كەزدەسۋدە سەرىك شاپكەنوۆ شاۆكات راحمونوۆتى جاقىندا لاس-ۆەگاس قالاسىندا وتكەن UFC تۋرنيرىندەگى جەڭىسىمەن قۇتتىقتادى. سونداي-اق الداعى ۋاقىتتا بيىك بەلەستى باعىندىرا بەرۋىنە تىلەكتەستىك ءبىلدىردى, دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.
«قازاق حاس ونەرى مەن سپورتىنىڭ التىن بەسىگىنە اينالعان قاسيەتتى اتىراۋ جەرىنە قوش كەلدىڭىز! شىبىقتى ات قىپ مىنگەن شاقتان سپورتتى جانىڭىزعا سەرىك قىلىپ, ەل الدىندا سەرت ۇستاپ, كوك بايراعىمىزدى الەمدىك دودادا اسقاق جەلبىرەتىپ جۇرسەڭىز, ونىڭ تامىرىندا – تۋعان ەلگە دەگەن اسقان سۇيىسپەنشىلىك جاتىر. ەڭ باستىسى, سىزگە قاراپ بوي تۇزەيتىن قازاق جاستارىنىڭ ۇلكەن كەرۋەنى بار. سول ءدۇريا داۋرەندى كوشتىڭ ساپارى وڭىنان بولعاي. سىزگە زور دەنساۋلىق, مول باقىت, ۇلكەن تابىس تىلەيمىن», دەدى س. شاپكەنوۆ.
شاۆكات راحمونوۆ ارنايى قابىلداعان وبلىس اكىمى سەرىك شاپكەنوۆكە العىسىن ءبىلدىردى. وزىنە سەنگەن قايمانا قازاقتىڭ ءۇمىتىن اقتاپ, ەل مەرەيىن اسقاقتاتۋ ءۇشىن بار كۇش-جىگەرىن جۇمسايتىنىن جەتكىزدى.