىڭ ەرەكشەلىكتەرى وتە كوپ. ونىڭ اۋماعىنىڭ ءوزى 74 مىڭ شارشى مەتردى قۇرايدى. ەرميتاج – 180 مىڭ, لۋۆر – 160 مىڭ, مەتروپوليتەن (اقش) – 110 مىڭ, ترەتياكوۆ گالەرەياسى 70-75 مىڭداي, وڭتۇستىك كورەيا مۋزەيىنىكى – 135 مىڭ شارشى مەتر. ءبىزدىڭ مۇراجاي جالپى كولەمى جاعىنان الەمدە العاشقى وندىققا كىرەدى», – دەدى.
مۋزەي باسشىسىنىڭ ايتۋىنا قاراعاندا, قازىرگى تاڭدا كەشەننىڭ ءىشىن باعالى ەكسپوناتتارمەن تولتىرۋ جۇمىستارى جۇيەلى تۇردە جۇرگىزىلۋدە.
مۋزەي ديرەكتورى: «ءبىزدىڭ جەكە كوللەكتسيونەرلەر وسى ۇلتتىق مۋزەيدىڭ قورىنا قۇندى زاتتاردى تاپسىرىپ جاتىر. وعان ۇلكەن العىسىمىزدى بىلدىرەمىز. ول تاريحي قۇندىلىق بولىپ سانالادى. سوندىقتان وزدەرىندە ساقتالماي قالۋى مۇمكىن باعالى زاتتاردى وسى مۇراجايعا كەلىپ وتكىزۋدە. بۇل جاقسى ءۇردىس جانە ءداستۇر بولىپ قالۋى ءتيىس», – دەدى.
قازىرگى تاڭدا اتالعان مۋزەي باسشىلىعى ەۋروپانىڭ, رەسەيدىڭ تانىمال مۇراجايلارىمەن بايلانىس ورناتۋدا.
ەستەرىڭىزگە سالا كەتەيىك, قازاقستان رەسپۋبليكاسى ۇلتتىق مۇراجايى وسىدان بىرەر كۇن بۇرىن مەملەكەت باسشىسىنىڭ قاتىسۋىمەن اشىلعان بولاتىن.
جولدىباي بازار.
دەرەككوز: «قازاقپارات».
فوتو: astana.gov.kz.