ومىردەن وتكەنىمەن, كوڭىلدەن وشپەيتىن ادامدار بولادى. سونداي جاننىڭ ءبىرى – نۋري مۋفتاح. سانالى عۇمىرىن قازاق جۋرناليستيكاسىنا ارناعان بەلگىلى قالامگەر, فەلەتونشى «Egemen Qazaqstan» گازەتىندە دە جەمىستى ەڭبەك ەتكەن.
ونىڭ جۋرناليستىك جولى وبلىستىق «اتىراۋ» گازەتىندە شىڭدالعان. كەيىن وڭتۇستىك استانا – الماتىعا قونىس اۋدارىپ, ۇزاق جىل ەل گازەتىنىڭ قۇقىق ءبولىمىن باسقارعان. قالامگەر ادىلدىك ىزدەگەن جانداردىڭ جانايقايى, زاڭدى بەلدەن باسقان وسپادارلاردىڭ تەرىس ارەكەتى تۋرالى ۇزبەي جازدى. سوڭعى كەزدە قازاق باسپاسوزىنەن سيرەك كورىنەتىن فەلەتون جانرىنىڭ شەبەرى ومىردەن وتكەنگە دەيىن جۋرناليستىك كاسىبىنە ادالدىقتان جاڭىلمادى. قولىنان قالامىن تاستامادى.
وتكەن اپتادا بەلگىلى قالامگەر نۋري مۋفتاحتىڭ اتىراۋ قالاسىندا تۇرعان ۇيىنە ەسكەرتكىش تاقتا ورناتىلدى. وعان «اتىراۋ – اقپارات» جشس ۇيىتقى بولدى. سەرىكتەستىكتىڭ باس ديرەكتورى جاسىن بىركەنوۆتىڭ ايتۋىنشا, بۇل – جۋرناليستيكا ارداگەرىن ەستە قالدىرۋعا ارنالعان يگىلىكتى ءىس-شارا.
«قازاق باسپاسوزىنەن قول ۇزبەگەن وقىرماندار نۋري مۋفتاحتى ادىلدىكتىڭ اق سەمسەرى رەتىندە ەستە ساقتايدى. ويتكەنى ول ادىلدىك جولىندا ەشكىمدى الالامادى. سول سەبەپتەن, قيانات كورگەن جاندار الدىمەن نۋري مۋفتاحتى ىزدەدى. ول مۇڭىن دا, سىرىن دا ايتقان جانداردى قولىندا بيلىگى بار اپەرباقانداردان قورعادى. ءسويتىپ, قۇقىق سالاسىنداعى ادىلدىكتىڭ ورناۋىنا وزىندىك ۇلەسىن قوستى. ونىڭ ادىلدىكتى تۋ ەتكەن ۇستانىمى ىزىنەن ەرگەن شىعارماشىلىق وكىلدەرى ءۇشىن ۇلگى-ونەگە بولىپ قالا بەرەدى», دەيدى جاسىن بىركەنوۆ.
سونداي-اق وبلىستىق «اتىراۋ» گازەتىنە ەكى رەت باس رەداكتور بولعان تەڭدىك جاۋىروۆتىڭ تۇرعان ۇيىنە دە ەسكەرتكىش تاقتا ءىلىندى. ارىپتەستەرى قوس قالامگەردىڭ ادامگەرشىلىك بولمىسى, شىعارماشىلىق قىرى تۋرالى ەستەلىكتەرىمەن ءبولىستى.
اتىراۋ وبلىسى