استانا. 4 شىلدە. كەشە تۇندە باستالعان فۋتبولدان ەۋروپا ليگاسى 2014/2015 جىلدارعى ماۋسىمىنىڭ ءبىرىنشى ىرىكتەۋ ماتچتارىندا قازاقستاننىڭ ءۇش كومانداسى دا جەڭىسكە جەتتى. بۇل تۋرالى egemen.kz حابارلادى.
كوماندالاردىڭ ەكەۋى سىرت الاڭدا, ارمەنيا ستاديوندارىندا ويناعاندارىنا قاراماستان, وسىنداي ابىروي بيىگىنەن كورىندى. بۇل كۇنى قاراعاندىنىڭ «شاحتەرى» گيۋمريدە (بۇرىنعى – لەنيناكان) جەرگىلىكتى «شيراك» كومانداسىنا قارسى شىقتى. وسى جەردە ايتا كەتۋىمىز كەرەك, بۇل ەكى كوماندا كەشەگى كەڭەس كەزەڭىندە دە ەل چەمپيوناتىنا قاتار كۇش سىناسقان. قاراعاندىلىقتار «ا» كلاسىندا ويناسا, لەنيناكاندىقتار «ب» توبىندا ونەر كورسەتتى. اراسىندا ءبىر-بىرلەرىمەن ۇشىراسىپ قالعان كەزدەرى دە كەزدەستى. اتاپ ايتقاندا, 1969 جىلى ولار «ا» كلاسىنىڭ ەكىنشى ليگاسىندا العاش جانە سوڭعى رەت توقايلاستى. ءبىزدىڭ كەنشىلەر الدىمەن قوناقتا وتكەن ويىندى 0:0 ەتىپ تەڭ اياقتاپ كەلىپ, ءوز الاڭىندا 3:0 ەسەبىمەن ويسىراتا ۇتتى. ەندى, مىنە, ارادا 45 جىل وتكەننەن كەيىن جاساقتار تاعى كەزدەسىپ وتىر. ءبىر قىزىعى, ولاردىڭ ەكەۋى دە سول كەزدەگى اتاۋلارىن كۇنى بۇگىنگە دەيىن سول قالپىندا ساقتاپ كەلەدى.
ارميان جەرىندە وتكەن بۇل جولعى كەزدەسۋدە دە قاراعاندىلىقتاردىڭ دەسى باسىم بولدى. بىراق مەيماندار ءوز باسىمدىلىقتارىن كوپكە دەيىن گولعا اينالدىرا المادى. ولار 71-مينۋتتا اندرەي فينونچەنكودان پاس العان ميحرەت توپچاگيچ سوققان گولدان كەيىن عانا ەسەپ اشتى. ال 83-مينۋتتا سەرگەي مالىي تابىستى ەسەلەدى. ارمياندار 86-مينۋتتا سەرج دەبلە كۇدىكتى پەنالتيدەن تۇسىرگەن ءبىر گولدان سوڭ عانا ءبىر دوپتىڭ قارىمتاسىن قايتارا ءبىلدى. ەسەپ – 2:1.
ارمەنيانىڭ استاناسى – ەرەۆان قالاسىندا جەرگىلىكتى «پيۋنيكپەن» كەزدەسكەن «استانا» ۇجىمى بۇدان دا ارى كەتتى. ەلوردا فۋتبولشىلارى قارسىلاستارىن 4:1 ەتىپ قيراتا جەڭدى. ولار 40-مينۋتتا باۋىرجان جولشيەۆتىڭ پاسىنان تاڭات نوسەرباەۆ سوققان گولمەن العا شىقسا, 67-مينۋتتا باۋىرجاننىڭ ءوزى ەرلەدى. وعان مۇنداي مۇمكىندىكتى مارات شاحمەتوۆ جاسادى. بىراق ارادا ءبىر مينۋت وتكەندە ەرەۆاندىق اگۆان پاپيكيان ءبىر دوپتىڭ ەسەسىن كەمىتىپ ۇلگەردى. سودان كەيىن االاڭ ۇستىندە قايتادان استانالىقتار قۇيىن ءۇيىردى. سونىڭ ناتيجەسىندە 71-مينۋتتا فوكسي كەتەۆواما, ال 84-مينۋتتا اتاناس كۋردوۆ ەسەپتى ۇلعايتا ءتۇستى.
قازاقستاندىقتارعا سوڭعى جەڭىستى الماتىدا البانيانىڭ «كۋكەسي» كومانداسىن قابىلداعان «قايرات» اپەردى. جەڭىس اكەلگەن جالعىز دوپتى 89-مينۋتتا اسلان داراباەۆ ءوز ەسەبىنە جازدى.
ەندى قارىمتا كەزدەسۋلەر 10 شىلدە كۇنى قارسى كوماندالار الاڭدارىندا وتەدى.
دامير قوجامقۇل.
دەرەككوز: vesti.kz.
فوتو: vesti.kz.