مەملەكەت باسشىسى قاسىم-جومارت توقاەۆ VIII سايلانعان پارلامەنت ءماجىلىسىنىڭ ءبىرىنشى سەسسياسىنىڭ اشىلۋىندا سويلەگەن كەزىندە بىرقاتار ماڭىزدى ماسەلەمەن بىرگە ازىق-ت ۇلىك قاۋىپسىزدىگىنە دە نازار اۋداردى.
مەملەكەت باسشىسى جالپاق جۇرتتىڭ كوكەيىندە جۇرگەن وتە وزەكتى ماسەلەلەرگە مەيلىنشە كوڭىل اۋدارىپ وتىرعاندىعىن بىردەن ايتا كەتۋ كەرەك. سونىڭ ىشىندە ازىق-ت ۇلىك قاۋىپسىزدىگى ايرىقشا ماڭىزدى. وڭىردە ەت جانە ەت ونىمدەرىن ءوندىرۋ سىن كوتەرمەيتىنى دە راس. ونىڭ بىرنەشە سەبەبى بار. مال سۇمەسىمەن كۇن كورەتىن اۋىل تۇرعىندارى جايىلىم مەن شابىندىق جەردىڭ جوقتىعىنان قاناتىن كەڭگە جايا الماي وتىر.
سوفيەۆكا سەلولىق وكرۋگىندە ورنالاسقان «شاحمان» سەرىكتەستىگى 2017 جىلى قۇرىلدى. اۋەل باستا مال شارۋاشىلىعىمەن تۇبەگەيلى اينالىسساق دەپ بەل بۋدىق. سول كەزدەگى سەلولىق وكرۋگ اكىمى ەگەر مال قوراسىن تالاپقا ساي سالاتىن بولساڭىزدار قاجەتتى جايىلىمدىق جانە شابىندىق جەر بولىنەدى دەپ سەندىردى.
ەلۋ باس ساۋىن سيىر ساتىپ الدىق. وكرۋگ اكىمى تالاپ كەتكەن مال قوراسى سالىندى. بىراق سودان بەرى التى جىل ۋاقىت وتسە دە, ءبىزدىڭ سەرىكتەستىككە جارتى گەكتار دا جەر بولىنگەن جوق. ءبىز مالدى ءوز ءتولى ەسەبىنەن كوبەيتە الار ەدىك. جالعىز ءبىز عانا ەمەس, وسى توڭىرەكتەگى شاعىن قوجالىقتاردىڭ كورىپ وتىرعان كۇنى وسى. ءتورت ت ۇلىك مالدىڭ باسى وسسە, يگىلىك تە ۇيىرىلەر ەدى عوي. شابىندىق جەر بولماعاندىقتان, جىل سايىن مال ازىعىن ساتىپ الامىز. وتكەن كۇزدىڭ كۇنى 15 كەلىلىك ءشوپ بۋماسى 1200 تەڭگە تۇردى. قىس ورتاسىندا قىمباتتادى. ءدال وسىنداي قالىپپەن ءبىر باس قارا مالدى قىستان امان الىپ شىعۋ ءۇشىن قانشاما قاراجات قاجەت. مىنە, اۋىل شارۋاشىلىعىنىڭ ادىمىن العا باستىرماي تۇرعان ەڭ ءبىرىنشى ماسەلە وسى.
بۇگىنگى كۇنى وڭىردە پايدالانىلماي جاتقان جەر قايتارىلىپ جاتىر دەگەن قۋانىشتى حاباردى ءجيى ەستيمىز. بىراق وسى ارادا اشىقتىق كەرەك. ول جەرلەر كىمگە بەرىلىپ جاتىر, قانداي تارتىپپەن, قانداي ەرەجەگە سايكەس, ول جاعى بەيمالىم. جەرگىلىكتى بيلىك بۇل تاقىرىپ توڭىرەگىندە اۋىز اشار ەمەس.
وسى سالانىڭ ازابىن تارتىپ جۇرگەن ادام رەتىندە ايتارىم, ازىق-ت ۇلىك قاۋىپسىزدىگىن قامتاماسىز ەتۋ ءۇشىن ەڭ الدىمەن اۋىلداعى مال باعىپ وتىرعان قاۋىمعا شابىندىق پەن جايىلىم جەتكىلىكتى ءارى ءادىل ءبولىنۋى كەرەك. ايتپەسە, تىرنەكتەپ تىرشىلىك ەتسەك دەگەن ىنتا بار. جول-جونەكەي كەزىككەن وسىنداي كەدەرگىلەر اۋىلدىڭ كوسەگەسىن كوگەرتەر ەمەس. قازىر بايىپتاپ قاراپ, اقىل تارازىسىنا سالساڭىز ەشبىر قيىندىعى جوق ءتارىزدى. بوس جاتقان جەر سوفيەۆكا سەلولىق وكرۋگىندە دە بار. جومارت جەردىڭ تۋسىراپ بوس جاتقانىنان گورى ەلدىڭ يگىلىگىنە جاراتىلعانى ءجون ەمەس پە؟!
پرەزيدەنتتىڭ تاپسىرماسىنان كەيىن ءۇمىت وتى تۇتانعانداي. الداعى ۋاقىتتا ءبىز ءتارىزدى اۋىل شارۋاسىنىڭ احۋالىن تۇزەيمىز دەگەن ادامدارعا جاعداي جاسالسا جاقسى بولار ەدى.
ءادىلحان شاحمانوۆ,
«شاحمان» سەرىكتەستىگىنىڭ باسشىسى
تسەلينوگراد اۋدانى,
اقمولا وبلىسى