مەملەكەت جانە قوعام قايراتكەرى تەمىربەك جۇرگەنوۆتىڭ 125 جىلدىعىنا جانە حالىقارالىق تەاتر كۇنىنە ورايلاستىرىلعان «سالەم» حالىقارالىق كومەديالىق تەاتر فەستيۆالى شىمىلدىعىن ايقارا اشتى. فەستيۆالگە 9 اتالىم بويىنشا قازاقستان, وزبەكستان, قىرعىزستان تەاترلارى قاتىسىپ جاتىر.
فەستيۆالدىڭ رەسمي اشىلۋىنا وراي ءباسپاسوز ءماسليحاتى ۇيىمداستىرىلدى. وندا اتالعان شارانىڭ ماقسات-مۇراتى تولايىم قامتىلدى. حالىقارالىق تەاتر كۇنى مەرەكەسىمەن تۇسپا-تۇس كەلگەن ونەر شەرۋىن وسى سالانىڭ ناعىز مايتالماندارى نۇرلاندىرماق. ءسوز اراسىندا قوعام قايراتكەرى تەمىربەك جۇرگەنوۆ تۋرالى دا ءبىر اۋىز ءسوز ايتا كەتسەك ارتىق بولماس. ماسەلەن, تەمىربەك جۇرگەنوۆتىڭ ءبىلىم سالاسىنا قوسقان قيساپسىز ەڭبەگىن بىرەۋ بىلسە, بىرەۋ بىلمەيدى. الماتىنىڭ وزىندە عانا 18 ءبىلىم وشاعىن اشقان. ناعىز حالىق جاناشىرى. ەلىمىزدەگى تۇڭعىش جوعارى وقۋ ورىندارىنىڭ كوپشىلىگى ەل قامىن جەگەن تەمىربەك جۇرگەنوۆتىڭ ارقاسىندا ۇيىمداستىرىلعان. وزگەسىن بىلاي قويعاندا, س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ, ءال-فارابي اتىنداعى قازاق ۇلتتىق ۋنيۆەرسيتەتىنىڭ, الماتىداعى وپەرا جانە بالەت تەاترىنىڭ نەگىزىن قالاۋشىلاردىڭ ءبىرى. بۇل جايىندا بەلگىلى تەاترتانۋشى مەرۋەرت جاقسىلىقوۆا كەڭىنەن تولعاپ ايتىپ بەردى.
تەاتر فەستيۆالىنىڭ شىمىلدىعى استانا قالاسىنىڭ جاستار تەاترى ساحنالاعان «پرانك-ماحاببات» كومەدياسىمەن اشىلدى. تەاتر ونەرىن جاقسى كورەتىن كوكشەتاۋلىق كورەرمەن تاماشا قويىلىمداردى كورىپ, ءتانتى بولۋدا.
كوكشەتاۋ