اتتى حالىقارالىق بايگەنىڭ قورىتىندىلارى شىعارىلدى
قازاقستان سىرتقى ىستەر مينيسترلىگى مەن قازاقستان جۋرناليستەر وداعى «قازاقستان – شەتەلدىك باق كوزىمەن» اتتى حالىقارالىق بايگەنىڭ قورىتىندىلارىن شىعاردى, دەپ حابارلادى قر ءسىم-ءىنىڭ ءباسپاسوز قىزمەتى.
بايگە زاماناۋي قازاقستاننىڭ ەكونوميكاسى, مادەنيەتى, ونەرى مەن كوپجاقتىلىعى جونىندە شەتەلدىك باق-تاردىڭ ساپالى, وبەكتيۆتى ماتەريالدارىن الۋ ماقساتىندا, سونىمەن قاتار, وسى تاقىرىپتار اياسىندا ايتارلىقتاي جارقىن رەپورتاج, وچەرك جانە ساراپتامالىق-تالداۋ ماتەريالداردىڭ اۆتورلارىن ىنتالاندىرۋ ماقساتىندا 2014 جىلعى 1 ءساۋىر مەن 15 ماۋسىم ارالىعىندا وتكىزىلدى.
گەوگرافيالىق تۇرعىدان بايگە وڭتۇستىك جانە سولتۇستىك امەريكا, ەۋروپا, ازيا, تاياۋ شىعىس جانە تمد ەلدەرىنىڭ جۋرناليستەرىن قامتىدى. «ەير استانا» جانە «Rixos Almaty» قوناق ءۇيى بايگەگە دەمەۋشىلىك ەتتى.
بايگە ەرەجەلەرىنە سايكەس جوعارىدا اتالعان ايماقتاردان ءبىر-بىرەۋدەن بەس جەڭىمپاز انىقتالىپ, ولارعا جۇلدە رەتىندە الماتى, استانا نەمەسە بۋرابايعا ساپار ۇيىمداستىرىلاتىن بولادى. بايگە جەڭىمپازدارىنا ۇشىپ كەلۋ/كەتۋ, تۇراتىن ورىن, مادەني باعدارلاما, رەسمي تۇلعالارمەن, عالىمدارمەن, ساراپشىلارمەن جانە جۋرناليستەرمەن كەزدەسۋلەر ۇيىمداستىرۋ قاراستىرىلعان.
سىرتقى ىستەر ءمينيسترى ەرلان ىدىرىسوۆ, قازاقستان جۋرناليستەر وداعىنىڭ باسقارما توراعاسى سەيىتقازى ماتاەۆ, «Rixos Almaty» قوناق ءۇيىنىڭ باس مەنەدجەرى يبراگيم چەليكت جانە «ەير استانا» اق-تىڭ قوعاممەن بايلانىس جونىندەگى ۆيتسە-پرەزيدەنتى بەللا تورمىشەۆادان قۇرالعان بايگە كوميسسياسى 23 ەلدەن كەلىپ تۇسكەن 42 جۇمىستى باعالادى.
امەريكا ەلدەرىنەن جەڭىمپاز بولىپ ءار ءتۇرلى ەلدەردەن بولا تۇرا ءبىرىن ءبىرى تاپقان ادامداردىڭ تاعدىرى تۋرالى اسەرلى ماقالا جازعان, سونىمەن قوسا, قازاقستان مەن گايانىڭ كەيبىر داستۇرلەرىنىڭ, اسىرەسە, ۇلتتىق اسحانالارىنىڭ ۇقساستىعىن سايتتا (www.kaieteurnewsonline.com) سيپاتتاي بىلگەن گايانانىڭ ءجۋرناليسى نيل ماركس (Neil Marks) انىقتالدى.
ەۋروپادان جەڭىمپاز رەتىندە قازاقستانداعى قايتا جاڭارتىلاتىن ەنەرگيا كوزدەرىنىڭ دامۋ بولاشاعى مەن استانادا وتەتىن ەكسپو-2017 حالىقارالىق مامانداندىرىلعان كورمەسى تۋرالى Brussels Diplomatic (www.brusselsdiplomatic.com) باسىلىمىندا ماقالا جازعان بەلگيالىق جۋرناليست سيبيل گرەيندل (Sibylle Greindl) انىقتالدى.
سونىمەن قاتار, القا مۇشەلەرى استانا مەن الماتى جونىندە, حالال-يندۋستريا, عىلىم جانە قازاقستاننىڭ ۇلتتىق داستۇرلەرىنىڭ ەرەكشەلىكتەرى تۋرالى Bernama (www.bernama.com) اقپارات اگەنتتىگىنىڭ پورتالىندا ءبىرقاتار ماقالالارى ءۇشىن ازيا ايماعىنان مالايزيالىق جۋرناليست نۋرشازلين نۋرازماندى (Norshazlina Nor’azman) جەڭىمپاز دەپ تانىدى.
تاياۋ شىعىس ەلدەرىنەن ەڭ جاقسى باسىلىم رەتىندە تاڭداۋ كاتارلىق جۋرناليست حۋسەين احمادقا (Hussain Ahmad) The Peninsula Daily (www.thepeninsulaqatar.com) گازەتىندەگى ماقالاسى ءۇشىن ءتۇستى. ول قازاقستاننىڭ ساياسي جانە ەكونوميكالىق دامۋى, ەلىمىزدىڭ ايماقتاعى ءرولى, ەۋرازيالىق ەكونوميكالىق وداق قۇرۋ مەن ونىڭ بولاشاعى جايلى ماقالالارىمەن كوزگە ءىلىندى.
تمد جانە تاياۋ ورنالاسقان شەتەل ەلدەرىنەن قازىلار القاسى ۋكراينالىق سۆەتلانا وستروۆسكايانى ونىڭ Wellness (www.wellness.org.ua) جۋرنالىنداعى «دالا ەرتەگىسى» اتتى قازاقستاننىڭ مادەني-رۋحاني مۇراسى مەن ەل دامۋىنىڭ قازىرگى زاماناۋي ۇردىستەرى تۋرالى كوركەم رەپورتاجى ءۇشىن تاڭدادى.