سەمەي وڭىرىندە كاسىپكەرلەر از ەمەس. ال وسى وڭىردە ءتۋريزمدى دامىتۋعا اتسالىسىپ كەلە جاتقان ازاماتتاردى كوپ دەۋگە كەلمەيدى. يساعالي ومارالينوۆ سونداي ازاماتتاردىڭ ءبىرى عانا ەمەس, بىرەگەيى. ونىڭ بۇل ماسەلەمەن اينالىسىپ كەلە جاتقانىنا شيرەك عاسىردان اسىپ بارادى. قازىردە ايدىندى الاكول جاعاسىنداعى 350 ورىندىق ەڭ ۇلكەن دەمالىس كەشەنى وسى ازاماتتىڭ يەلىگىندە. مۇندا تىنىعۋشىلارعا بارىنشا قولايلى مۇمكىندىك جاسالعان. وتكەن جىلى وسىندا ەكى وتباسىلىق ءساندى كوتتەدجدەر سالىندى. ال ولاردىڭ ساپاسى شەتەلدەردەگى دەمالىس ورىندارىنان ەش كەم ەمەس. ءبىر سوزبەن ايتقاندا, «ايگەرىم» شەتەلدىك قوناقتاردى قابىلداۋعا دا ساقاداي ساي ءازىر.
جۋىردا, ياعني جاڭا ماۋسىم الدىندا يساعالي قاليمۇسا ۇلى وسكەمەن مەن سەمەيدىڭ جانە وبلىستىڭ بىرقاتار اۋداندارىنىڭ جالپى جيىنى وتىزدان استام ەڭبەك ارداگەرلەرىن الاكولگە شاقىرىپ, تەگىن تىنىقتىرىپ, دەمالدىردى. بەس كۇنگە سوزىلعان دەمالىس بارىسىندا جاسى سەكسەنگە تاقاعان اقساقالدارعا مەيلىنشە قۇرمەت كورسەتىلدى. ياعني, مازمۇندى كەش, ويىن-ساۋىققا دەيىن ۇيىمداستىرىلدى. سول سەبەپتەن دە اقساقالدار اقسۇڭقار سەكىلدى جەمىن شاشىپ جەپ جۇرگەن ازاماتقا ءدان ريزا بولدى. بۇعان دەيىن دە مەكتەپ, مەشىتكە, سپورت مەكەمەلەرىنە قامقورلىق تانىتىپ كەلە جاتقان يساعاليدى قالاي ماقتاساڭ دا سىيىمدى.
وسى ورايدا ساپاردا كوڭىلىمىزگە ءتۇيىپ قايتقان كەلەلى ماسەلەنى ايتا كەتسەك ەش ارتىقتىعى جوق دەپ بىلەمىز. ياعني, الاكولگە بارىپ قايتۋ ماسەلەسى ءالى كۇنگە دەيىن ءوز شەشىمىن تاپپاي كەلەدى. جالاڭاشكولدەن الاكولگە دەيىنگى نەبارى ەلۋ شاقىرىم جەرگە تەمىرجول تارتىلسا دەيمىز. ولاي بولماعان كۇندە وسى ەكى ارالىقتاعى جولعا اسفالت توسەلسە بۇل ءماسەلە جارتىلاي بولسا دا ءوز شەشىمىن تاپقان بولار ەدى. ال ەلىمىزدىڭ استانا, الماتى سىندى ءىرى قالالارىمەن ءبىرگە, وسكەمەن, سەمەيدەن الاكولگە تىكەلەي ۇشاق ۇشىرىلا باستاسا ونىڭ ايتارى جوق. مەملەكەتىمىز الەمدەگى اسا دامىعان 30 ەلدىڭ قاتارىنان كورىنۋگە تالپىنىپ وتىرعان شاقتا بۇل قيالي اڭگىمە ەمەس. تۋريزمدى دامىتساق, ەلىمىز دە قوسا داميتىندىعىن كىم جوققا شىعارادى!
سەمەي.