اقتاۋ قالالىق ءماسليحاتىنىڭ توراعاسى قايتا سايلاندى

30 ناۋرىزدا اقتاۋ قالالىق ءماسليحاتى 8-شاقىرىلىمنىڭ ءبىرىنشى سەسسياسىن وتكىزدى.

اقتاۋ قالاسى ءماسليحاتىنىڭ قۇرامىندا 20 دەپۋتات بار. سەسسياعا ولاردىڭ 18-ءى قاتىستى. دەپۋتاتتىق قۇرامدا ءار سالا وكىلى بار. اتاپ ايتقاندا, كاسىپكەر, قۇرىلىسشى, مۇعالىم, دارىگەر, جۋرناليست, سپورتشى.

سەسسيانىڭ العاشقى وتىرىسىندا حالىق قالاۋلىلارى قالالىق سايلاۋ كوميسسياسى توراعاسىنىڭ قولىنان دەپۋتاتتىق كۋالىكتەر مەن توسبەلگىلەرىن الدى. سونداي-اق وتىرىستا وسى شاقىرىلىمنىڭ توراعاسىن دا سايلادى. بۇل جولى دا دەپۋتاتتار تاڭداۋى سەمبىعالي زاكەنوۆكە ءتۇستى. جاڭا حاتشى سەنىم بىلدىرگەن ارىپتەستەرىنە العىس ايتىپ, بىرىگە جۇمىس ىستەۋگە شاقىردى.

«دەپۋتاتتىڭ نەگىزگى ماقساتى - بيلىك پەن قوعام اراسىنداعى ارىپتەستىكتى نىعايتۋ. ءار ءتۇرلى جاعدايدى باسىمىزدان كەشەمىز. ءوزىم ەلدىڭ بولاشاعى دۇرىس بولسا ەكەن دەپ ويلايمىن. سول سەبەپتى ءبىز دە سوعان اتسالىسامىز. ءار ءتۇرلى الىپ-قاشپا اڭگىمەگە ەرۋدىڭ قاجەتى جوق. وسى ارىپتەستىكتى ەلگە بولسىن دەگەن نيەت, تىلەكتەرىمىزدى قابىل قىلسا ەكەن», دەدى اقتاۋ قالالىق ءماسليحاتىنىڭ حاتشىسى سەمبىعالي زاكەنوۆ.

قالالىق دەپۋتتاردىڭ ەڭ جاسى 28-دە. ول - قۇرىلىسشى, كاسىپكەر سۇڭعات قاناەۆ. قالا قۇرىلىسىنا ۇلەس قوسىپ جۇرگەن جاس جىگىت ەندى اقتاۋ جاستارىنىڭ الەۋمەتتىك ماسەلەرىن شەشۋگە كۇش سالماق.