ەلەكتروندى كوممەرتسيا نارىعىندا ءوسۋ بار

مامانداردىڭ ايتۋىنشا, جىلدان-جىلعا ينتەرنەت بايلانىستىڭ جەدەلدەۋى, ءتۇرلى سمارت قۇرىلعىلاردىڭ كەڭىنەن تارالۋى, سونداي-اق ورتا تاپ ۇلەسىنىڭ كوبەيۋى ايماقتاعى ەلەكتروندى كوممەرتسيا يندۋسترياسىن دامىتۋعا سەپ بولىپ جاتىر. ەندى بەس ەلدىڭ بۇل سالادا بىرىگە قىزمەت ەتۋى اتالعان باعىتتىڭ ودان ءارى قارقىن الۋىنا كومەكتەسپەك.

كونفەرەنتسياعا قاتىسۋشىلار ارىپ­تەس­تەرىمەن ءبىلىم الماسۋعا, مەملە­كەت­تىك-جەكەمەنشىك ىنتىماقتاستىقتىڭ الەۋەتتى باعىتتارىن زەرتتەۋگە, شەشۋدى قاجەت ەتەتىن نەگىزگى ۇلتتىق ساياساتتار مەن ەرەجەلەردى انىقتاۋعا جانە ورتالىق ازياداعى ساۋدا ىنتىماقتاستىعىن ودان ءارى نىعايتۋ جولدارىن تالقىلاۋعا مۇمكىندىك الدى.

كونفەرەنتسيانىڭ ماڭىزدى جاڭا­لىعى – قولونەرشىلەر مۇمكىندىگىن ودان ءارى كەڭەيتۋ ءۇشىن NOVICA اتتى حابتى ىسكە قوستى. اتالعان حاب ورتالىق ازيا قولونەرشىلەرىنە ونلاين ساتۋدىڭ جاڭا ارنالارىن ۇسىنادى. سول ارقىلى شەبەرلەر بۇكىل الەم بويىنشا حالىقارالىق دەڭگەيدە ءوز ونىمدەرىن ساتىلىمعا شى­عارا الادى. ەكى كۇندىك ساپار كەزىندە قاتى­سۋشىلار جەرگىلىكتى تاپسىرىس­تار­دى ورىنداۋ ورتالىقتارىنا بارىپ, الەمدىك ەلەكتروندى كوممەرتسيا نارىعىنداعى الپاۋىت ەلگە اينالىپ وتىرعان ءباا-ءنىڭ ەلەكتروندى ساۋدا نارىعىنىڭ جەتىستىكتەرىمەن تانىستى. قازىر ءباا – پارسى شىعاناعىنداعى اراب مەملەكەتتەرى ىنتىماقتاستىعى كەڭەسى ەلدەرىنىڭ ىشىندە ەلەكتروندى كوممەرتسيا بويىنشا كوشباسشى سانالادى. سونىمەن قاتار ونلاين ساتىپ الۋشىلاردىڭ 60 پايىزدان استامى دۋبايدا.

ەو-نىڭ ءباا-دەگى ەلشىسى اندرەا ماتتەو فونتانانىڭ ايتۋىنشا, ەكونو­ميكالىق ءوسىم مەن ساۋدا كولەمىنىڭ ارتۋى ءۇشىن ەلەكتروندى كوممەرتسيا تاماشا مۇمكىندىك سانالادى.

ايتا كەتەيىك, «Ready4Trade ورتالىق ازيا» – ەو قارجىلاندىراتىن, حالىق­ارالىق ساۋدا ورتالىعى جۇزەگە اسىراتىن تورتجىلدىق جوبا. جوبانىڭ ماقساتى – وا بەس ەلىندە ايماقىشىلىك جانە حالىقارالىق ساۋدانى دامىتۋ ارقىلى ورتالىق ازيانىڭ جالپى تۇراقتى جانە ينكليۋزيۆتى ەكونوميكالىق دامۋىنا ۇلەس قوسۋ. «Ready4Trade ورتالىق ازيا» جوباسىنىڭ بەنەفيتسيارى – ۇكىمەت, شاعىن جانە ورتا كاسىپكەرلىكتەر.

ماماندار قازاقستانداعى ونلاين ساۋدانىڭ كولەمى دە, دەڭگەيى دە ءوسىپ كەلە جاتىر دەگەن پىكىردە جانە مۇنى ناقتى تسيفرلارمەن راستايدى. قازىر جالپى ساۋداداعى ونلاين ساۋدا ۇلەسى شامامەن 15 پايىزعا جەتكەن. Euromonitor International كومپانياسىنىڭ دەرەگى بويىن­شا, 2022 جىلدىڭ قورىتىندىسىنا سايكەس قازاقستانداعى ەلەكتروندى ساۋدا كولەمى 20,2 پايىزعا, 1,3 ترلن تەڭگەگە ءوستى. بۇل ءبىر جىل بۇرىنعىدان 220,1 ملرد تەڭگەگە كوپ. ءىرى تاۋار توپتارىنىڭ بىردە-ءبىرى مينۋس ديناميكاسىن كورسەتپەگەن. ەل تۇرعىندارى ينتەرنەت ارقىلى ساتىپ الۋدى بىرتىندەپ ۇلعايتىپ كەلەدى. بىلتىر ونلاين ساتىلىمداعى باسىم ۇلەستى فەشن-سەگمەنت (32,4 پايىز) يەلەنگەن. ازاماتتار ينتەرنەتتەن كيىم, اياقكيىم, ءتۇرلى اكسەسسۋار ساتىپ الۋ ءۇشىن 423,9 ملرد تەڭگە (+17 پايىز) جۇمساعان. ەكىنشى ورىندا – 27,1 پايىزدى قۇراعان تۇرمىستىق تەحنيكا مەن ەلەكترونيكا. ۇشتىكتە – 355 ملرد تەڭگەگە ساتىلعان جوعارى تەحنولوگيالىق تاۋارلار تۇر (11,6 پايىز).

PwC كومپانياسى ساراپشىلارىنىڭ باعالاۋىنشا, ەلدەگى بولشەك ەلەكتروندى ساۋدانىڭ 83 پايىزىن ماركەتپلەيس ەنشىلەيدى. ونىڭ كوشىن Kaspi.kz باستايدى. كومپانيانىڭ جاريا ەسەبىندەگى دەرەك بويىنشا وسى ونلاين پلاتفورمانىڭ بىلتىرعى قاڭتار-قىركۇيەكتەگى تازا تابىسى 36 پايىزعا ءوسىپ, 422 ملرد تەڭگە بولعان. پلاتفورمانىڭ بەلسەن­دى تۇ­تىنۋ­شىلارى 2021 جىلمەن سالىس­تىر­­عاندا 8 ەسە ارتقان. ەكىنشى ورىندا – Alibaba Group. رەسەيلىك Wildberries ءۇشىنشى ورىندا. ساۋدا جانە ينتەگراتسيا مينيسترلىگىنىڭ دەرەگىنشە, بىلتىر 9 ايدا بۇل كومپانيانىڭ ساتىلىم كولەمى 92,4 ملرد تەڭگەدەن اسىپ تۇسكەن.

Euromonitor International ساراپشى­لارىنىڭ ايتۋىنشا, 2023 جىلى جاھان­دىق ەلەكتروندى ساۋدا نارىعىنىڭ اينا­لىمى 10 ترلن دوللارعا جەتەدى. بۇل سەگمەنت دامۋدى قارقىندى تۇردە جالعاستىرادى جانە تۇرلەنە تۇسەدى. جاڭا ۇردىستەر پايدا بولماق.