ىرعىز اۋدانىنىڭ تۇرعىنى جاعىپار قادىروۆ ون جىل بۇرىن قۇراستىرعان تراكتورىنىڭ پايداسىن كورىپ كەلەدى.
ونىڭ اۋىل اراسىندا جەڭىل قوزعالاتىن, ىقشام كولىگىن كورشىلەرى دە ءجيى پايدالانادى. ول كولىگىنىڭ ۇزاق جىلدان بەرى سەنىمنەن شىعىپ كەلە جاتقانىنا ريزا. ءوز اۋىلىندا ەلەكتريك-دانەكەرلەۋشى بولىپ جۇمىس ىستەپ جۇرگەن جاعىپار قولى بوس كەزىندە اۋىلداستارىنىڭ بۇزىلىپ قالعان كولىكتەرىن جوندەپ بەرەتىن. ول قورانىڭ ءار بۇرىشىندا جاتقان جارامسىز تەحنيكا بولشەكتەرىن جيناپ قانا قويماي, كادەگە اساتىندارىنان شارۋاعا قاجەتتى سوقا, تۇرەن جاساپ بەرە ءجۇرىپ, مەتالل بۇيىمدارىن ىسكە اسىرۋدىڭ ناعىز شەبەرىنە اينالدى. جوقتان باردى قۇراستىرىپ, تەمىردەن ءتۇيىن تۇيگەن شەبەر وسىدان كەيىن شارۋاعا ىڭعايلى تراكتور جاساۋعا دەگەن قىزىعۋشىلىعىن ىسكە اسىرۋعا كىرىستى. قاجەتتى بولشەكتەردى جان-جاقتان ساتىپ الىپ, قالعانىن ىسكە اسپاي جاتقان ەسكى كولىكتەردەن جيناقتادى. ءوزى كوپتەن بەرى ارمانداپ جۇرگەن دانەكەرلەۋشى اپپاراتقا قول جەتكىزگەن سوڭ ويىنا العان شارۋاسى ورايىنان كەلە باستادى. تراكتوردىڭ نەگىزگى بولىگى – موتورىن اۋىر جۇك كولىگىنەن السا, دوڭعالاقتارىن جيناۋ ونشا قيىنعا سوققان جوق. سەبەبى ءار اۋىلدا بۇزىلعان تەحنيكانىڭ دوڭگەلەكتەرى ءۇيىلىپ جاتاتىنى بەلگىلى.
قازىرگى كەزدە جاعىپار تراكتورىنا تىركەمە جالعاپ, جازدا شابىلعان ءشوپتى اۋىلعا تاسيدى. ول ەل ىشىندەگى تەمىردەن ءتۇيىن تۇيەتىن ۇستالارعا دانەكەرلەۋشى جابدىقتار ساتىپ الۋعا قولداۋ بولسا, اۋىل تۇرمىسىنا قاجەتتى بۇيىمداردى وزدەرى-اق جاساپ الار ەدى دەگەن ۇسىنىس ايتتى.
اقتوبە وبلىسى