وتكەن اپتادا جايىق وزەنىنە اققۋلار ۇشىپ كەلدى. قۇددى كورنەكتى اقىن كاكىمبەك سالىقوۆتىڭ «جىلجيدى اققۋ ايدىندا, جىلجىمايدى...» دەپ باستالاتىن ولەڭىندە سۋرەتتەلگەن كورىنىستى كوز الدىڭا كەلتىرەدى. ايدىنعا كورىك بەرگەن اققۋلار بىرەسە جىلجىپ, بىرەسە جىلجىمايدى.
جايىقتا جۇزگەن اققۋلاردى ماحامبەت اۋدانىنىڭ تۇرعىنى ايگەرىم ايشۋاقوۆا سۋرەتكە ءتۇسىرىپ العان. ونىڭ ايتۋىنشا, جايىق وزەنى اعىپ جاتقان تۇستان قۇستاردىڭ داۋىسى ەستىلگەن.
– اقتاۋدا تۇرعانىمدا كاسپي تەڭىزىنىڭ جاعالاۋىنا قونعان اققۋلاردى تاماقتاندىرىپ, فوتوعا ءتۇسىرۋشى ەدىك. اققۋدىڭ داۋىسى ەرەكشە عوي. بالا كەزىمنەن قۇلاعىمدا جاتتالىپ قالعان اققۋدىڭ داۋىسىن ەستىپ, جايىق وزەنىنە قاراي جۇگىردىم. جايىققا جەتكەندە وزەننىڭ ارعى جاعالاۋىنا 6 اققۋدىڭ قونعانىنا كۋا بولدىم, – دەيدى ايگەرىم ايشۋاقوۆا.
سوڭعى جىلدارى جايىق وزەنىنىڭ سۋى ازايىپ, كەيبىر تۇسى تىپتەن تايىزدانعان ەدى. سول سەبەپتەن, ايدىنعا اققۋ قونعانىن جاقسىلىقتىڭ نىشانىنا بالاعاندار بار. ويتكەنى جاعاداعى جۇرت ايدىن سۋى مولايىپ, ەل ىرىسى ارتقانىن قالايدى.
اتىراۋ وبلىسى